मनोज गजुरेललाई देख्नासाथ डब्लूएचओ प्रमुखले भने- नेपालमा मलाई मजाक बनाउनुभएछ

मनोज गजुरेललाई देख्नासाथ डब्लूएचओ प्रमुखले भने- नेपालमा मलाई मजाक बनाउनुभएछ

डब्लूएचओ प्रमुख टेड्रोस र कलाकार मनोज गजुरेल पाटन दरबार क्षेत्रमा । तस्वीर : मनोज गजुरेल ।

A+ A A-

'जसलाई 'पात्र' बनाएर हास्य व्यङ्ग्य गरिन्छ, उसैले भेट गर्न बोलाउनु एक कलाकारका लागि सम्मान र खुसीको कुरो हो ।'

काेभिडकाे पहिलाे लहरले आलसतालस नेपालीलाई हसाउन २०७७ साउनमा हास्य कलाकार मनोज गजुरेलले विश्व स्वास्थ्य संगठन (डब्लूएचओ) का प्रमुख डा. टेड्रोस एडहानोम गेहब्रेयससकाे 'क्यारिकेचर' गरे । आफैंले पात्र बनाएका उनै टेड्रोसले एक्कासि बाेलाएर भेट दिएपछि गजुरेल गदगद छन् । टेड्रोस संसारका १ सय ९० देश आबद्ध डब्लूएचओका प्रमुख हुन् ।

तीन वर्षदेखि संसारलाई हायलकायल पारेकाे कोरोना फेरि रूप बदलेर देखिएकाे त्रासका माझ काठमाडाैं ओर्लेका टेड्रोस कम व्यस्त छैनन् । तैपनि, उनले कलाकार गजुरेलसित भेट्ने समय निकाले । यति मात्र होइन, आफ्नो नक्कल गरी मान्छे हसाउने मान्छेसँग एकछिन ठट्टा पनि गरे । अनि नेपालजस्तो सानो देशबाट पनि विश्वका ठूल्ठूला नेताहरूलाई विषय बनाएर सन्देश प्रवाह गरेकाेमा गजुरेलकाे तारिफ गरे ।

Happy to meet my ‘twin’ in #Nepal today. He likes to make fun of me, but he says he promotes me that way. Thank you for a good laugh and for bringing humor to people in the past two years, @gajureal. What we seriously agree on are - vaccines, tests & treatment for all & peace https://t.co/irKQR56bB5
— Tedros Adhanom Ghebreyesus (@DrTedros) April 22, 2022

हिजाे पाटन दरबार स्क्वायर क्षेत्रमा 'सक्कली' र 'नक्कली' टेड्राेसबीच भएकाे भेट निकै राेचक थियाे । देख्नासाथ टेड्रोसले गजुरेललाई चिने । भेटेर खुसी लाग्याे भन्दै उनले मास्क खाेलेर सुरुमै गजुरेललाई प्रश्न गर्न भ्याए, 'तपाईं र म उस्तै देखिन्छाैँ र ?'

जवाफ दिन गजुरेलले ढिला गरेनन्, 'फिफ्टी पर्सेन्ट सेमसेम, फिफ्टी पर्सेन्ट मेकअप ।'

केहीबेरपछि टेड्रोसले भने, 'तपाईंले नेपालमा मलाई मजाक बनाउनुभएछ त !'

गजुरेलले बुझाए, 'मैले मजाकमार्फत तपाईं र तपाईंकाे संगठनकाे मेसेज प्रवाह गरेकाे हुँ ।'

विगतमा आफूले विश्वका नेताहरूकाे क्यारिकेचर गर्दाका एकमुस्ट तस्वीरलाई फ्रेमिङ गरी टेड्रर्सलाई भेट्न पुगेका उनले फाेटाे देखाउँदै साेधे, 'तपाईंले मेराे भिडियाे हेर्नुभयाे ?

