मतदाता लोभ्याउने गरी चन्द्रागिरि ८ का वडाध्यक्षले किने सात सय थान 'चुनावी साडी'

मतदाता लोभ्याउने गरी चन्द्रागिरि ८ का वडाध्यक्षले किने सात सय थान 'चुनावी साडी'

A+ A A-

चन्द्रागिरि नगरपालिका वडा नम्बर ८ का जनप्रतिनिधिले मतदाता लाेभ्याउन सरकारी रकमकाे दुरुपयाेग गरेकाे पाइएकाे छ । स्थानीय चुनावका लागि उम्मेदवारी मनाेनयन दर्ता गर्नुभन्दा ठीक अघिल्लाे दिन बाँड्नेगरी वडा ८ काे कार्यालयले करिब ९ लाख मूल्यबराबरकाे सात सयभन्दा बढी थान साडी किनेकाे हाे ।

मातातीर्थस्थित वडा कार्यालयमा ती साडी आजै दिउँसाे २ बजे बाँड्ने भन्दै वडाध्यक्ष सन्ताेष खड्काले हिजाे सूचना निकालेका थिए ।

चुनावी आचारसंहिताकाे उल्लंघन हुन लागेकाे थाहा पाएपछि मुख्य निर्वाचन अधिकृत सिर्जना थपलियाले प्रहरी पठाएर कार्यक्रम राेकिन् । साथै वडामा रहेकाे साडी बरामद गर्न भनिन् । तर प्रहरीले साडी बरामद भने गरेन ।

थानकाेट वृत्तकाे डीएसपी डीएन पाण्डेले साडी बाँड्ने कार्यक्रम राेक्न प्रहरी टाेली पठाएकाे बताए । थप कुरा प्रहरी टाेली फर्केपछि मात्र थाहा हुने उनले बताए । वडा नम्बर ८ भित्रका २८ वटाभन्दा बढी आमा समूहका सदस्यलाई दिनेगरी थानकाे १ हजार २ सय ५० रुपैयाँ हालेर साडी खरिद गरिएकाे वडा सदस्य सविना राउतले बताइन् । यीमध्ये २ सय ९० थान साडी महिना दिनअघि नै किनेर राखिएकाे थियाे । 'साडी बेच्ने साउजी नै दुर्घटनामा परेर घाइते हुनुभएछ । त्यसैले बाँकी साडी केही दिनअघि मात्र ल्याएका हाैँ', उनले शिलापत्रसित भनिन् । साडी किन्न वडा सदस्य राउत र कार्यपालिका सदस्य कृष्णमाया रम्तेल गएका थिए ।

वार्षिक कार्यक्रमकाे याेजनाअनुसार नै साडी वितरण गर्न खाेजिएकाे वडा कार्यालयकाे तर्क छ । तर निर्वाचन अधिकृत थपलियाले वार्षिक कार्यक्रम भए पनि वा हालका वडाअध्यक्ष चुनावमा नउठ्ने हुँदा पनि याे बेला साडी बाँडेर मतदातालाई प्राेत्साहित गर्न नमिल्ने बताइन् । वडा नम्बर ७ का वडाअध्यक्ष शम्भु केसीले चुनावका बेला मतदाता लाेभ्याउने गरी साडी बाँड्न खाेज्नु गलत भएकाे बताए ।

'भाेलि उम्मेदवारी मनाेनयन दर्ता छ । आज महिलालाई साडी बाँड्न खाेज्नु आचारसंहिताकाे उल्लंघन त हाे नै, सरकारी रकमकाे दुरुपयाेग पनि हाे', उनले भने ।

वडाअध्यक्ष खड्का भने फाेन अफ गरेर बसेका छन् । २०७४ सालकाे चुनावमा उनी एमालेबाट वडाअध्यक्षमा निर्वाचित भएका थिए ।

प्रकाशित मिति: शनिबार, वैशाख १०, २०७९ १७:३७