लैनसिंह वाङ्देलदेखि आरएन जोशीसम्मका कला प्रदर्शनी हुँदै

A+ A A-

‘रिभिजिटिङ द रुट्स इन अ मोडर्न नुआन्स’ शीर्षकमा १४ वैशाखदेखि एक महिनासम्म कला प्रदर्शनी हुने भएको छ । विकल्प आर्ट सेन्टरको प्रस्तुतिको रूपमा सरोज महतोले क्युरेट गरेको प्रदर्शनी १४ वैशाखबाट सुरु हुन लागेको हो ।

६० को दशकदेखि हालसम्म नेपालमा चलिआएको कलाका विभिन्न शैलीमा आधारित रहेका चित्रकला देखाइने प्रदर्शनी काठमाडौं उपत्यकाका पाँच ठाउँमा हुँदैछ । क्युरेटर महतोका अनुसार आधुनिक समयमा विगतको कलालाई अवलोन गर्ने उद्देश्यसहित उत्पत्ति र विविधताका साथै आधुनिक सन्दर्भसँग कलालाई जोडिनेछ ।

प्रदर्शनीमा विभिन्न विधामा ४५ जना कलाकारहरूको चित्रकला, मूर्तिकला, प्रिन्टमेकिङ र फोटोग्रापीजस्ता सिर्जनाहरूलाई राखिने महतोले बताए ।

सँगै प्रदर्शनीमा इन्स्टलेसन, भिडियो प्रोजेक्सन, साउण्ड र लाइट इन्स्टलेसनजस्ता फरकफरक किसिमका कला प्रदर्शनीहरू १० जना कलाकारले प्रस्तुत गर्नेछन् । तीन साता चल्ने प्रदर्शनीमा पाँच जना पर्फर्मेन्स आर्टिस्ट तथा समूहले आफ्नो प्रस्तुति दिनेछन् ।

प्रदर्शनीका क्रममा ६० को दशकदेखि ९० को दशकसम्म नेपाली चित्रकलामा योगदान दिएका कलाकारहरूको चित्रकला प्रदर्शनी हुनेछ । दिग्गज कलाकार स्व. लैनसिंह वाङ्देल, स्व.आरएन जोशी र स्व. इन्द्र प्रधानसँगै अग्रज कलाकार शशिविक्रम शाह, वत्सगोपाल वैद्य, वीरेन्द्रप्रताप सिंहलगायतका कलाकारको चित्रकलालाई पनि प्रदर्शनीमा राखिने क्युरेटर महतो बताउँछन् ।

१४ वैशाखबाट सुरु हुने प्रदर्शनी आगामी एक महिनासम्म चल्ने महतो बताउँछन् । प्रदर्शनीमा चित्रकला, सांगीतिक प्रस्तुति, इन्स्टलेसन, कविता वाचनलगायतका कार्यक्रमसँगै समसायमिक कलाकारिताको विषयमा पनि विमर्शका कार्यक्रमहरू राखिएको छ ।

२०१३ मा स्थापना भएको ‘विकल्प आर्ट सेन्टर’ले करिब एक दशकयता नेपाली कलाक्षेत्रमा काम गर्दै आएको छ ।

प्रकाशित मिति: बिहीबार, वैशाख १, २०७९ १५:४६