गठबन्धनको चेपुवामा लोसपाः महन्थ ठाकुर एमाले कि कांग्रेस गठबन्धनमा ?

A+ A A-

महन्थ ठाकुर नेतृत्वको लोकतान्त्रिक समाजवादी पार्टी (लोसपा) आउने स्थानीय तहको चुनावमा पेलाइमा पर्ने संकेत देखिन थालेको छ । सत्तारुढ दलहरूको एउटा गठबन्धन बन्ने र एमालेले केही साना दलसहितको अर्को खेमाबाट चुनावमा भाग लिने परिस्थिति निर्माण हुँदा लोसपा भने दुवै समूहसँगको सम्बन्धमा देखिएको छैन ।

सरकारमा सहभागी हुने र चुनावी तालमेल पनि गर्ने गरी कांग्रेस सभापति शेरबहादुर देउवासँग लोसपाका अध्यक्ष महन्थ ठाकुर, नेता राजेन्द्र महतोले केही छलफल पनि गरेका थिए । सहकार्यकै विषयमा कम्तीमा चारपटक छलफल भएको बताइएको छ । तर, कांग्रेससँगको छलफलले ठोस आकार नलिएपछि मौन अवस्थामा देखिएको लोसपाले एमालेसँग पनि छलफल गरेको छैन ।

विभाजनको चोटमा परेको लोसपाका निर्वाचित जनप्रतिनिधिमध्ये केहीले दल छोडेका छन् । संघीय समाजवादी फोरमसँगको एकतापछि विभाजन हुँदा पुराना निर्वाचित जनप्रतिनिधिमध्ये सात जना जसपातिरै बसेका छन् । त्यसमाथि पनि रणनीतिक महत्व राख्ने र मुख्य नगरपालिकाका मेयरहरूले ठाकुर र महतोको साथ छोडेका छन् ।

जनकपुर उपमहानरपालिका मेयर लालकिशोर साह पहिला ठाकुरनिकट भए पनि अहिले उपेन्द्र यादव नेतृत्वको जसपामा छन् । राजविराज नगरपालिकाका मेयर शम्भुप्रसाद यादवले पनि ठाकुरलाई छोडेका छन् । राजविराज क्षेत्रमा प्रदेशसभा सदस्य मनिष सुमनले पनि ठाकुर र महतोलाई साथ नदिएपछि मेयर पनि उपेन्द्र यादवतिर लागेका हुन् ।

प्रदेशसभा सदस्य र पालिका प्रमुखहरूमध्ये केहीले पार्टी छोडेको अवस्थामा त्यसै पनि लोसपा कमजोर भएको छ । त्यसबाहेक गठबन्धन बनेर अन्य दलहरू आउँदा लोसपाका लागि थप खतरा भन्ने देखिएको छ । यो खतरा रहेको केन्द्रीय कार्यकारिणी सदस्य केशव झा अस्वीकार गर्दैनन् ।

तर, पनि गठबन्धन हुनसक्ने झाको विश्लेषण छ । लोसपाको प्रतिस्पर्धी दल जसपा सत्ता गठबन्धनमा भएका कारण लोसपा सत्ता गठबन्धनमा अटाउने सम्भावना कम रहेको विश्लेषण भइरहेको छ । जसपाले लोसपालाई गठबन्धनमा आउन नदिने अनुमान गरिन्छ । त्यसैले अन्तिममा लोसपाले एमालेसँग सहकार्य गर्ने सम्भावना रहेको पनि विश्लेषण भइरहेको छ ।

नेता झा भने गठबन्धनका लागि अहिल नै परिस्थिति ठोस भइनसकेको बताउँछन् । झाले भने ‘हामी अहिले पनि प्रतिस्पर्धी नै छौँ, बाहिर चर्चा गरिएजस्तो कमजोर छैनौँ । यद्यपि, गठबन्धन बन्ने अवस्थामा हामी कुन खेमा लाग्छौँ भन्ने अलिपछि थाहा होला ।’

अहिले पनि लोसपाले कम्तीमा ४० वटा पालिका जित्ने झाको दाबी छ । गत निर्वाचनमा २५ वटा पालिका जितेको लोसपाले सातवटा पालिका प्रमुख गुमाइसकेको छ । अहिले लोसपासँग १८ पालिका प्रमुख रहेको झाले बताए ।

प्रकाशित मिति: बिहीबार, वैशाख १, २०७९ १७:५९