कतारमा अवैध विदेशी कामदारलाई वैधानिक हुन ३० अप्रिलसम्म म्याद थप

A+ A A-

कतारमा अवैध रूपमा बसिरहेका विदेशी आप्रवासीको कानुनी हैसियत संशोधन गरी नियमित गर्ने अवधि आगामी ३० अप्रिलसम्म थप गरिएको छ । कतारस्थित नेपाली दूतावासले कतार सरकारद्वारा आप्रवासी आगमन र प्रस्थान तथा उनीहरूको आवास नियमन गर्न सन् २०१५ को कानुन नम्बर २१ उल्लंघन गरेका आप्रवासीलाई नियमित गर्न अवधि थप गरिएको जानकारी दिएको हो ।

कतारको आन्तरिक मामिला मन्त्रालयले आवासीय नियम तथा रोजगार भिसाको नियम उल्लंघन गरेका विदेशी आप्रवासीलाई वैधानिक हुन थप समावधि बढाएको जनाएको छ । कतार सरकारले बर्सेनि त्यहाँ रहेका रोजगारदाता र विदेशी श्रमिकका लागि आममाफीको अवसर दिँदै आएको छ ।

रोजगार भिसामा कतार गएर विभिन्न कारणले कतारी आईडी प्राप्त नगरेका वा नवीकरण हुन नसकी अवैध रूपमा काम गरिरहेका नेपालीसहित अन्य विदेशी श्रमिकका लागि आममाफी योजनाको म्याद थप गरिएको दूतावासले जनाएको छ ।

कतार सरकारले त्यहाँ रहेका नेपालीसहित विदेशी श्रमिकको अवैधानिक बसाइलाई कानुनी हौसियत नियमित गर्ने समय बढाएर १७ वैशाखसम्म पुर्‍याएको त्यहाँस्थित नेपाली दूतावासले जनाएको छ ।

विभिन्न कारणले लामो समयदेखि बिनाकागजात काम गरिरहेका श्रमिकलाई कुनै रोजगारदाता कम्पनीबाट ‘जब अफर लेटर’ लिई आवश्यक कागजातसहित तोकिएका सेवा केन्द्रबाट वैधानिक हुन सक्ने जनाइएको त्यहाँ स्थित नेपाली दूतावासका द्वितीय सचिव प्रविन भट्टराईले जानकारी दिए ।

कतारको आन्तरिक मामिला मन्त्रालयले कागजातविहीन विदेशी श्रमिकका लागि स्वदेश फर्कने वा रोजगारी नियमित गर्न सक्ने दुई विकल्प दिएर आममाफीको घोषणा गर्दै आएको उनका भनाइ छ ।

यसका लागि कतार सरकारले तोकेका पाँचवटा सेवा केन्द्रमा गएर हालसम्मको जरिवाना छुट तथा मिनाहा गरी कम्पनीमा रोजगारीका लागि कागजात नियमित गर्न सक्ने दूतावासले जनाएको छ ।

रोजगारदाता परिवर्तनका लागि सलाल, अल रयान, मेसाइमिर, अल वाक्रा वा उम्म सुनाइमस्थित सेवा केन्द्रमा दिन सकिने कतारको आन्तरिक मन्त्रालयले जनाएको छ ।

यसैगरी, साबिकका रोजगारदाताअन्तर्गतको आवास अनुमति जारी वा नवीकरणको आवेदन लिने सेवा केन्द्रमध्ये अल समाल, अल खोर, अल दायेन, उम्म सलाल, द पर्ल, ओनाइजा, सुक वाफिक, अल रयान, उम्म सुनाइम, अल सहानियाँ, मेसाइमिर, अल वाका वा दुखानका कुनै एक सेवा केन्द्रमामा जान सकिने जनाइएको छ ।

प्रकाशित मिति: मंगलबार, वैशाख ६, २०७९ १४:०१