कांग्रेसमा विकल्प : भरतपुरसहित तालमेल नहुने स्थानमा मित्रवत् प्रतिस्पर्धा

कांग्रेसमा विकल्प : भरतपुरसहित तालमेल नहुने स्थानमा मित्रवत् प्रतिस्पर्धा

A+ A A-

केन्द्रबाट गरिएको तालमेल निर्णयको प्रतिवाद जिल्ला जिल्ला हुन थालेपछि नेपाली कांग्रेस स्थानीय भावनाअनुसार गठबन्धनमा जाने निष्कर्षमा पुगेको छ । २९ चैतमा गठबन्धनका तर्फबाट तयार भएको मोडालिटीमा सहकार्य गर्न नसकिने भन्दै विभिन्न जिल्लाका स्थानीय तहमा अवज्ञाका शृंखला सुरु भएपछि कांग्रेसले स्थानीय समितिकै भावनाअनुसार अघि बढ्ने निष्कर्ष निकालेको हो । गठबन्धन हुन नसक्ने स्थानमा पाँच दलबीच नै मित्रवत् प्रतिस्पर्धामा जानुपर्ने सुझाव बैठकमा नेताहरूले दिएका छन् ।

शनिबार सानेपामा बसेको कार्य सम्पादन समितिको बैठकले महानगरपालिका र उपमहानगरपालिकाबाहेकमा केन्द्रीय समितिको निर्णयअनुरुप स्थानीय भावनालाई प्राथामिकता दिनुपर्ने मत अधिकांश सदस्यहरूले राखेका हुन् ।

बैठकमा बोल्दै महामन्त्री विश्वप्रकाश शर्माले भरतपुर जस्ता स्थानमा मित्रवत प्रतिस्पर्धामा जानुपर्ने विकल्प सुझाएका छन् । 'भरतपुरमा कांग्रेसले पनि छोड्ने अवस्था छैन । माओवादी केन्द्रले पनि नछोड्ने बताइरहेको छ । स्थानीय भावना र स्थानीय आवश्यकताले भन्छ भरतपुरको मेयर कांग्रेसले पाउनुपर्छ । तालमेल भए तालमेलबाट नभएर मित्रवत् प्रतिस्पर्धा जिन्दावाद ।'

यस्तै प्रवक्ता प्रकाशशरण महतले गठबन्धन सम्भव नहुने स्थानमा पाँच दलबीच मित्रवत् प्रतिस्पर्धा गर्ने निष्कर्षमा कांग्रेस पुगेको बताए । 'स्थानीय भावनाविपरीत गठबन्धनका लागि बाध्य पारिनेछैन । एक्लै जित्न सकिने प्रतिवेदन आउनुलाई सकरात्मक रुपमा लिएका छौँ । गठबन्धन नहुने स्थानमा मित्रवत् प्रतिस्पर्धा गर्छौँ,' उनले भने ।

स्थानीय भावनालाई नजरअन्दाज गरेमा पार्टीमा अन्तरघात बढ्ने र फेरि धक्का पुग्ने भएकाले स्थानीय सिफारिसलाई प्राथामिकता दिनुपर्ने सुझाव अधिकांश सदस्यले राखेको समिति सदस्य रमेश रिजालले बताए । 'स्थानीय कमिटीले गठबन्धन चाहेमा पाँच दलसँग सहकार्य गरेर अघि बढ्ने उनीहरूले नचाहेको अवस्थामा मैत्रीपूर्ण प्रतिस्पर्धा गर्न कांग्रेस तयार हुनुपर्ने मत मलगायत साथीहरूले राखेका छौँ,' रिजालले भने ।

महानगर र उपमहानगरबाहेकमा केन्द्रले जबरजस्ती गर्न नहुने सुझाव सदस्यले नेतृत्त्वलाई दिएका छन् । 'जबरजस्ती गरे हामी फेरि अन्तरघातको शिकार हुनुपर्छ । त्यसैले जिल्ला समितिको सिफारिसअनुसार नै अघि बढौँ भन्ने अधिकांशको मत छ,' रिजालले भने ।

बैठकमा नेता महेन्द्र यादवले स्थानीय तहमा एमालेले जितेको स्थानमा दोस्रो शक्तिले स्थान पाउनुपर्ने मत राखेका थिए । 'हामी एमालेसँग प्रतिस्पर्धा गर्दैछौँ । आफूले जितेको स्थान आफैँलाई राख्ने र एमालेले जितेको स्थानमा दोस्रो दललाई उम्मेदवार बनाउनुपर्छ,' उनले बैठकमा भनेका थिए ।

यस्तै नेता यादवले गठबन्धन बचाउने जिम्मेवारी कांग्रेसकै रहेकाले अन्य दललाई धोका दिन नहुने प्रस्ताव राखेका थिए । 'गठबन्धन मुलुकको राजनीतिक आवश्यकताले बनेको हो । यसलाई जोगाउने जिम्मेवारी कांग्रेसकै भएकाले हामीले धोका दिन हुँदैन,' उनले भनेका थिए ।

यस्तै नेता एनपी साउदले पनि गठबन्धनलाई तार्किक निष्कर्षमा पुर्‍याउनुपर्ने मत बैठकमा राखेका छन् । केन्द्रीय समिति बैठकले नै गठबन्धनको पक्षमा निर्णय गरेको र पाँच दलले सहकार्यको खाका तयार गरेको हुनाले त्यसको प्रभावकारी कार्यान्वयन सम्भव बनाउनुपर्ने उनको सुझाव थियो । 'गठबन्धनको निर्णयलाई तार्किक रूपमा तल्लो तहसम्म कार्यान्वयनमा लानुपर्छ । यो हाम्रो जिम्मेवारी हो भन्ने सुझाव मैले राखेँ,' उनले भने ।

बैठकमा देउवाको रुलिङ : गठबन्धनको विरुद्धमा नबोलौँ

बैठकमा सभापति शेरबहादुर देउवाले पाँचदलीय गठबन्धनको विरुद्धमा नबोल्न निर्देशन दिएका छन् । १४ औँ महाधिवेशन र केन्द्रीय समितिको राजनीतिक लाइनअनुसार बनेको गठबन्धनविरुद्धमा नबोल्न उनले निर्देशन दिएका हुन् ।

गठबन्धनका दलहरूबीच विश्वास कायम गरेर अघि बढ्नुपर्ने उनको सुझाव थियो । 'यही गठबन्धनको सहयोगमा मैले सरकारको नेतृत्त्व गरेको हुँ । केन्द्रीय समितिले पनि गठबन्धनकै पक्षमा निर्णय गरेको हो । त्यसैले पाँच दलबीच अविश्वास पैदा हुने कुरा नगरौँ,' देउवाको निर्देशन थियो ।

गठबन्धनमा रहेका दललाई आफूले धोका नदिने कुरा देउवाले दोहोर्‍याएका थिए । स्थानीय कमिटी र पाँच दलको मोडालिटीको भावनाअनुसार व्यवहारिक रूपमा तालमेलाई सफल बनाउने देउवाको भनाइ थियो ।

प्रकाशित मिति: शनिबार, वैशाख ३, २०७९ २०:१८