मुस्ताङमा बढ्यो चुनावी सरगर्मी, दलभन्दा स्वतन्त्र उम्मेदवार बलिया

A+ A A-

हिमाली जिल्ला मुस्ताङमा पनि चुनावी सरगर्मी बढ्न थालेको छ । मुस्ताङका पाँचवटा गाउँपालिकामध्ये जोमसोम क्षेत्रमा बढी चुनाव लागेको छ । चीनसँग सीमा जोडिएको लोमान्थाङ, दामोरकुण्ड क्षेत्रमा भने अहिलेसम्म आंकाक्षीहरू देखिएका छैनन् ।

यी क्षेत्रमा स्वतन्त्र उम्मेदवार नै बलियो हुने भएकाले अहिले नै उम्मेदवारका आकांक्षी नदेखिएको राजनीतिक दलका नेताहरू बताउँछन् । मुस्ताङमा गठबन्धनका लागि कांग्रेस, माओवादी केन्द्र, एकीकृत समाजवादीबीच सामान्य छलफल भए पनि खासै प्रगति भने भएको छैन । माओवादी र समाजवादीको भोट नै धेरै नभएकाले उनीहरू पालिकामा प्रमुख र वडाध्यक्ष समेत दाबी गर्न सक्ने अवस्थामा छैनन् । त्यसैले मुस्ताङमा कांग्रेस, एमाले र स्वतन्त्र उम्मेदवारबीच नै प्रतिस्पर्धा हुने देखिन्छ ।

चीनसँग सीमा जोडिएको मुस्ताङको लोमान्थाङ गाउँपालिकामा चुनावी सरगर्मी बढेको छ । कांग्रेस, एमालेलगायतका दलका नेताहरू उम्मेदवारको खोजीमा लागेका छन् । अहिलेसम्म दुवै दलले उम्मेदवारको टुंगो भने लगाएका छैनन् ।

गत निर्वाचनमा पालिका प्रमुखमा कांग्रेसका सुवर्णकुमार विष्टले जितेका थिए । लोमान्थाङ गाउँपालिकामा एमालेले उम्मेदवार नै बनाएका थिए । त्यतिबेला इन्द्रधारा विष्ट स्वतन्त्र उम्मेदवार थिए । स्वतन्त्र उम्मेदवार इन्द्रधारा विष्टले ४ सय ९५ मत ल्याउँदा सुवर्ण विष्टले ६ सय ३ मत ल्याएर विजयी भएका थिए ।

स्वतन्त्र उम्मेदवार विष्ट पालिकामा पराजित भएपछि एमाले प्रवेश गरेर प्रदेशसभा सदस्यको टिकट लिएका थिए । वाम गठबन्धनबाट प्रदेशसभा सदस्यका लागि उम्मेदवार भएका विष्ट निर्वाचित भएका थिए । मुस्ताङका एमाले नेताहरूका अनुसार अहिले पनि लोमान्थाङ गाउँपालिकामा एमालेले उम्मेदवार भेटिसकेको छैन ।

कांग्रेसले विष्टलाई नदोहोर्‍याउने बताइरहेको भए पनि उसले पनि नयाँ उम्मेदवार भने भेटेको छैन । कांग्रेस जिल्ला सभापति रोमी गौचन उम्मेदवार छनोटको अधिकार तल्ला कमिटीलाई दिएकाले उताबाट नाम आएपछि मात्रै थप भन्न सकिने बताउँछन् ।

यता लो-घेकर दामोदरकुण्ड गाउँपालिका भने एमालेले जितेको थियो । अहिले पनि एमाले र कांग्रेसका उम्मेदवारबीच नै प्रतिस्पर्धा देखिएको छ । माओवादी केन्द्र र एकीकृत समाजवादीको उपस्थिति पातलो भएकाले उनीहरूले प्रमुख पदमा दाबी गरेका छैनन् ।

एमालेले गत चुनावमा निर्वाचित लोप्साङ छोपेल विष्टलाई नै दोहोर्‍याउने सम्भावना छ । उनी स्वतन्त्रबाट उम्मेदवार भई पछि एमाले प्रवेश गरेका हुन् । खासमा यो पालिकामा पनि एमालेका उम्मेदवार भने कमजोर थिए ।

घरपझोङ गाउँपालिकामा भने एमाले र कांग्रेसबीच प्रतिस्पर्धा हुनेछ । सदरमुकाम जोमसोमसमेत रहेको यो पालिकामा एमालेबाट निर्वाचित आस बहादुर थकाली जिल्ला अध्यक्ष चयन भएपछि पालिका प्रमुखमा नयाँ उम्मेदवार खोजिँदैछ ।

उपप्रमुख शर्मिला गुरुङ, कुलबहादुर थकाली, महेन्द्र थकाली र दीपक लालचनको दाबी छ । कांग्रेसबाट पनि अहिलेसम्म मुख खोलिसकेका छैनन् । जिल्ला सभापति थकाली तल्ला कमिटीबाट सिफारिस भएर आएपछि मात्रै नाम तय हुने बताउँछन् ।

वारागुङ मुक्तिक्षेत्र गाउँपालिका र थापाङ गाउँपालिकाभित्र सामान्य छलफल भए पनि उम्मेदवारहरू खोजी नै भएको छैन । एमाले नेतृ श्रीमाया थकाली र कांग्रेस जिल्ला सभापति रोमी गौचन दुवैले आकांक्षीहरूको नाम खासमा धेरै नआएको पनि बताए ।

मुस्ताङमा व्यक्ति नै प्रभावशाली हुने भएकाले पकड भएका व्यक्तिलाई पार्टीले उम्मेदवार बनाउने भएका कारण पनि अहिले आकांक्षी नदेखिएका हुन् ।

प्रकाशित मिति: बुधबार, चैत ३०, २०७८ १७:५३