महानगरको भागवण्डा : संसदीय चुनावसम्मै गठबन्धन जोगाउन गले देउवा

A+ A A-

सत्तारुढ गठबन्धनलाई संसदीय चुनावसम्मै कसिलो बनाउन महानगरको भागवण्डामा कांग्रेस सभापति शेरबहादुर देउवा गलेका छन् । भरतपुर र पोखरा महानगरपालिकाको नेतृत्व नछोड्न कार्यकर्ताले दबाब दिए पनि गठबन्धनका सहयात्रीसामु गल्दै देउवाले दुई महानगरको नेतृत्व छाडेका हुन् । केन्द्रमा गठबन्धन कसिलो बनाउन देउवाले निर्णय लिए पनि ग्राउण्डमा कार्यान्वयन फितलो भए त्यसको जिम्मेवारी आफूहरूले लिन नसक्ने कांग्रेस नेताहरूले बताएका छन् ।

सत्ता गठबन्धनमा कांग्रेसले तीन महानगर र तीन उमहानगरपालिकाको नेतृत्व लिने सहमति भएको छ । सहमतिअनुसार कांग्रेसले काठमाडौं, ललितपुर र विराटनगरको मेयर लिनेछ । यस्तै उपमेयरमा भरतपुर, वीरगञ्ज र पोखरामा उम्मेदवारी दिनेछ ।

प्रधानमन्त्रीसमेत रहेका कांग्रेस सभापति देउवाले पोखरा र भरतपुरका असन्तुष्ट नेता कार्यकर्तालाई आ-आफ्नो बाध्यता बुझिदिन आग्रह गरेका थिए । गठबन्धनकै बलमा आफूले सरकारको नेतृत्व पाएकाले र गठबन्धन टुटाउने षड्यन्त्र भएकाले पनि सम्झौता गर्नुपरेको बाध्यता बुझिदिन कांग्रेस कास्की र कांग्रेस चितवनका नेतृत्वसामु देउवाले आग्रह गरेका थिए ।

'अहिलेलाई बाध्यता बुझिदिनोस् पोखरा र भरतपुर हामीले छोड्नैपर्ने भयो । असन्तुष्टिलाई साम्य पारेर गठबन्धनलाई जिताउन खटिनू,' उनको आग्रहबारे चितवन कांग्रेसका सभापति राजेश्वर खनालले भने ।

गठबन्धनका उम्मेदवारलाई अहसयोग भए संसदीय चुनावमा त्यसको असर पार्टीलाई पर्ने भएकाले जिम्मेवारीपूर्वक खटिन देउवाले निर्देशन दिएको कास्कीका सभापति किशोरदत्त बरालले बताए । 'उहाँको चिन्ता परिणाम पक्षमा नआए एमालेसँग फेरि मिलेर कांग्रेसलाई कमजोर पार्ने किसिमको थियो,' बरालले भने ।

नेपाल विद्यार्थी संघको स्थापना दिवसको अवसरमा देउवाले यही आशय अभिव्यक्त गरेका थिए । 'पहिले पनि एमालेसँग मिल्दा कांग्रेस कमजोर भएको थियो । कांग्रेसलाई बलियो बनाउन मैले गठबन्धन गरेर के गल्ती गरेँ,' देउवाले भने, 'गठबन्धन भनेको कांग्रेसले बढी सिट लिनमात्रै बनेको होइन ।'

एकीकृत समाजवादीले आफूहरूको विद्रोहको अपमान नगर्न गठबन्धनभित्र चेतावनी दिइरहेको थियो । पोखरा महानगर पाउनुपर्ने दाबी गर्दै एकीकृत समाजवादीले शक्तिको आधारमा नभएर सम्झौताको आधारमा गठबन्धन हुनुपर्ने बताइरहेको थियो । पोखराको नेतृत्व आफ्नै पोल्टामा नपरे अपमानविरुद्ध फेरि अर्को विद्रोह हुन सक्ने चेतावनी अध्यक्ष माधव नेपालले मंगलबार पनि दिएका थिए । सोही दबाबमा परी देउवाले पोखरा महानगर छाडेका हुन् ।