टेड्रोसले लगत्तै जवाफ दिए, 'अँ, तपाईंले मलाई मजाक बनाउनुभएकाे छ ।' त्याे बेला वरिपरिका सबै गलल हाँसेका थिए ।

यही माैकामा गजुरेलले फ्रेम देखाउँदै भने, 'मेराे मेसेज छ, डु माेर एण्ड माेर भाइरस टेस्ट एण्ड भ्याक्सिन, नाे माेर न्युक्लियर टेस्ट एण्ड फाइटिङ ।' आफूलाई बहुरुपी बनाउन सिपालु गजुरेलले यसाे भनेपछि टेड्रोसले ताली बजाए । भने, 'धेरै राम्राे ।'

गजुरेलले देखाएकाे तस्वीर ।

'अनि यी तपाईंकाे वरिपरि भएकाहरू विश्वका शक्तिशाली नेता हुन्', गजुरेलले थपे ।

उनले टेड्रोसकाे क्यारिकेचर गर्दा अमेरिका, चीनलगायतका शक्ति राष्ट्र काेराेना भाइरस फैलिनुकाे दाेष एकअर्कालाई लगाइरहेका थिए । उत्तर काेरिया मिसाइल परीक्षण गरेकाे-गर्‍यै थियाे । चीनपरस्त भएकाे आराेप लगाउँदै विश्व स्वास्थ्य संगठनलाई दिँदै आएकाे सहयाेग अमेरिकाले राेकिदिएकाे थियाे । संसारकाे जनस्वास्थ्य हेर्ने संगठन महामारीका बेला विवादकाे भूमरीमा फसेकाे थियाे । विश्वभरका मान्छेचाहिँ काेराेनाकाे फैलावटदेखेर त्राहिमाम् थिए । यही सन्दर्भमा नेपालमा गजुरेलले टेड्रोसकाे क्यारिकेचरमार्फत स्वास्थ्य संकटका बेला आपसमा भिड्ने हाेइन, मिलेर काम गर्नुपर्ने सन्देशसहितकाे प्रस्तुति दिएका थिए ।

हेर्नुहाेस् भिडियाेः

'उहाँसँग भेट नै नहाेला भन्ने त लागेकाे थिएन । तर नेपाल आएपछि थाहा भयाे, भेट सम्भव त छ तर सजिलाे छैन', गजुरेलले शिलापत्रसित भने । टेड्रोस आउने थाहा पाएलगत्तै भेटका लागि उनले धेरैतिर फाेन लगाए । तर ठ्याक्कै 'च्यानल' नभेटेकाले कतैबाट भरिलाे जवाफचाहिँ मिलेन । हिजाे एक्कासि विश्व स्वास्थ्य संगठन नेपालका सञ्चार अधिकृत सुधन ज्ञवालीले फाेन गरेर डा. टेड्रोसले भेट्न खाेजेकाे कुरा गजुरेललाई सुनाए ।

'मलाई भेट्ने चाहना उहाँकाे पनि रहेछ', गजुरेलले भने, 'एयरपाेर्ट झर्नेबित्तिकै पनि टेड्रोसले मेराे नक्कल गर्ने कलाकारलाई भेट्ने समय मिलाउनू भन्नुभएकाे रहेछ ।' उनले गजुरेलसित फाेटाे खिच्ने इच्छासमेत जनाएका थिए । डब्लूएचओका नेपाल प्रतिनिधिहरूसँग पनि टेड्रोसले गजुरेलको बारेमा सोधीखोजी गरेका थिए । नेपाल आउनुअघि गजुरेलले गरेकाे आफ्नाे क्यारिकेचर हेरिसकेकाे टेड्रोसकाे भनाइ थियाे ।

टेड्राेसकाे भेसमा मनाेज गजुरेल ।

गजुरेल र टेड्रोसबीच भेट मिलाएका ज्ञवाली विश्व स्वास्थ्य संगठनका प्रमुखमा नेपालसम्बन्धी निकै मसिना कुराहरूप्रतिकाे जानकारी पाएकाे बताउँछन् । 'मनाेजजी त देशकै नामी कलाकार हुनुहुन्छ । त्यसमाथि उहाँले टेड्रोसकै क्यारिकेचर गर्नुभएकाे थियाे । उहाँलाई भेट्न टेड्रोस पनि उत्साहित हुनुहुन्थ्याे', ज्ञवालीले भने, 'यसबाहेक टेड्राेस नेपालका निकै ससना कुराहरूबारे जानकार हुनुहुँदाे रहेछ ।' सुरुमा पाटन हाइस्कुलमा १० मिनेटजति र पछि दरबार स्क्वायर क्षेत्रमा गजुरेलले टेड्रोससँग भलाकुसारी गरे ।

