जनमोर्चाले बुटवल पुगेर सार्वजनिक गर्‍यो घोषणापत्र, यस्ता छन् प्राथमिकता

A+ A A-

सत्ता गठबन्धनको एक घटक राष्ट्रिय जनमोर्चाले आफ्नो चुनावी घोषणापत्र सार्वजनिक गरेको छ । बुटवलमा बुधबार जनमोर्चाले आफ्नो २८ बुँदे चुनावी घोषणापत्र सार्वजनिक गरेको हो ।

वैशाख ३० हुने चुनावमा जनमोर्चा ‘गणतन्त्र तथा राष्ट्रियताको रक्षा गरी संघीयता खारेज गरौं !’ भन्ने मुल नाराका साथ चुनावमा होमिने भएको हो ।

‘विद्यमान व्यवस्था अन्तर्गत हुने निर्वाचनलाई संसारभरिका क्रान्तिकारी कम्युनिस्टहरूले कार्यनीतिक रूपमा लिने गर्दछन् । रणनीतिक रूपले चुनावको उपयोग वा बहिस्कार गर्नुलाई गलत ठान्दछन् । सङ्घर्ष, सङ्गठन, विश्व कम्युनिस्ट आन्दोलन वर्तमान अवस्था, देशको राजनीतिक अवस्था लगायतका पक्षहरूलाई ध्यान दिएर निर्वाचनसम्बन्धी नीति निर्धारण गर्नुपर्ने हुन्छ’, जनमोर्चाले भनेको छ ।

घोषणापत्रमा तय गरिएका प्राथमिकता

पाँचदलीय गठबन्धनमा रहेको राष्ट्रिय जनमोर्चाका उमेदवारहरूले २८ प्रकारका विकासका कामहरूलाई प्राथमिकता राख्ने उल्लेख गरेको छ ।

घोषणापत्रमा विकेन्द्रीयता र सन्तुलित विकास नीतिमा जोड दिने, स्थानीय तहमा बढ्दो बेरूजु न्यूनीकरण गर्दै स्वशासनमा जोड दिइने उल्लेख छ । एकीकृत वस्ती विकास, भूउपयोग नीति, गाउँ विकासका लागि ग्रामिण विकास मन्त्रालय गठन, छाडा चौपाया नियन्त्रण गर्नेलगायतका विषय घोषणापत्रमा उल्लेख छन् ।

विपद व्यवस्थापन गर्न स्थानीय तहलाई अधिकार तथा साधान स्रोत सम्पन्न बनाइने, भ्रष्टाचारको रोकथाम, कृषि र कृषिजन्य उद्योगको विकासका लागि प्रयत्न गरिने प्रतिवद्धता जनमोर्चाले गरेको छ ।

स्वदेशी उत्पादनलाई संरक्षण गर्ने, विदेशी आयातमाथि नियन्त्रण, शिक्षा र स्वास्थ्यमा आम सर्वसाधारणको पहुँच पुर्‍याउन सामाजिक विकास क्षेत्रतर्फ अधिकतम बजेट विनियोजन गर्ने, प्राकृतिक श्रोत साधनको समुचित उपयोगमा ध्यान दिइने घोषणापत्रमा उल्लेख छ ।

यस्तै दक्ष जनशक्ति निर्माण र बेरोजगारीको अन्त्यका लागि योजना तर्जुमा गर्ने, यातायात र ढुवानीका लागि रेल तथा सडक सञ्जालको निर्माण र विकासमा जोड दिइने, ग्रामीण उद्योगधन्दाको स्थापना गर्ने प्रतिबद्धता गरेको छ ।

संक्रामक रोगका विरूद्व भौतिक पूर्वाधार तथा जनशक्ति निर्माण, खेत मजदुर, हली, गोठाला, खेताला, मुक्त कमैया, हरूवा चरूवा तथा कम्मलरीहरूको बसोबासको व्यवस्था र पुनःस्थापना गर्नेलगायतका विषय घोषणापत्रमा उल्लेख गरिएको महासचिव मनोज भट्टले जानकारी दिए ।

प्रकाशित मिति: बुधबार, चैत ३०, २०७८ १७:४७