एमालेलाई पोखराको मेयर–उपमेयर सिफारिस गर्न सकस, भोलि मतदान

A+ A A-

कास्कीको पोखरा महानगरपालिकाको मेयर सिफारिस गर्न नेकपा एमालेलाई सकस परेको छ । आन्तरिक उम्मेदवारी दिएका बीच सहमतिको प्रयास भए पनि सार्थक नभएपछि शुक्रबार मतदान हुने भएको छ ।

पार्टी महानगर कमिटीले बिहीबार साँझ निर्वाचन कार्यतालिका सार्वजनिक गरेको छ । शुक्रबार मध्यान्ह १२ बजे मतदान जिल्ला पार्टी कार्यालयमा हुने भएको हो ।

मेयरमा ११ जना र उपमेयरमा १२ जनाले उम्मेदवारी दिएका थिए । सर्वसम्मत हुन नसकेपछि मतदानबाट ३–३ जनाको नाम केन्द्रीय कमिटीमा सिफारिस हुनेछ ।

मेयरमा दर्शन लामा, पुष्पज्योति ढुङ्गाना, पुष्पराज अधिकारी, दीपक पौडेल, बालकृष्ण काउछा मगर, सावित्री भण्डारी, मिनाकुमारी गुरुङ, रश्मी आचार्य, प्राडा विश्वकल्याण पराजुली, कृष्णबहादुर थापा र राजीव पहारीले मंगलबार आन्तरिक उम्मेदवारी दिएका थिए ।

मेयरका दाबेदार कृष्णबहादुर थापा र राजीव पहारी गण्डकी प्रदेशसभा सदस्य हुन् । उनीहरू मेयरको उम्मेदवार बन्नुपर्ने अवस्थामा प्रदेशसभा सदस्यबाट राजीनामा दिनुपर्ने हुन्छ । दाबेदार पुष्पज्योति ढुङ्गाना हाइड्रो सञ्चालक र पुष्पराज अधिकारी रिसोर्ट सञ्चालक हुन् । लामा पोखरा १३ का वडाध्यक्ष हुन् ।

उपमेयरमा सुष्मा पौडेल, शोभामोहन पौडेल, बामदेव ढुङ्गाना, टीकाराम पंगेनी, तेजनारायण अधिकारी, सञ्जीवबहादुर कोइराला, देवका पहारी त्रिपाठी, जीवनप्रसाद आचार्य, बलराम गायक गन्धर्व, हरिमाया गुरुङ र बैनबहादुर अधिकारी क्षेत्रीले दाबी गरेका छन् ।

आकांक्षीमध्ये मेयर र उपमेयरमा एक जना महिलासहित तीन जनाको नाम सिफारिस हुनेछ । मतदाताले दुई जना पुरुष उम्मेद्वार र एक जना महिला उम्मेद्वारलाई मत हाल्नुपर्ने छ । पोखरा महानगर कमिटी पदाधिकारी र सदस्य गरी १ सय १० जनालाई मताधिकार हुनेछ ।