तालमेलबारे गुजुल्टिँदै गठबन्धनको गाँठो, केन्द्रकाे आदेश जिल्ला जिल्लामा अवज्ञा

तालमेलबारे गुजुल्टिँदै गठबन्धनको गाँठो, केन्द्रकाे आदेश जिल्ला जिल्लामा अवज्ञा

A+ A A-

चुनावी तालमेलको मोडालिटी तयार गरेर तल्लो कमिटीलाई उम्मेदवार सिफारिस गर्न निर्देशन जारी गरे पनि सत्ता गठबन्धनमा किचलो बढ्दै गएको छ । केन्द्रमा गठबन्धनका दलबीच तालमेल हुने निर्णय भए पनि स्थानीय तहबाट एकपछि अर्को अवज्ञाका निर्णय आउन थालेका छन् । स्थानीय तहको निर्णयपछि शीर्ष नेताहरू नै सबै स्थानमा तालेमेल सम्भव नरहेको बताउन थालेका छन् । यता एकीकृत समाजवादीको मागदाबीप्रति गठबन्धनका दलभित्रै असन्तुष्टि व्यक्त हुन थालिसकेको छ ।

तालमेलको मोडालिटी संयुक्त रूपमा तयार गरेर आफ्नो प्रस्तावमा गठबन्धनलाई गोलबद्ध गराएका माओवादी केन्द्रका अध्यक्ष पुष्‍पकमल दाहाल प्रचण्ड र कांग्रेस महामन्त्री गगन थापाले नै सबै स्थानमा तालमेल सम्भव नरहेको बताएका छन् । माओवादी केन्द्रका अध्यक्ष प्रचण्डले शुक्रबार पूर्व स्थायी कमिटी सदस्यहरूसँगको छलफलमा सबै तहमा तालमेल हुन्छ भनेर निर्धक्क हुने अवस्था नरहेको ब्रिफिङ गरे । 'सबै ठाउँमा गठबन्धन दलसँग मात्रै तालमेल हुन्छ भन्ने छैन । कतिपय ठाउँमा एक्लै लड्न सकिन्छ । कतिपय ठाउँमा अन्य दलसँग पनि हुन सक्छ,' उनले भनेका छन् ।

केन्द्रमा तयार भएको मोडालिटी अवज्ञाको चेतावनी बढ्न थालेपछि कांग्रेसले याे अनुशासनभित्रको विषय पर्ने भन्दै उल्लंघन गरे कारबाहीको चेतावनी समेत दिएको छ । कांग्रेसका चुनावी कमाण्डर तथा उपसभापति पूर्णबहादुर खड्काले तल्लो तहमा गठबन्धनको मर्मविपरीत मत बढिरहेकाले पार्टीको निर्णय कार्यान्वयनका निम्ति स्थानी चुनाव अनगुमन तथा परिचालन समिति प्रतिबद्ध रहेको बताएका छन् ।

यो निर्णय अवज्ञा भए अनुशासन अन्तर्गत कारबाही गर्ने निर्णय पनि उनको समितिले गरिसकेको छ । तालमेल कठिन देखेका खड्का भन्छन्, 'तल्लो कमिटीबाट भएका निर्णय सकारात्मक छैनन् । तर पार्टीको निर्णय कार्यान्वयन गराउनु मुख्य कुरा हो । गठबन्धनका लागि पार्टीले गरेको निर्णय अनुशासनको घेरामा पर्दछ । निर्णय कार्यान्वयन गर्ने जिम्मेवारी सभापतिदेखि सबै निकायका साथीहरूका सवालमा पनि लागू हुन्छ।'

उपसभापतिले यसो भनिरहँदा महामन्त्री थापा तालमेलबारे केन्द्रले लाद्न नमिल्ने मत राख्छन् । शनिबार आयोजित कार्यक्रममा उनले भनेका छन्, 'पार्टीको निर्णयबारे कोही अलमलिनु पर्दैन । स्थानीय तहको साथीहरूले तालमेल गर्ने निर्णय गर्न पनि पाउनु हुन्छ नगर्ने निर्णय गर्न पनि पाउनुहुन्छ । कसैले लाद्न पाउँदैन ।'

यता एकीकृत समाजवादीले स्थानीय तह बढी दाबी गरेको भन्दै माओवादी केन्द्रका अध्यक्ष प्रचण्ड र जनता समाजवादी पार्टीका अध्यक्ष उपेन्द्र यादवले असन्तुष्टि व्यक्त गरिसकेका छन् । गठबन्धनको मोडालिटीमा एकीकृत समाजवादीलाई विशेष ग्राह्यता दिने शब्दमै अध्यक्ष माधव नेपालले आपत्ति जनाएका थिए । त्यसपछि त्यस शब्द सच्चिएर मोडालिटी बनेको थियो । 'सरकार र गठबन्धन निर्माणमा हाम्रो भूमिका भूलेर दया देखाउन खोजियो । हामीले दया खोजेका होइनौँ सम्मानजनक हैसियत खोजेका हौँ,' २९ चैतमा गठबन्धनको बैठकमा अध्यक्ष नेपालले भनेका थिए ।

