एमालेबाट संसद छिरिन्, माओवादीबाट राजदूत दोहोरिन नपाएपछि फर्किइन् पुरानै घर

एमालेबाट संसद छिरिन्, माओवादीबाट राजदूत दोहोरिन नपाएपछि फर्किइन् पुरानै घर

A+ A A-

च्यासलस्थित पार्टी कार्यालय पुगेर ‘पुरानै घर’ फर्किनुअघि लक्की शेर्पाले भनेकी थिइन्, 'वामपन्थी एकताका लागि एमाले फर्किन लागेको हो ।’ शिलापत्रसँग कुराकानी गर्दै शेर्पाले वाम एकताको प्रसंग निकालेर एमालेमा प्रवेश गरेको बताए पनि खासमा माओवादी केन्द्रले राजदूत नबनाएपछिको आक्रोश भनेर टिप्पणी भइरहेको छ ।

शेर्पा अष्ट्रेलियाको राजदूतको दोस्रो इनिङको प्रयासमा थिइन् । आशमात्र होइन, माओवादी अध्यक्ष प्रचण्डसँग पटक-पटक भेटेर ‘राजदूत हुँदा बदनाम भएको छवि’ सुधारका लागि पुनः राजदूत बनाउन आग्रहसमेत गरेकी थिइन् ।

९ फागुन २०७३ मा अष्ट्रेलियाका लागि राजदूत नियुक्त भएकी शेर्पा विवादका कारण फिर्ता हुनुपरेको थियो । त्यतिबेला नेकपाको विवादको मारमा परेर आफूलाई अनावश्यक विवादमा तानिएको, प्रधानमन्त्री केपी ओली र परराष्ट्रमन्त्री प्रदीप ज्ञवालीले प्रचण्डसँगको रिसको मार आफूमाथि परेको बताउने गरेकी थिइन् ।

राजदूत नियुक्त भएलगत्तै साथमै लगेका चालक वाङ्छु शेर्पाले राजदूत शेर्पामाथि आर्थिक अनियमितताको गम्भीर आरोप लगाएका थिए । अष्ट्रेलियाकै सञ्चारमाध्यममा राजदूत शेर्पाले आफूसँग ३३ लाख रुपैयाँ लिएर अष्ट्रेलिया ल्याएको र केही मान्छेलाई अष्ट्रेलिया ल्याउन पहल गर्न भन्दै आफूलाई रकम उठाउन परिचालन गरेको गम्भीर आरोप लगाएका थिए ।

त्यही आरोपपछि राजदूत शेर्पामाथि छानबिन भएको थियो । तत्कालीन परराष्ट्रमन्त्री प्रदीप ज्ञवालीले शेर्पामाथि छानबिन गर्न कमिटी मात्र बनाएनन्, फिर्तासमेत बोलाए । १८ माघ ०७५ मा शेर्पा राजदूतबाट फिर्ता हुनुपरेको थियो । यसरी बदनाम भएर फिर्ता हुनुपरेका कारण त्यसको छवि सुधारका लागि पुनः राजदूत नियुक्तिको चक्करमा लागेकी शेर्पाले प्रचण्डलाई अष्ट्रेलिया त के अन्य देशको राजदूतका लागि सिफारिस नै गरेनन् । त्यसमाथि अष्ट्रेलियाको राजदूत एकीकृत समाजवादीको कोटामा पुग्यो ।

शेर्पाको राजनीतिक पृष्ठभूमि एमालेसँगै जोडिएको थियो । शेर्पाका बाबु श्यामसुन्दर शेर्पा पहिलादेखि नै एमाले थिए र लक्की पनि एमालेको युवा संघमार्फत राजनीतिमा जोडिएकी थिइन् । राजनीतिभन्दा एनजिओमा आवद्ध भएर लामो समय काम गरिरहेकी शेर्पा ०६५ मा एक्कासि संविधानसभा सदस्य हुन पुगेकी थिइन् । एमालेबाट ०६५ सालको संविधानसभामा शेर्पा जनजाति महिला कोटाबाट संविधानसभा सदस्य भएपछि राजनीतिकको ‘लाइमलाइट’मा आएकी हुन् । त्यतिबेला शेर्पा अन्तर्राष्ट्रिय सम्बन्ध तथा मानव अधिकार समितिको सदस्य थिइन् ।

एमालेबाट सभासद् हुनुअघि एमालेको संगठित ससस्यसमेत नभएको बताइन्छ । त्यतिबेला उनी आदिवासी जनजाति महासंघको सचिवका रूपमा काम गरिरहेकी थिइन् । अध्यक्ष पासाङ शेर्पा र सचिव लक्की शेर्पा एकसाथ एमालेबाट समानुपातिक सभासद् नियुक्त भएका थिए । राजनीतिमा आउनुअघि शेर्पा एबीसी नामक गैरसरकारी संस्थामा आवद्ध थिइन् र वातावरणको क्षेत्रमा काम गर्दै आएकी थिइन् ।

पहिलो संविधानसभाको कार्यकाल ०७० मा सकिएपछि ०७० मंसिरको दोस्रो संविधानसभा चुनावअघि शेर्पा एमाले छोडेर माओवादीमा प्रवेश गरिन् । एमाले नेता रामचन्द्र झासहित एमाले छोडेकी शेर्पा ०७० को संविधानसभा चुनावपछि माओवादी कोटाबाट संविधानसभा सदस्य हुने लाइनमा थिइन् । त्यतिबेला माओवादी केन्द्र पराजित भएपछि समानुपातिक सिटको कोटा नै कम हुन पुग्यो, जसले गर्दा उनको दोस्रो इनिङ रोकियो ।

यद्यपि माअ‍ोवादीमै सक्रिय शेर्पालाई त्यतिबेला सांसद बनाउन नसकेका प्रचण्डले ०७४ मा भने अष्ट्रेलियाका लागि राजदूत भने बनाए । शिलापत्रसँग कुरा गर्दै शेर्पाले आफू राजदूत नपाएर एमाले फर्किएको सत्य नभएको दाबी गरिन् । उनले भनिन्, ‘मेरो राजनीतिमा राजदूत पदमात्रै ठूलो कुरा होइन, वाम एकताको पक्षधर भएका कारण एमालेमा फर्किएको हुँ ।’ धरानमा जन्मिएकी शेर्पा त्रिविबाट अर्थशास्त्रमा स्नातकोत्तर उत्तीर्ण हुन् । अहिले थाइल्याण्डको एक विश्वविद्यालयबाट पीएचडी गर्दैछिन् । उनको पुर्खौली घर भने संखुवासभा हो ।

प्रकाशित मिति: शुक्रबार, वैशाख ९, २०७९ १६:५५