सभापति भेटेपछि कास्कीका कांग्रेस नेता ढुक्कः पोखराको मेयर पाइँदैन

A+ A A-

देशका ६ महानगरमध्ये कास्कीको पोखरा महानगरपालिकाको मेयरमा गठबन्धनमा सहभागी नेकपा (एकीकृत समाजवादी)ले दाबी गरेको छ । तर, कास्कीका कांग्रेस नेता सानो दललाई टिकट दिन नहुने पक्षमा छन् । यही कुरा सुनाउन ३५ जनाको टोली सभापति शेरबहादुर देउवालाई भेट्न मंगलबार काठमाडौँ पुगेको थियो ।

कास्कीका कांग्रेस नेतालाई देउवाको प्रश्न- अरु दल एकतिर लागे हाम्रो हालत के हुन्छ ?

सभापति देउवासँग बुधबार भेट भएपछि भने नेताहरु कांग्रेसले मेयरको टिकट नपाउनेमा लगभग ढुक्क देखिन्छन् । सभापति देउवाले भेटमा कांग्रेसले मेयर पाउँछ भनेर भन्न सकेनन् । उनले गठबन्धनमा छलफल गरेर महानगरको टिकट पक्का गर्ने प्रतिक्रिया दिएका छन् ।

सभापति देउवा गठबन्धन भत्कियोस् भन्ने पक्षमा छैनन् । यो कुरा आफूलाई भेट्न पोखराबाट गएका नेतालाई पनि देउवाले स्पष्ट भनेका छन् । गठबन्धनलाई यथावत राख्न पनि देउवा पोखरा समाजवादीलाई छोड्न लचिलो हुने पक्का छ । यही कारण कास्कीका कांग्रेस नेताहरु दोधारमा परेका छन् । ‘कांग्रेसले मेयर नपाउने आशंका छ । नेताहरुमा गठबन्धन दलको माग नमानेर गठबन्धनमा हुनसक्ने जोखिम लिन चाहेको देखिँदैन,’ नेता यज्ञबहादुर थापाले शिलापत्रसँग भने ।

सभापतिसँगको भेटपछि कास्कीका कांग्रेस नेताहरु मुख्यतः दुई कुरामा चिन्तित छन् ।

पहिलो, कांग्रेसबाहेक अरु दलले मेयर पाउँदा नेकपा एमालेले जित्ने सम्भावना बलियो रहन्छ ।

दोस्रो, नयाँ मतदातालाई अरु दलको चिह्नमा भोट हाल्न लगाउँदा दीर्घकालीन असर पर्छ ।

मेयरमा कांग्रेस र माओवादीको गठबन्धन हुँदा पनि एमालेले २०७४ सालको चुनाव जितेको थियो । उपमेयरमा एक्लै लड्दा पनि एमालेले नै जित्यो । सभापति देउवा यही नतिजालाई देखाएर गठबन्धन नै गरेर चुनाव लड्नुपर्ने बताएका छन् । तर, पहिलोपटक चुनावमा सहभागी हुन लागेको समाजवादीलाई टिकट दिएमा एमालेलाई सजिलो हुने विश्लेषण कांग्रेस नेताको छ ।

पोखरा महानगपालिकामा २०७४ सालकोभन्दा ३९ हजार ६४५ मतदाता नयाँ थपिएका छन् । पोखरामा २०७९ सालको चुनावमा मतदाता संख्या २ लाख ७ हजार ७१२ छ । २०७४ सालमा १ लाख ६८ हजार ६७ मतदाता थिए ।

नयाँ मतदातालाई एकपटक अरु चिह्नमा भोट हाल्न लगाउँदा पछिका चुनावमा पनि कांग्रेसलाई असर पर्ने चिन्ता कास्कीका कांग्रेस नेतामा छ । गठबन्धनमा भागबण्डा मिलाउँदा पोखराको मेयर कांग्रेसले नपाए ‘रुख चिन्ह’ लिएर अरु दलका उम्मेद्वार चुनावमा जानुपर्ने नेता थापाको तर्क छ । ‘हामीले नयाँ ३९ हजार मतदातालाई कलम, हँसिया–हतौडामा भोट हाल्न भनिरहँदा कतिले मान्छन् त्यो कुरा नेताले बुझिदिनु पर्छ,’ पूर्व कानुनमन्त्री थापाले भने, ‘रुखमा भोट हाल्न भनियो भने त्यसमा समस्या भएन । हामी चुनावमा प्रचारमा हिँड्दा हाम्रो होइन अर्को चिह्नमा भोट हालौँ भन्दा कठिन हुन्छ ।’

कांग्रेसकै अरु शीर्ष नेता पनि गठबन्धनका दलमध्ये पोखरा आफूले पाउनेमा विश्वस्त छैनन् । कास्कीबाट गएको टोलीले सभापति देउवासहित उपसभापति पूर्णबहादुर खड्का र धनराज गुरुङ, महामन्त्री गगन थापा, नेता शशांक कोइरालालगायत नेतालाई भेटेको छ । ‘तपाइँहरुको कुरा जायज छ । म सभापतिलाई यो कुरा आफ्नोतर्फबाट राख्छु,’ शशांकले मुस्कुराउँदै जवाफ दिए ।

गठबन्धन भएकाले एक्लै निर्णय गरेर जाने अवस्थामा सभापति देउवा छैनन् । नेकपा (एकीकृत समाजवादी)ले अडान राखेकाले पोखरामा उक्त पार्टीका कास्की जिल्ला अध्यक्ष धनराज आचार्य मेयरका दाबेदार छन् । कांग्रेसले सानो पार्टीलाई टिकट दिन नहुने बताइरहँदा आचार्य भने एमालेले जितेको ठाउँ भएकाले मुख्य हकदार आफूहरु भएको बताउँछन् । ‘एमालेको मत तानेर नै यो निर्वाचन जित्न सकिन्छ,’ हालै भएको एउटा कार्यक्रममा आचार्यको दाबी थियो, ‘एमालेका धेरै साथीको मत हामी लिन सक्छौँ । कतिपय साथी बोल्न सक्नुहुन्न । तर, हामी दाबी गर्छौँ त्यहाँ ठूलो अंश छ जसलाई हामीले ल्याउन सक्छौँ ।’

धनराजको योजना : वर्ग छुट्याएर कार्ड, दुई वर्षमा गरिबीमुक्त पोखरा

अन्य पार्टीले टिकट पाएमा पनि कांग्रेसले सहयोग गर्ने पूर्वमन्त्री थापाको भनाइ छ । उनले भरतपुर महानगरजस्तो सांगठनिक विद्रोह पोखरामा नहुने दाबी गरेका छन् । चितवनको भरतपुर महानगरपालिकामा माओवादीले मेयर पाउने पक्का भएसँगै कांग्रेसका सबै वडा सभापतिहरुले विद्रोहको चेतावनी दिएका छन् ।

प्रकाशित मिति: बुधबार, चैत ३०, २०७८ २१:५९