एकीकृत समाजवादीले आफ्नो जनप्रतिनिधि रहेका स्थानमा नछोड्ने र एमाले विजयी भएका स्थानमा ५० प्रतिशत दाबी गर्ने भनेको छ । यस निर्णयलाई प्रचण्डले औकातभन्दा बढी भनेका छन् भने यादवले हैसियतभन्दा ज्यादा खोजेको टिप्पणी गरेका छन् । प्रचण्डले २ वैशाखको बैठकमा भनेका छन्,'माधवजीको पार्टीसँग पनि तालमेल कठिन बन्दै छ । उहाँको पार्टीले औकातभन्दा बढी मागिरहेको छ।'

एकीकृत समाजवादीको दाबीबारे यादव भन्छन्, 'उहाँहरूले आफ्नो मूल्यांकन ज्यादा नै गर्नुभएको छ । त्यस पार्टीको दाबी अस्वभाविक र हैसियतभन्दा बढी छ ।'

एकीकृत समाजवादी भने आफ्नो दाबी स्वभाविक ठान्छ । महासचिव बेदुराम भुसाल भन्छन्, 'हामी एमालेबाट विभाजन भएर गठन भएका शक्ति हौँ । एमाले विजयी भएकाे स्थानमा हाम्रो ५० प्रतिशत दाबीलाई अस्वभाविक भनेर हाम्रो अवमूल्यन गर्न कसैले मिल्दैन । हामी हाम्रो दाबीलाई प्रमाणित गर्नेछौँ,' उनले भने ।

केन्द्रको आदेश जिल्ला- जिल्लामा अवज्ञा

केन्द्रबाट गठबन्धनमा रहेका दलबीच तालमेलको निर्णय भए पनि जिल्ला-जिल्ला अवज्ञा हुने क्रम बढेको छ । रोल्पा र रुकुममा माओवादी केन्द्रले गठबन्धन नगर्ने संकेत गरेका छन् । एकीकृत समाजवादी र कांग्रेसले धेरै भाग खोजेको उनीहरूको मत छ । डोल्पाको कांग्रेस जिल्ला समितिले पनि एक्लै लड्ने जानकारी केन्द्रमा पठाएको छ । कैलालीमा जनता समाजवादी पार्टीले गठबन्धनबाट अलग्गिएर लोसपासहितका अन्य चार दलसँग गठबन्धन गर्ने निर्णय गरिसकेको छ । बाँकेमा पनि छुट्टै लड्ने जसपाको संकेत छ ।

यता चितवनमा सबै वडामा कांग्रेसले छुट्टै वडाध्यक्ष उठाउने निर्णय गरिसकेको छ । गाेर्खामा २०७४ को स्थानीय तह चुनावमा ९४ वडा मध्ये ४५ वटा वडा कांग्रेसले जिते पनि माओवादीले ५० प्रतिशत दाबी गरेपछि गठबन्धन गर्न नसकिने जानकारी कांग्रेसको गोर्खा जिल्ला समितिले केन्द्रलाई जानकारी गराएको छ ।

गोर्खाका ११ वटा स्थानीय तहमध्ये २ वटामा माओवादी र ९ वटामा कांग्रेस विजयी भएको थियो । सिन्धुलीको सुनकोशी गाउँपालिकामा माओवादीसँग गठबन्धन नगर्ने निर्णय कांग्रेसले गरेको छ । यता पर्सामा पनि ३० चैतको बैठकले १४ वटै स्थानीय तहमा कांग्रेस एक्लै प्रतिस्पर्धामा जाने निर्णय गरेको अवस्था छ ।

यता संखुवासभामा कांग्रेससँग गठबन्धन गर्न नसकिने निर्णय माओवादी केन्द्रको जिल्ला कमिटीले गरेको छ । मोरङस्थिति विराटनगर महानगरपालिका आफूले नपाए गठबन्धनमा सहभागी नहुने जसपाको संकेत छ ।

विभिन्न जिल्लामा देखिएका विमतिलाई माओवादी केन्द्रका अध्यक्ष प्रचण्डले स्वभाविक मानेका छन् । प्रकट भएका असहमतिलाई आइतबारसम्म समाधान गरिसक्ने उनको जिकिर छ । 'विभिन्न तहमा देखिएका विमतिहरू स्वभाविक छन् । तीनिहरूलाई आइतबारसम्म टुंगोमा पुर्‍याइनेछ,' प्रचण्डले भने,'भरतपुरसहित सबै स्थानीय तहमा तालमेलको छिनोफानो आइतबारसम्म आरामले टुंग्याउनेछौँ ।' विमति देखिए पनि केन्द्रको निर्णय कार्यान्वयनमा कुनै समस्या नआउने दाबी प्रचण्डको छ ।

प्रकाशित मिति: शनिबार, वैशाख ३, २०७९ १३:४३