पेचिलो बन्दै गठबन्धनमा भागवण्डा, माओवादी र एसको दाबीले कांग्रेस दबाबमा

A+ A A-

सत्ता गठबन्धनको बैठकमा महानगर र उपमहानगरमा पाँच दलले आ-आफ्नै दाबी पेस गरेपछि स्थानीय चुनाव अनुगमन तथा परिचालन समिति सिट संख्याबारे अनिर्णित बनेको छ । आइतबार बालुवाटारमा बसेको समितिको बैठकले कुनै निष्कर्ष निकाल्न नसकेको हो ।

६ वटा महानगर र ११ वटा उपमहानगरमा दलहरू आ-आफ्नो अडानबाट पछाडि नहटेपछि सहमति जुट्न नसकेको संयोजक रामचन्द्र पौडेलले बताए ।

नेपाली कांग्रेसको देशभरि दाबी रहेको र अरुले पनि आ-आफ्नै दाबी पेस गरेपछि सहमति जुट्न नसकेको पौडेलले बताए । 'हाम्रो त देशभरि नै दाबी छ । अन्य दलले पनि आ-आफ्नै दाबी गरिरहेका छन् । आज अडान सुन्ने कुरा मात्रै भयो बैठकले कुनै निष्कर्ष निकाल्न सकेन,' उनले भने ।

बैठकमा नेपाली कांग्रेसका महामन्त्री गगन थापाले केन्द्रबाट जबरजस्ती तालमेल लाद्ने स्थिति नभएको जानकारी गराएका थिए । कार्यकर्ता र स्थानीय कमिटीको भावनाविपरीतको निर्णय भए परिणाम सुखद नहुने जानकारी उनले गठबन्धनका अन्य दललाई बैठकमा गराएका छन् । 'हाम्रा साथीहरू कुनै पनि स्थानीय तहमा मेयर वा प्रमुख छोड्ने मनिस्थितिमा हुनुहुन्न । तालमेलको विषयमा हामी केन्द्रमा मात्रै इमानदार भएर हुँदैन । तल्लो तहका कार्यकर्ताको जिम्मेवारी हामीले केन्द्रबाट लिन सक्ने स्थिति छैन,' थापाले बैठकमा भनेका छन् ।

बैठकमा माओवादी केन्द्रले भरतपुर महानगरपालिकामा कांग्रेसले अन्यथा गर्ननहुने मत राखेपछि नेता ज्ञानेन्द्रबहादुर कार्कीले भरतपुर महानगरपालिकाको सन्दर्भमा कांग्रेसको नेतृत्व संवेदनशील रहेको बताएका थिए । 'भरतपुरको सवालमा कांग्रेसको नेतृत्व गठबन्धनको मर्मलाई कायम राख्ने हिसाबले संवेदनशील नै हुनुहुन्छ,' उनले बैठकमा भनेका थिए ।

बैठकमा माओवादी केन्द्रले भरतपुर महानगरपालिकाहित धरान, जितपुर सिमारा, हेटौँडा र घोराही उपमहानगरपालिकामा दाबी पेश गरेको थियो । बैठकमा सहभागि नेता देव गुरुङले साबिकको नेतृत्त्व नछोड्ने र संगठन र शक्तिको आधारमा दाबी पेस गर्ने पाँचदलीय गठबन्धनको मोडालिटीअनुरुप दाबी पेस गरिको बताए । 'तल्लो तहबाट प्राप्त प्रतिवेदनमा छलफल भएको छ । आज सबै दलले आ-आफ्नो दाबी पेस गर्ने काम भयो,' गुरुङले भने ।

यता जनता समाजवादी पार्टीले भने वीरगंज महानगरपालिका आफूलाई दिनुपर्ने माग बैठकमा राखेको छ । 'गठबन्धनले नै बनाएको मोडालिटीमा पहिले जितेको स्थान सम्बन्धित दललाई नै दिने भन्ने छ । वीरगंज हाम्रो पकड क्षेत्र भएकाले त्यहाँ छोड्न नसक्ने भनेका छौँ,' नेता अशोक राईले भने । जसपाले वीरगंजबाहेक नेपालगंज, कलैया र जनकपुर उपमहानगरपालिकामा दाबी पेस गरेको छ ।

