गुट्खा उद्योगले मात्र सुपारी आयात गर्न पाउने !

A+ A A-

उद्योग, वाणिज्य तथा आपूर्तिमन्त्री दिलेन्द्रप्रसाद बडुले सुपारी आयातलाई व्यवस्थित गर्नका लागि सरकारले कच्चा पदार्थ आवश्यक उद्योगलाई नै आयात गर्न दिने नीति लिएको दाबी गरेका छन् ।

शुक्रबार प्रतिनिधिसभाको उद्योग तथा वाणिज्य र श्रम तथा उपभोक्ता हित समितिले सरोकारवालासँग गरेको छलफलमा बोल्दै उद्योगमन्त्री बडुले केही व्यापारीहरूलाई सुपारी आयातमा अनुमति दिँदा समस्या आएकाले आयातलाई व्यवस्थित गर्नका लागि सरकारले कच्चा पदार्थ आवश्यक उद्योगलाई नै आयात गर्न दिने नीति लिएको बताए ।

मन्त्री बडुले अघिल्लो सरकारले परिणामलाई समेत खाल नगरी केही व्यापारीहरूलाई सुपारी आयात गर्न दिएकाले अहिले समस्या आएको आरोप लगाए । उनले विगतमा केही व्यापारीले सुपारी आयात गर्ने तर, नेपालमा केही प्रतिशत देखाउने र बाँकी परिणाम अन्य देशमा निर्यात गर्नाले सुपारी आयातमा समस्या रहेको बताए ।

सुपारी गुट्खा उद्योगहरूलाई चाहिने भएकाले त्यही उद्योगीहरूलाई आयात गर्न दिँदा समस्या समाधान हुने भएकाले सरकारले लिएको नीति सही रहेको मन्त्री बडुको तर्क थियो । उनले सुपारी आयात गर्न नदिएर उद्योगहरूलाई बन्द गर्नुभन्दा पनि कच्चा पदार्थको आपूर्तिलाई सहज बनाएर आयातलाई व्यवस्थित गर्न उद्योगहरूको मागका आधारमा सरकार सुपारी आयात गर्न दिन तयार रहेको बताए । मन्त्री बडुले सुपारी आयात गर्दा व्यापारीहरूको मागको आधारमा सानादेखि ठूला उद्योगले पाउनुपर्ने भएकाले सुपारी आयात रोक्ने उद्देश्य नभएको बताए ।

त्यस्तै बैठकमा नेपाली कांग्रेसका सांसद प्रकाश स्नेहीले सरकारले उद्योगीबाहेकलाई सुपारी आयात गर्न अनुमति दिए स्वीकार नहुने चेतावनी दिए । विगतका सरकारले कुनै एक व्यापारीलाई सुपारीको आयात अनुमति दिँदा उनीहरूले नेपालमा १० देखि १५ प्रतिशत मात्रै राख्ने र बाँकी अन्य देशमा सप्लाई गर्ने गरेको बताए ।

सांसद स्नेहीले सरकारले नेपालमा सुपारी कति खपत हुन्छ ? अध्ययन गरेर डाटा राख्नुपर्ने बताए । उनले देशभरका सबै पान तथा सुर्ती पसलहरूलाई एक रुपैयाँ लगाएर भए पनि करको दायरामा ल्याउन सरकारसँग माग गरे । उनले अहिले नेपालमा आयात भएर आएको सुपारी गुणस्तरहीन रहेकाले सरकारले अनुगमन गर्ने निकाय खडा गर्नुपर्ने आवश्यक्ता औंल्याए ।

बैठकमा देउती गुट्खा उद्योगका निर्देशक टपबहादुर शाहीले सरकारले उद्योगहरूको खपत क्षमताको आधारमा सुपारी आयात गर्न दिनु पर्ने माग राखे । उनले अहिले सरकारले २५ हजार मेट्रिक टन सुपारी आयात गर्न अनुमति दिएकाले गुट्खा उद्योगमा २५ हजार मेट्रिकटन सुपारी खपत नहुने दाबी गरे ।

निर्देशक शाहीले नेपालमा सुपारी सहज रुपमा नपाउँदा चोर बाटोबाट भारतीय गुट्खा नेपालमा भित्रिरहेको बताए । उनले नेपालका गुट्खा उद्योगमा ८० प्रतिशत कच्चा पदार्थ सुपारी नै खपत हुने गरेको जानकारी दिए । नेपालका गुट्खा उद्योगहरूले मात्रै वार्षिक २ अर्बभन्दा बढी राज्यलाई राजस्वमा योगदान गर्ने गरेको बताए ।

प्रकाशित मिति: शुक्रबार, वैशाख २, २०७९ १८:५८