'कतिपय ठाउँमा अरूको शक्तिको अवमूल्यन गर्दै अलि अपमानपूर्ण व्यवहार भएको छ भन्ने रिपोर्ट पनि आइरहेको छ,' नेपालले भनेका थिए, 'हामी अपमान सहनका लागि जन्मिएका होइनौँ । अपमानको विरूद्धमा विद्रोह गर्दै जन्मिएका हौँ । हामीलाई आफ्नो शक्ति र सामर्थमा विश्वास छ ।'

केन्द्रको निर्णय कार्यान्वयन नभए जिम्मा नलिने कास्की र चितवनको चेतावनी

कास्की र चितवनको महानगर पार्टीले गुमाएपछि गठबन्धनका दललाई कार्यकर्ताले सहयोग नगरे आफूहरू जिम्मेवार नहुने चेतावनी जिल्लाका नेताहरूले दिएका छन् । कास्कीका अध्यक्ष बरालले पार्टीको ६५ हजार मत कम जनतमत भएको एकीकृत समाजवादीका पक्षमा खन्याउन नसकिने जानकारी देउवालाई गराएका थिए ।

'गठबन्धन जोगाउने बाध्यतामा तपाईंले पार्टीको ६५ हजार मत कमजोर धरातल भएको दललाई बुझाउन भन्नुभएको छ । कार्यकर्ताहरूलाई अर्को चिह्नमा मत खसाउनुस् भन्ने स्थिति छैन । परिणाम अर्को आएमा जिम्मेवारी लिन सकिँदैन,' बरालले भनेका थिए ।

यता चितवन कांग्रेसले पनि कार्यकर्तामा असन्तुष्टि बढिरहेकाले केन्द्रको निर्णय कार्यान्वयन हुन कठिन रहेको जानकारी सभापति देउवालाई गराएको थियो । 'कार्यकर्ताहरू आफ्नो चुनाव चिह्नमा मत हाल्न नपाएर रुष्ट छन् । भरतपुरको हकमा केन्द्रको निर्णय कार्यान्वयन गराउन कठिन छ,' खनालले देउवालाई जानकारी गराएका थिए ।

कांग्रेस केन्द्रीय सदस्य समेत रहेका नेता दिनेश कोइरालाले साँझ विज्ञप्ति जारी गर्दै भरतपुरमा माओवादीलाई सघाउन नसकिने बताएका छन् । ७ आधार प्रस्तुत गर्दै उनले यस्तो विज्ञप्ति निकालेका हुन् । विज्ञप्तिमा भनिएको छ, 'कांग्रेसले समस्त कांग्रेसजन र आम जनताको विचार तथा भावना विपरित अन्य पार्टीलाई मेयरमा समर्थन गर्न सक्दैन ।’

'स्थानीय अवस्था र आवश्यकताअनुसार नै नेपाली कांग्रेस चितवनका विभिन्न समितिहरूले भरतपुर महानगरमा नेपाली कांग्रेसले नै उम्मेदवारी दिने निर्णय गरिसकेको छ,' कोइरालाले भनेका छन्, 'स्थानीय आवश्यकता र अवस्था पहिचान गर्ने जिम्मेवारी स्थानीय कार्यकर्ता र समितिहरूको हो भन्ने बुझाइरहन पर्ला र ?'

उनले कार्यकर्ताको भावनाविपरीत गठबन्धनका दलसामु सभापति गलेको टिप्पणी पनि गरेका छन् । 'केन्द्रीय समिति बैठकदेखि नै हामीले भरतपुर छोड्नहुँदैन भन्यौँ । अरु पदाधिकारीहरूले पनि ध्यानाकर्षण गराउँदासमेत उहाँ सत्ता साझेदार दलहरूसँग गल्नुभयो उहाँ गले पनि चितवन कांग्रेस आफ्नो अडान अडिग छ । हामी मेयरमा उम्मेदवारी दर्ता गराउछौँ,' कोइरालाले शिलापत्रसँग भने ।

गठबन्धनमा भएको सहमतिअनुसार भरतपुरमा माओवादी केन्द्र र पोखरामा एकीकृत समाजवादीले मेयर पाएको छ । यता वीरगञ्जको मेयर भने जनता समाजवादी पार्टीले पाएको छ । माओवादीले ललितपुरमा उपमेयर पाउँदा, एकीकृत समाजवादीले काठमाडौँ र जसपाले विराटनगरमा उपमेयर पाएको छ ।

प्रकाशित मिति: मंगलबार, वैशाख ६, २०७९ २१:५५