चिकित्सक भन्छन् : स्विमिङ पुलको पानीले रोगी बनाउन सक्छ

A+ A A-

मानिसहरु गर्मीको समयमा स्विमिङ पुलमा पौडी खेल्न जाने गरेका छन् । सहरी क्षेत्रमा पछिल्लो समय स्विमिङ पुलमा पौडी खेल्ने संस्कृति विकास हुँदै गएको छ । गर्मी छल्न बिहानदेखि बेलुकासम्म स्विमिङ पुलमा पौडीमा रमाउनेको भीड लाग्ने गरेको छ ।

तर, स्विमिङ पुलमा पौडी खेल्दा सावधानी अपनाउनुपर्ने चिकित्सकहरु बताउँछन् । सार्वजनिक स्विमिङ पुलको पानीले शरीरमा विभिन्न रोगको संक्रमणको खतरा रहेकोले सावधानी अपनाउन चिकित्सकको सुझाव छ ।

सरुवा रोग विशेषज्ञ डा. शेरबहादुर पुनका अनुसार स्विमिङ पुलमा पौडी खेल्दा देखिने समस्याबारे कुनै अनुसन्धानात्मक अध्ययन नभए पनि पौडी खेल्दा ध्यान दिनुपर्छ । विशेषगरी, छालासम्बन्धी समस्या भएका मानिसले विशेष सतर्कता अपनाउनुपर्छ ।

डा. पुनका अनुसार स्विमिङ पुलको पानीको उचित व्यवस्थापन नहुँदा संक्रमण बढ्छ । स्विमिङ पुलको सरसफाइमा क्लोरिन प्रयोगको बाबजुद पनि क्रिपटोइस्पोरिडियम नामक परजीवी केही दिन जीवित रहने भएकाले संक्रमण बढ्ने देखिन्छ ।

विभिन्न देशमा भएका अध्ययन तथा अनुसन्धानले स्विमिङ पुलको पानीले संक्रमणको दर हरेक वर्ष बढ्दै गएको डा. पुन बताउँछन् ।

संक्रमणको जोखिम

चिकित्सकले स्विमिङ पुलको पानीले शरीरमा विभिन्न रोगको संक्रमण हुने खतरा रहेकोले सावधानी अपनाउनुपर्ने बताएका छन् । स्विमिङ पुलको पानीलाई क्लोरिन प्रयोग गरी सफा गरिन्छ । तर, सफा गरिसकेपछि पनि क्रिपटोइस्पोरिडियम नामक परजीवी केही समय जीवित रहने भएकाले रोग प्रतिरोधात्मक क्षमता कमजोर भएका व्यक्तिमा संक्रमण हुन सक्ने चिकित्सकहरु बताउँछन् । त्यस्ता व्यक्तिलाई पखाला लाग्ने, शरीरका अंगहरु बाउडिने, वान्ता हुने जस्ता लक्षण देखिन्छन् । जसले गर्दा त्यस्ता व्यक्तिले स्विमिङ पुलमा पौडी खेल्नु उपयुक्त नहुने चिकित्सक बताउँछन् ।

त्यस्तै, सार्वजनिक पोखरीमा पौडी खेल्दा दाद आउने सम्भावना उच्च रहेको हुँदा सरसफाइमा ध्यान दिनुपर्ने चिकित्सकको सुझाव छ ।
स्विमिङका फाइदा

चिकित्सकका अनुसार पौडी खेल्दा हुने फाइदाहरु :

स्विमिङ गर्दा हात, खुट्टा, पेटलगायत शरीरका अधिकांश भागको व्यायाम हुन्छ
हात, खुट्टा र शरीरका अन्य अंगसमेत पानीमा चल्ने भएकाले शरीर लचकदार हुन्छ
पानीमा तैरिँदा शरीरका मांसपेसीका साथै हड्डीसमेत सक्रिय भई मजबुत हुनुका साथै शरीरको तौल सन्तुलनमा आउँछ
थकान मेट्न र तनावबाट मुक्त हुन स्विमिङ लाभदायक छ
पानीमा खेल्दा आनन्द हुनुका साथै शारीरिक व्यायाम हुने भएकाले राम्रोसँग निद्रा लाग्छ । शारीरिक मात्रै नभएर मानसिक रूपमा पनि स्वस्थ हुन सहयोग गर्छ
नियमित ३० मिनेट स्विमिङ गर्ने व्यक्तिको मुटु दह्रो हुनुको साथै दमको समस्याबाट छुट्कारा पाउन सकिन्छ ।
पौडिँदा शरीरको पुरै भाग चलमलाउँछ, यसकारण रगत शरीरमा निकै राम्रोसँग बहन्छ । यसका साथै शरीरमा भएको कोलस्टेरोल वा रगतमा भएको टक्सिकलाई हटाउन मद्दत गर्छ
क्यालोरी नष्ट गर्न समेत मद्दत गर्छ । रक्तचापलाई पनि कम गर्छ ।
पौडिनुले तनावलाई फाइदा पुर्याउँछ । पौडिँदा शरीरमा इन्डोर्फिन उत्पादन हुन्छ । यो रसायनले तनाव न्यूनीकरण गर्छ

कस्ता व्यक्तिले पौडी नखेल्ने ?

चिकित्सकका अनुसार छालामा घाउ, खटिरा आदि समस्या भएका व्यक्तिले स्विमिङ गर्दा अन्य व्यक्तिलाई सर्ने जोखिम हुन्छ । त्यस्तै, छारे रोग भएका व्यक्तिले पनि स्विमिङ नगर्नु नै उचित हुन्छ । छारे रोगीले पौडी खेल्दा रोगले च्यापेमा उसको पानीमा डुबेर मृत्यु हुने सम्भावना रहन्छ । त्यसैले यस्तो समस्या भएका व्यक्तिले स्विमिङ गर्दा सतर्क हुनुपर्ने चिकित्सकको सुझाव छ । चिकित्सकका अनुसार मादक पदार्थ र नशालु पदार्थ सेवन गरेर स्विमिङ गर्दा दुर्घटना हुने जोखिम भएकाले त्यस्ता नशालु पदार्थ सेवन गरेर स्विमिङ गर्नुहुँदैन ।

प्रकाशित मिति: मंगलबार, असार २४, २०७६ ०१:२१