'१५औँ दरबारमार्ग सडक महोत्सव'को सम्पूर्ण तयारी पूरा

A+ A A-

नेपाली नयाँ वर्ष २०७९ को अवसरमा ३ वैशाख शनिबारका दिन काठमाडौंको दरबारमार्गमा आयोजना हुन लागेको १५औँ दरबारमार्ग सडक महोत्सवको सम्पूर्ण तयारी पूरा भएको छ । उक्त महोत्सव आयोजनाका लागि सम्पूर्ण तयारी पूरा भएको नेपाल उद्योग वाणिज्य महासंघले एक विज्ञप्ति जारी गर्दै जानकारी गराएको हो ।

कोभिड–१९ ले थलिएको लघु, घरेलु, साना तथा मझौला उद्यम एवं पर्यटन उद्योगको पुनरुत्थानका लागि सहकार्यः ‘स्थानीय उत्पादन तथा आन्तरिक पर्यटन प्रवर्द्धन’ भन्ने मूल नारासहित उक्त 'दरबारमार्ग सडक महोत्सव' आयोजना हुन लागेको हो ।

महोत्सव नेपाल उद्योग वाणिज्य महासंघ, महासंघको सदस्य रेष्टुरेन्ट एण्ड बार एसोसिएसन नेपाल (रेबान) र दरबारमार्ग विकास बोर्डले एनसेलसँग महासंघको विशेष सहकार्य र मुख्य प्रायोजनमा यो महोत्सव आयोजना हुन लागेको हो । आन्तरिक पर्यटनलाई प्रवर्द्धन गरी देशको पर्यटन विकासमा टेवा पुर्‍याउने र नेपाली उत्पादन, नेपाली परिकार र नेपाली संस्कृतिको प्रवर्द्धन गर्ने महोत्सवको मूल उद्देश्य रहेको छ ।

सातै प्रदेशको संस्कृति झल्कने विभिन्न जातजातिका कला संस्कृतिहरूको प्रस्तुतिका साथ महोत्सवको औपचारिक शुुभारम्भ शनिबार बिहान ११ः४५ बजे हुनेछ । गीतसंगीतका साथै विभिन्न मनोरञ्जनात्मक प्रस्तुतिहरू र महोत्सव आयोजनास्थलमा विविध रमाइला गतिविधिहरूसहित यो महोत्सव बेलुका ८ः१५ बजेसम्म आयोजना गरिनेछ ।

चर्चित गायकगायिका, कलाकार तथा सांगीतिक समूहहरूको प्रस्तुति, विभिन्न नेपाली खानाका परिकारहरू र स्वदेशी उत्पादनहरूको विशेष प्रदर्शन÷प्रस्तुतिका स्टलहरू, बालबालिकाका लागि छुट्टै किड्स जोन महोत्सवको विशेष आकर्षणहरू हुन् ।

महोत्सवमा दीपक वज्राचार्य, कबवेब, समृद्धि राई विथ ब्यान्ड, सुवानी मोक्तान, शास्त्रीय सांगीतिक समूह सुरसुधालगायत अन्य कलाकार तथा समूहहरू जस्तैः एभरेस्ट क्रु, महेश काफ्ले र भेकले आ–आफ्ना प्रस्तुतिहरू दिनेछन् । साथै, मोटिभेसनल स्पिकर र ब्लाइन्ड रक्स संस्थाकी सृष्टि केसी र कमेडियन भरतमणि पौडेल एण्ड सुमन कोइरालाका प्रस्तुतिहरू रहनेछन् ।

महोत्सवमा शारीरिक रुपमा भिन्न क्षमता भएका उद्यमीहरूले उत्पादन गरेका हस्तकलाका वस्तुहरू पनि प्रदर्शनीमा राखिनेछन् । त्यसैगरी, महोत्सवमा महिला उद्यमीसहित हस्तकला उद्यमीहरूबाट उत्पादित वस्तुहरूका उत्पादन पनि प्रदर्शनीमा रहनेछन् । महोत्सव स्थलमा ६० वटा स्टल रहनेछन् ।

दरवारमार्गको दक्षिण क्षेत्रको महेन्द्र सालिकसम्म र उत्तरतर्पm नारायणहिटी संग्रहालयको गेटको ट्राफिक पोलसम्मको क्षेत्रमा महोत्सव सञ्चालन हुनेछ । साथै, सातै प्रदेशबाट विभिन्न जातजातिका सांस्कृतिक नृत्यहरू दरबारमार्गआसपासका सडकमा प्रस्तुति गरिनेछ ।

विश्वभरि महामारीको रुपमा फैलिएको कोभिडबाट शिथिल भएको व्यापार व्यवसायमा अति प्रभावित क्षेत्रमा साना मझौला उद्यम तथा पर्यटन उद्योग छ । हाल ९० प्रतिशतभन्दा बढी जनसंख्याले कोभिडविरुद्धको खोप लगाइसकेको र जनजीवन सामान्य हुँदै गएको अवस्थामा आर्थिक क्रियाकलापलाई महोत्सवले जागरुक बनाउने विश्वास गरिएको छ ।

महोत्सवको सह–प्रायोजकमा गोरखा व्रुअरी र रोयलस्ट्याग रहेका छन् । महोत्सवको बैंकिङ पार्टनरमा एनआईसी एशिया बैंक, इन्स्योरेन्स पार्टनरमा नेसनल लाइफ इन्स्योरेन्स, वेभरेज पार्टनरमा डावर नेपाल, अन्य सहयोगी पाटर्नरहरूमा नेपाल पर्यटन बोर्ड, काठमाडौं महानगरपालिका, मनकामना केबलकार, केएफसी, पिजा हट, फोन पे, एन्डिज आइसक्रिम र नेपाल डेरी रहेका छन् ।

प्रकाशित मिति: बिहीबार, वैशाख १, २०७९ १९:२१