आफ्नो विद्रोहको अवमूल्यन नगर्न एकीकृत समाजवादीको चेतावनी

सत्ता गठबन्धनमा रहेका दलहरूले नेकपा एकीकृत समाजवादीले स्थानीय चुनावमा बढी दाबी गरेको भन्दै टिप्पणी गरेपछि त्यसप्रति पार्टीले असन्तुष्टि व्यक्त गरेको छ । सार्वजनिक रूपमै एकीकृत समाजवादीका अध्यक्ष माधवकुमार नेपालले आफूहरूको विद्रोहलाई अवमूल्‍यन नगर्न दिएको चेतावनी गठबन्धन बैठकमा समेत प्रवेश गरेको छ । शनिबार आयोजित कार्यक्रममा नेता नेपालले भनेका थिए, 'केपी ओलीलाई सत्ताको सगरमाथाबाट भुईंमा पछार्ने शक्ति हामी नै हौँ । केही साथीहरूले हाम्रो अपमान गरिरहनुभएको छ उहाँहरूलाई हाम्रो शक्तिबारे भ्रम नहोस् ।'

आइतबार समितिको बैठकमा एकीकृत समाजवादीका महासचिव वेदुराम भुसालले पनि आफूहरूको विद्रोहको अवमूल्यन नगर्न गठबन्धनका अन्य दललाई भनेका छन् । दोस्रो जनआन्दोलनपछि पुन:स्थापित प्रतिनिधिसभाको दृष्टान्त दिँदै बैठकमा उनले भनेका छन्, 'त्यसबेला माओवादी पनि चुनाव लडेर आएको शक्ति थिएन । विद्रोही शक्ति भएको नाताले विद्रोहको सम्मान गर्दै ८३ सिट दिइएको थियो । हाम्रो विद्रोहलाई पनि कम आकलन नगरियोस्,' उनले बैठकमा भनेका थिए ।

विगतको स्थानीय तह चुनावमा एमालेले ७ सय ५३ मध्ये ४० प्रतिशत स्थानमा विजयी हासिल गरेकाले त्यसको ५० प्रतिशत हिस्सा आफूले पाउनुपर्ने अडान एकीकृत समाजवादीले राखेको छ । 'एमालेले जितेका स्थानमा हाम्रो हक स्वभाविक छ । २०७४ मा एमाले विजयी स्थानमध्ये हाम्रो शक्ति ५० प्रतिशत हो,' भुसालले बैठकमा दाबी गरेका थिए ।

एमालेले २ सय ९८ स्थानीय तहमा जीत हासिल गरेको थियो । त्यसमध्ये १ सय ४९ तहमा आफ्नो दाबी स्वाभाविक हुने एकीकृत समाजवादीको तर्क छ ।

आइतबारको बैठकमा राष्ट्रिय जनमोर्चाले बागलुङ, प्युठान, अर्घखाँची, दाङ, बारा र रौतहटमा आफ्नो उपस्थितिबारे जानकारी गराएको नेता हिमलाल पुरीले बताए । सोमबार शीर्ष नेताको बैठकमार्फत महानगरपालिका र उपमहानगरपालिकामा तालेमलको निर्णय गर्ने तयारी सत्ता गठबन्धनको छ ।

आइतबारको बैठकमा दलहरूले आआफ्नो दाबी पेस गरेपछि कांग्रेस भने दबाबमा छ । कांग्रेसभित्रै चितवनको भरतपुर महानगरपालिका र कास्कीको पोखरा महानगरपालिका नछाड्न भनिरहेका छन् भने गठबन्धनका सहयात्री दलले यी दुवै महानगरपालिका मागिरहेका छन् । चिवतनका कांग्रेस नेता कार्यकर्ताहरूले लगातार केन्द्रीय नेतृत्त्वलाई खरबदारी मात्र गरेका छैनन् स्वतन्त्र लड्ने चेतावनीसहित राजीनामा अभियान नै चलाइरहेका छन् ।

प्रकाशित मिति: आइतबार, वैशाख ४, २०७९ २०:१४