भेटका क्रममा टेड्रोसले प्रतिभाशाली कलाकारहरूलाई शक्तिशाली सूचना संवाहककाे संज्ञा दिए । 'तपाईंहरूले सही सूचना प्रवाह गर्नुभयाे भने जनमानसमा त्यसले ठूलाे परिवर्तन सम्भव गराउँछ', गजुरेलसँग पाटन दरबार स्क्वायरमा टेड्रोसले भने, 'कलाकारसँग साह्रै ठूलो शक्ति हुन्छ । कलाकारले भनेका, देखाएका कुरा मान्छेहरूले मान्छन् । गलत सूचना फैलियाे भने विनाश हुन्छ । सही सन्देश लिएर कलाकारिता गर्नु कलाकारकाे धर्म हो ।'

नेपालजस्ताे सानाे देशबाट विश्वका शक्तिशाली नेताहरूलाई विषय बनाएर सन्देश प्रवाह गरेकाेप्रति टेड्रोस झन् धेरै खुसी भएकाे गजुरेलकाे भनाइ छ । साथै संगठनका महत्त्वपूर्ण सूचना, सन्देशहरू जनमानसमा सही ढंगले पुर्‍याउन गजुरेलजस्ता कालाकारको सहयोग लिन पनि उनले डब्लूएचओका नेपाल प्रतिनिधिहरूलाई अह्राए । गजुरेलले विश्वका नेताहरूजस्तै बनेर क्यारिकेचर गर्दाकाे एकमुस्ट फाेटाे टेड्रोसलाई उपहार दिए ।

टेड्रोस भ्रमणकाे अर्थ

डब्लूएचओ प्रमुख टेड्रोस नेपाल आएपछि ।

स्वास्थ्यमन्त्री विराेध खतिवडा डा. टेड्राेसकाे तीन दिने नेपाल भ्रमण महत्त्वपूर्ण भएकाे बताउँछन् । विश्वका झण्डै दुई सय देश संलग्न रहेकाे संगठनका प्रमुखले नेपाललाई महामारीका समयमा दिएकाे प्राथमिकता अर्थपूर्ण हुने उनकाे भनाइ छ । टेड्राेसले नेपालका केही महत्त्वपूर्ण स्वास्थ्य परियाेजनामा सहयाेग गर्ने बचन पनि दिएका छन् । इथियाेपियन अनुसन्धानकर्तासमेत रहेका टेड्राेस विश्व स्वास्थ्य संगठनकाे प्रमुखमा दाेहाेरिने याेजनामा छन् । चुनाव लड्ने तयारी गरिरहेका उनलाई नेपालले समर्थन् गर्ने मन्त्री खतिवडाले बताए ।

डब्लूएचओ नेपालका सञ्चार अधिकृत सुधन ज्ञवाली पनि नेपालजस्ताे सानाे देशलाई टेड्राेसले दिएकाे प्राथमिकतालाई अर्थपूर्ण ठान्छन् । 'महामारीका दाैरान उहाँले नेपालकाे भ्रमण गर्नु नै खुसीकाे कुरा हाे । त्यसमाथि काेभिडकालमा नेपालमा भए, गरेका कामप्रति जानकार हुनु, डब्लूएचओको तर्फबाट सक्दो सहयोग पुर्‍याउनुले नेपालप्रति उहाँको माया दर्शाउँछ', ज्ञवालीले भने । भ्रमणतालिकाअनुसार टेड्रोस आज फर्किनेछन् ।

प्रकाशित मिति: शनिबार, वैशाख १०, २०७९ १३:०९