विषादी विवादमा वाणिज्य मन्त्रीको स्पष्टीकरण : निर्णय गर्न हतार गरिएछ

A+ A A-

उद्योग, वाणिज्य तथा आपूर्तिमन्त्री मात्रिका यादवले विदेशबाट आयात हुने तरकारी तथा फलफूलमा विषादी प्रयोगको परीक्षण सीमा नाकामा गर्ने निर्णय अलि हतारमा भएको महसुस गरी सरकार यो निर्णयबाट पछि हटेको स्पष्टीकरण दिएका छन् ।

‘क्षमता अभाव हुने देखिएकाले केही समयका लागि पूर्ववत् अवस्थामै रहने निर्णय भएको हो,’ राष्ट्रिय सभामा विनियोजन विधेयक, २०७६ अन्तर्गत उद्योग, वाणिज्य तथा आपूर्ति मन्त्रालयसँग सम्बन्धित उठेका प्रश्नको जवाफ दिँदै मन्त्री यादवले भने, ‘केन्द्रीय खाद्य प्रविधि तथा गुणस्तर विभागमा मात्र परीक्षण गर्ने प्रभावकारी प्रयोगशाला छ । कृषि मन्त्रालयअन्तर्गत त्यससम्बन्धी प्रविधि कमजोर छ त्यसैले पूर्ववत् अवस्थामा फर्कनुपरेको हो ।’

सरकारले निजीकरण गरी उद्योग बेचेर खान थालेको आरोप निराधार रहेको उनको भनाइ छ ।

‘सरकारले उद्योगको विकास गर्ने, उत्पादन बढाउने र आयात घटाउने नीति बनाएर काम गरिहेको छ,’ उनले भने, ‘उद्योग खोल्न भनी आफूले दिएको जग्गा दुरुपयोग हुन नदिन सरकार सजग छ ।’

वाणिज्य मन्त्रालयको प्रस्तावमा मन्त्रिपरिषद्ले जेठको अन्तिम साता विदेशबाट आयात हुने तरकारी तथा फलफूलमा कृषि मन्त्रालयले अनिवार्य रुपमा विषादी परीक्षणको निर्णय गरेको थियो । निर्णयअनुसार २ असारमा राजपत्रमा सूचना प्रकाशित भएपछि तरकारी तथा फलफूल बोकेर भारतबाट आएका ट्रक भन्सार नाकामा रोकिए । तर, प्रयोगशाला र कर्मचारी अभावमा विषादी परीक्षण भने फटाफट हुन सकेन ।

भारतबाट आएका तरकारी तथा फलफूलका ट्रक भन्सार नाकामा रोकिएपछि काठमाडौंस्थित भारतीय दूतावासले लिखित रुपमै असन्तुष्टि जनायो । त्यसपछि सरकारले तयारी नपुगेको भन्दै विषादी परीक्षणको निर्णय तत्कालका लागि स्थगन गरेको हो ।

प्रकाशित मिति: सोमबार, असार २३, २०७६ २३:२२