बाढीले डाइभर्सन बगाएपछि पृथ्वी राजमार्गमा सवारी आवागमनमा समस्या

A+ A A-

पृथ्वी राजमार्ग हुँदै पोखरा भित्रिने मुख्य प्रवेशद्वार विजयपुर खोलामा बनाइएको डाइभर्सन बाढीले बगाएको छ । बेली ब्रिज जीर्ण बनेपछि निर्माण गरिएको डाइभर्सन शनिबार राति आएको बाढीले बगाएपछि सवारी आवागमनमा समस्या भएको छ ।

माघमा बेली ब्रिज चर्किएपछि ठूला सवारी आवातजावत गर्न डाइभर्सन बनाइएको थियो । पुलबाट १० टनभन्दा माथिको मालवाहक सवारी आउजाउ गर्न रोक लगाइएको थियो । अहिले मालावाहक सवारीसाधनको आवागमन पूर्ण रूपमा बन्द भएको छ ।

डाइभर्सन बगाएपछि अहिले सयौं सवारीकाे लामो लाइन छ । तनहुँको कोत्रेसम्म गाडीहरु रोकिएका छन् । अवरुद्ध बाटो खुलाउने काम भइरहेको सडक डिभिजन पोखराका प्रमुख हरिकुमार पोखरेलले बताए ।

‘सामान्य बाढीले डाइभर्सन बगाएपछि अब फेरि डाइभर्सन नै बनाएर काम हुँदैन,’ उनले भने, ‘बरु ठेकेदारलाई आग्रह गरेर बेली ब्रिजको कामलाई नै तीव्र गतिमा अगाडि बढाउँछौं ।’

उनले मालवाहक सवारीलाई आवतजावत गर्न रातको समयमा एकपटकमा एउटा सवारी पास गराउन सकिने उनले बताए।

सडक विभागले विजयपुर खोलामा स्थायी (ढलान) पुल निर्माणका लागि २०५९ सालमा टेन्डर आह्वान गरेको थियो । पुल निर्माण दुई वर्ष भित्रसक्नुपर्ने भए पनि २०६४ मा मात्र पुलको निर्माण कार्य सकिएको थियो । २०६४ मा सम्पन्न भएको पुल २०७५ को अन्त्यमा भाँचिएर काम नलाग्ने अवस्थामा पुगेको हो ।
मर्मतको क्रममा १२ फागुनमा पुल छियाछिया अवस्थामा भेटिएपछि कार्यालयले २६ गतेदेखि पुलमा १० टनभन्दा बढी भारवहन क्षमताका हेभी गाडी निषेध गरेर डाइभर्सन बनाएको थियो । अहिले पुल मर्मतको काम अगाडि बढ्न सकेको छैन । हलुका यात्रुवाहक सवारीसाधन सोही पुल हुँदै आवागमन गरिरहेका छन् ।

पुल नबन्दा गण्डकी प्रदेशको राजधानी कास्की, बाग्लुङ, पर्वत, म्याग्दी र मुस्ताङसम्मको यातायात प्रभावित हुने गरेको छ । पोखरा जाने विकल्पका रूपमा लेखनाथबाट सेती नदीको लामगादी, पटनेरीलगायतका स्थानमा पुलबाट हलुका सवारीसाधन पठाउन सकिने भए पनि दोविल्लामा रहेको पुल समेत जीर्ण अवस्थामा रहेकाले ठूला गाडी आवतजावतमा समस्या हुने गरेको छ ।

समयमै पुलको मर्मत र वैकल्पिक उपायबारे नसोचिने हो भने अबको केही दिनमा नै सवारी आवागमन प्रभावित बन्ने जिल्ला ट्राफिक कार्यालय कास्कीका प्रहरी निरीक्षक मुरारी मिश्रले बताए ।