इटहरीको मेयर नपाउने भएपछि केशव विष्टले भने- कांग्रेसलाई सघाउनुपर्ने भए हाम्रा केही सर्त छन्

इटहरीको मेयर नपाउने भएपछि केशव विष्टले भने- कांग्रेसलाई सघाउनुपर्ने भए हाम्रा केही सर्त छन्

A+ A A-

इटहरी उपमहानगरपालिकामा नेकपा (एकीकृत समाजवादी)ले कांग्रेससँग सात वटा वडा मागेको छ । मेयर पाउने अपेक्षामा उम्मेदवार सिफारिस गरिसकेको सो पार्टीले उपमेयरमै चित्त बुझाउनुपर्ने भएपछि सात वटा वडामा दाबी गरेको हो । अन्यथा कांग्रेसलाई सघाउने विषयमा यसै भन्न नसकिने एकीकृत समाजवादीका नेता केशवकुमार विष्टले बताए । समाजवादीले उनलाई मेयरमा निर्विकल्प सिफारिस गरेको थियो । तर कांग्रेस नेताहरूले नमानेपछि मेयरमा विष्टको सम्भावना सकिएको छ । यद्यपि, इटहरीमा आफूहरू बलियो रहेको दाबी गर्दै विष्टले कांग्रेससँग आगामी छलफल कस्तो हुन्छ, त्यसैले सहकार्यको आगामी खाका तय गर्ने बताए ।

नेकपा (एकीकृत समाजवादी) पार्टीबाट मेयरमा सिफारिस भएका विष्टले यसाे भनेः

केही दिनयता इटहरी कांग्रेसका साथीहरूबाट आएका अभिव्यक्तिहरू हाम्रा लागि अप्रिय छन् । गठबन्धनमा देशभरका ११ वटा उपमहानगर बाँड्दा इटहरी नेकपा (एकीकृत समाजवादी)को भागमा पर्थ्यो ।

शीर्ष तहमै इटहरीको मेयरमा समाजवादीका उम्मेदवार अघि सार्ने कुरा भएको हो । छलफल चलिरहेकै थियो । तर, इटहरी कांग्रेसका साथीहरूले हाम्रो अपमान हुनेगरी बोल्दै हिँड्नुभयो । इटहरीमा हाम्रो दाबी स्वाभाविक हो ।

मेयरका लागि एकीकृत समाजवादीले मलाई निर्विकल्प अघि सारेको थियो । उपमहानगर बागबण्डा गर्दा इटहरी हाम्रो भागमा पर्ने देखिएपछि कांग्रेसबाट हामीले सहयोगको अपेक्षा गरेका थियौँ । तर उहाँहरूले हाम्रो पार्टीलाई पार्टी नै होइन भन्ने तरिकाले बोल्नुभयो ।

गठबन्धनबाट हाम्रो पार्टीले मेयर पाएमा भोट नै नहाल्नेसम्म भन्न भ्याउनुभयो । यसप्रति मेरो आपत्ति छ । अब उहाँहरूले मेयर पाउने निश्चित भएको छ । हाम्रो भागमा उपमेयर परेको छ । तर कांग्रेसलाई सघाउने विषयमा म अहिल्यै केही बोल्न चाहन्नँ ।

आगामी दिनमा उहाँहरूको व्यवहार हेरिन्छ । हिजोअस्तिकै जस्तो व्यवहार गर्नुभयो भने उहाँहरूलाई हामीले किन सघाउने ? कांग्रेसलाई सघाउनुपर्ने भए हाम्रा केही सर्त छन् । अघिल्लो चुनावमा एमालेले जितेको इटहरीमा हाम्रो दाबी स्वाभाविक थियो । हामीले पक्का जित्थ्याैँ । मेयर हामीले पाएनौँ । केही छैन । अब हामी ७ वटा वडामा दाबी गर्छौं । यसमा कांग्रेसले सहमति जनाउँछ भने साथ दिइन्छ । अन्यथा सोच्नैपर्छ ।

प्रकाशित मिति: बुधबार, वैशाख ७, २०७९ १५:५९