पेरिसडाँडाबाट प्रचण्डको सन्देश : ३० वैशाखमै 'परिवर्तनकारी र प्रतिगामी' शक्तिबीचको भिडन्त

पेरिसडाँडाबाट प्रचण्डको सन्देश : ३० वैशाखमै 'परिवर्तनकारी र प्रतिगामी' शक्तिबीचको भिडन्त

A+ A A-

प्रमुख प्रतिपक्षी नेकपा एमालेले नेत्रविक्रम चन्द 'विप्लव' नेतृत्वको नेपाल कम्युनिस्ट पार्टीलाई देखाएर सरकार चुनाव सार्न उद्यत रहेको टिप्पणी गरिरहेको छ । यता निर्वाचन आयोगले पनि चुनाव सरे मुलुक दुर्घटनामा फस्ने चेतावनी दिइरहेको छ । प्रतिपक्षी दल र निर्वाचन आयोगबाट चुनावी मितिबारे शंका पैदा भइरहेको अवस्थामा माओवादी केन्द्रका अध्यक्ष पुष्पकमल दाहाल 'प्रचण्ड'ले भने ३० वैशाखमै चुनाव हुने दाबी गरेका छन् ।

सोमबार पार्टी केन्द्रीय कार्यालय पेरिसडाँडामा पत्रकार सम्मेलन गर्दै उनले सत्ता गठबन्धन र सरकार दुवैको मनसाय चुनाव सार्ने नरहेको प्रस्ट पारेका हुन् । विप्लव नेतृत्वको नेकपा चुनावमा आउन खोज्नुलाई सत्ता गठबन्धन र सरकार दुवैले सकारात्मक रूपमा लिएको भन्दै उनले उक्त पार्टीका कारण चुनावको मिति नसर्ने दाबी गरे ।

'हिंसात्मक राजनीति त्यागेर शान्तिपूर्ण राजनीतिमा आएको पार्टी निर्वाचनमा सहभागी हुन खोज्नुलाई हामीले सकरात्मक मानेका छौँ । उनीहरूलाई चुनावमा सहभागी हुने वातावरण बनाउनुपर्छ भन्ने मत सत्ता गठबन्धन र सरकार दुवैको छ । तर, निर्वाचनको कार्यतालिका अघि बढेको स्थितिमा कार्यतालिका नै स्थगित हुँदैन । सबैजना ढुक्क हुनुहोस् निर्वाचन वैशाख ३० मै हुन्छ, ' प्रचण्डले भने ।

सत्ता गठबन्धन समयमै चुनाव गराउनका निम्ति दृढताका साथ लागिपरेको प्रचण्डको जिकिर छ । 'सरकार र गठबन्धन निर्वाचन सार्ने मनसायमा छैन । हामी दृढताका साथ निर्वाचन गराउने पक्षमा लागेका छौँ,' उनले भने ।

सत्ता गठबन्धनभित्र महानगर र उपमहानगरमा तालेमेलको विषय पेचिलो बनिरहेको अवस्थामा प्रचण्डले तालेमलको विषयमा अर्को विकल्प पनि ल्याएका छन् । ६ महानगर र ११ उपमहानगरमा पाँच दलबीचको तालेमेल व्यावहारिक रूपमा कठिनाई भए पाँच दलभित्रै तालमेलमा सकरात्मक रहने पक्षधरबीच सहकार्य हुने उनले बताए ।

'हामी पाँच दलबीच नै समझदारी बनोस् भनेर कोशिस गरिरहेका छौँ । बेलुकासम्म हामी सहकार्यलाई सम्भव बनाउने कोसिस गर्नेछौँ । सम्भव नभए पाँच दलभित्रै सहमत हुने दलबीच तालमेल गर्छौं,' प्रचण्डले भने ।

महानगर र उपमहानगरबाहेकका स्थानमा तालमेलका निम्ति केन्द्रबाट हस्तक्षेप नगर्ने प्रचण्डले बताए । स्थानीय कमिटीमा उम्मेदवार छनोटका लागि समस्या परेको अवस्थामा र उनीहरूले केन्द्र गुहारेको अवस्थामा बाहेक केन्द्रले नगर र गाउँपालिकामा कुनै हस्तक्षेप नगर्ने प्रचण्डको भनाइ छ । 'महानगर र उपमहानगरमा केन्द्रबाटै टुंग्याउने कोशिस भइरहेको छ । नगरपालिका र गाउँपालिकाको हकमा केन्द्रलाई आग्रह नहुँदासम्म हस्तक्षेप गर्ने मनिस्थितिमा हामी छैनौँ,' उनले भने ।

सत्ता गठबन्धनमा तालमेलबारे तल्लो कमिटीमा असन्तुष्टि व्याप्त हुँदा साझा चुनाव चिह्नमा चुनावमा जाने विकल्पसमेत प्रचण्डले गठबन्धनको बैठकमा पेस गरेका थिए । साझा चुनाव चिह्नमा लड्दा कानुनी उल्झन लगायतका समस्या देखा पर्ने भएपछि त्यस प्रस्तावको कार्यान्वयन सम्भव नरहेको उनले बताए ।

'गठबन्धनका दलबीच स्थानीय तहमा प्रमुख जसले पाउँछ उसैको चुनाव चिह्नमा अरुले पनि चुनाव लड्ने विषयमा छलफल भएकै हो । निर्वाचन कार्यतालिका अघि बढिसकेको र कानुनी समस्या पनि आउने भएपछि अहिलेलाई यो विकल्प निकै जटिल देखियो,' प्रचण्डले भने ।

प्रचण्डले स्थानीय चुनावलाई प्रतिगामी र परिवर्तनकारी शक्तिबीचको प्रतिस्पर्धाका रूपमा अर्थ्याएका छन् । 'अहिले गणतन्त्र, धर्मनिरपेक्षता र संघीयताको पक्षधरबीच एउटा र संविधानका आधारभूत उपलब्धीको विरोध गर्ने शक्तिबीच अर्को गठबन्धन बनेको छ । त्यसैले यो निर्वाचन प्रगतिका पक्षधर र प्रतिगमनकारी शक्तिबीचको प्रतिस्पर्धा हो,' प्रचण्डले भने, 'यो दुई गठबन्धनबीच ३० वैशाखमै प्रतिस्पर्धा हुन्छ । निर्वाचन हुने बिहानसम्म पनि चुनाव सर्छ भन्ने हल्ला चलिरहन्छ । ढुक्क भएर ३० वैशाखका लागि तयार हुनुहोस् ।'

पत्रकार सम्मेलनमा प्रचण्ड पार्टीको आन्तरिक विषयमा पनि प्रवेश गरे । उनले स्थानीय चुनावपछि पार्टीको कमिटीलाई पूर्णता दिइने बताए । 'हामीले सर्वसम्मत रूपमा पार्टीको दस्तावेज पारित गर्‍यौँ । सर्वसम्मत रूपमै अध्यक्ष चयन भयो । र, कमिटीलाई चुनावपछि पूर्णता दिने निर्णय पनि सर्वसम्मतिले भएको हो । अब निर्वाचनपछि पार्टीको पदाधिकारीको टुंगो लाग्छ,' उनले भने ।

प्रचण्डले अर्थमन्त्रीबाट जनार्दन शर्मालाई हटाउने विषयमा गठबन्धनमा कुनै छलफल नभएको उनले बताए ।

प्रकाशित मिति: सोमबार, वैशाख ५, २०७९ १५:३४