बझाङमा पनि सत्ता गठबन्धन भत्किने सम्भावना, दलहरू आ-आफ्नै तयारीमा

A+ A A-

बझाङमा सत्ताधारी पाँच दलबीच सिट बाँडफाँटमा कुरा नमिलेपछि चुनावी गठबन्धनको सम्भावना कम हुँदै गएको छ । जिल्लाका १२ स्थानीय तहमध्ये नेपाली कांग्रेसले यसअघि जितेका चार पालिकासहित थप दुई पालिकामा आफूले नेतृत्व पाउनुपर्ने दाबी गरेको छ ।

कांग्रेसले यसअघि सुर्मा, साईपाल, खप्तडछान्ना गाँउपालिका र बुङ्गल नगरपालिकामा जितेको थियो । यी बाहेक जयपृथ्वी नगरपालिका र मष्टा गाँउपालिकामा कांग्रेसले आफूले नेतृत्व पाउनुपर्ने दाबी गर्दै आएको छ ।

बाँकी रहेका ६ पालिकामा नेकपा माओवादी केन्द्र र नेकपा एकीकृत समाजवादीलाई नेतृत्व दिने कांग्रेसले प्रस्ताव ल्याएको हो । माओवादी केन्द्र र समाजवादीले छविस पाथीभेरा गाउँपालिका नछोड्ने बताएपछि गठबन्धनमा थप सकस देखिएको नेताहरूले बताएका छन् ।

सत्ता साझेदार पाँच दलको बैठकले नेकपा एमालेबाट एकीकृत समाजवादीमा प्रवेश गरेका जनप्रतिनिधिलाई सोही पालिकामा उम्मेदवार बनाउने निर्णय गरेपछि बझाङमा छविसपाथीभेरा र केदारस्युँ गाँउपालिका एकीकृत समाजवादीको भागमा पर्ने पक्का भएको छ ।

केदारस्युँ गाउँपालिकाका जनप्रतिनिधिहरूले पार्टी विभाजनको बेला एकीकृत समाजवादीमा सनाखत गरेको तर छविसपाथिभेरा गाउँपालिकाका जनप्रतिनिधिहरूले सनाखत नगरेकोले उक्त पालिका आफूले पाउनुपर्ने माओवादी केन्द्रले अडान लिएको छ ।

सत्तारुढ दलबीच नै सिट बाँडफाँटमा कुरो नमिल्दा स्थानीय तहको निर्वाचनमा गठबन्धन गर्ने निर्णय बझाङमा कार्यान्वयन नहुने देखिएको छ । गठबन्धन भंग भइसक्यो भनेर घोषणा नभएको तर गठबन्धन हुने सम्भावना न्यून रहेको नेकपा माओवादी केन्द्रका सुदूरपश्चिम प्रदेश सचिव जनकबहादुर बुढाले बताए ।

गठबन्धन नहुने सम्भावना बढेपछि नेकपा एसले पनि एकल उम्मेदवार छनोटको लागि गृहकार्य सुरु गरेको छ । सकेसम्म गठबन्धन गर्ने र नमिले एक्लाएक्लै निर्वाचनमा जाने गरी उम्मेदवार छनोटको प्रक्रिया सुरु गरेको पार्टीका जिल्ला उपसचिव गणेश बोहराले बताए ।

नेपाली कांग्रेसले पनि बझाङमा गठबन्धन हुने सम्भावना कम हुँदै गएको बताउँदै आएको छ । नेकपा माओवादी केन्द्र र नेकपा एसका कारण बझाङमा गठबन्धनबारे अन्तिम टुंगाे लाग्न नसकेकाे कांग्रेस बझाङका प्रवक्ता रमानन्द जोशीले बताए ।

प्रकाशित मिति: सोमबार, वैशाख ५, २०७९ १३:१२