राजनीतिक दललाई निर्वाचन आयोगले भन्यो– चुनावमा संशय हुने अभिव्यक्ति नदिनुहोस्

राजनीतिक दललाई निर्वाचन आयोगले भन्यो– चुनावमा संशय हुने अभिव्यक्ति नदिनुहोस्

A+ A A-

निर्वाचन आयोग नेपालले स्थानीय तहको चुनावका सम्बन्धमा संशय व्यक्त गर्ने अभिव्यक्तिहरू नदिन राजनीतिक दलका नेता एवं कार्यकर्ताहरूलाई आग्रह गरेको छ ।

बिहीबार आयोगको नियमित पत्रकार सम्मेलनमा बोल्दै आयोगका प्रवक्ता शालिग्राम शर्मा पौडेलले निर्धारित समयमै स्थानीय तहको चुनाव गर्न तयारीहरू तीव्रताका साथ अन्तिम चरणमा पुगेको अवस्थामा संशय व्यक्त गर्ने अभिव्यक्तिहरूप्रति आयोगको ध्यानाकर्षण भएको बताए ।

उनले आगामी स्थानीय तह चुनावका लागि आवश्यक १ करोड ९४ लाख थान मतपत्रमध्ये बिहीबारसम्म ३९ जिल्लाको ७० लाख ३३ हजार थान मतपत्र छपाइ सम्पन्न भएको जानकारी दिए । हाल दैनिक ८ लाख थान मतपत्र छपाइ भइरहेको उनले बताए ।

प्रवक्ता पौडेलले थानीय तह निर्वाचन २०७९ को पर्वेक्षण गर्न चाहने राष्ट्रिय संस्थाका लागि १५ दिनको समय दिई पर्वेक्षण अनुमतिका लागि गत चैत्र १३ सूचना प्रकाशित गरी आवेदन माग गरिएकोमा सो अवधिभित्र ६५ वटा संस्थाबाट विद्युतीय माध्यमबाट निवेदन प्राप्त भएको बताए ।

उक्त निवेदनउपर जाँचबुझ गरी यथाशीघ्र आयोगले पर्यवेक्षण अनुमति सम्बन्धित निर्णय गर्ने उनले बताए । उनले निर्वाचन आयोगले स्थानीय तह चुनावसम्बन्धी सम्पूर्ण गतिविधि र सूचनाको सहज रूपमा जानकारी दिन बिहीवारबाट हरेक दिन स्थानीय तह निर्वाचन ई–बुलेटिन प्रकाशन सुरु गर्ने बताए । बुलेटिन आयोगको वेबसाइटमा उपलब्ध हुने पनि उने बताए ।

प्रवक्ता पौडेलले स्थानीय तह चुनावमा खटिने मुख्य निर्वाचन अधिकृत तथा निर्वाचन अधिकृत र निर्वाचन कार्यालयका प्रमुखका लागि निर्वाचन सञ्चालन तथा व्यवस्थापन प्रादेशिक प्रशिक्षण विराटनगर, धुलिखेल, पोखरा र नेपालगञ्जमा सम्पन्न भएको र जनकपुर, हेटौँडा, बुटवल र धनगढीमा शुक्रबार हुने बताए ।

प्रशिक्षणपछि सोही स्थानबाट निर्वाचन अधिकृतहरूलाई नियुक्ति पत्र र आवश्यक सामग्री उपलब्ध गराइने पनि उनले बताए ।

प्रकाशित मिति: बिहीबार, वैशाख १, २०७९ १७:१०