सत्ता गठबन्धनले एमाले विजयी भएको स्थानमा मतभारको आधारमा भागबन्डा गर्ने मापदण्ड बनाएको छ । मंगलबार बालुवाटारमा बसेको बैठकले २०७४ को स्थानीय चुनावमा विजयी दलललाई सम्बन्धित तह छोड्ने र बाँकी तहमा मतभारको आधारमा भागबन्डा गर्ने निर्णय भएको नेताहरूले बताएका छन् ।
कांग्रेस नेता कृष्णप्रसाद सिटौलाले यही मापदण्डका आधारमा दलीय शक्तिको प्रतिवेदन र उम्मेदवार केन्द्रमा पठाउने समय थप भएको बताए । 'बैठकले उम्मेदवारको टुंगो लगाउन ४ वैशाखसम्म स्थानीय तहका कमिटीलाई समय दिएको छ । एमालेले जितेका स्थानमा मतभारका आधारमा सिट बाँड्ने र साबिकको विजेता दललाई सम्बन्धित स्थानीय तह छोड्ने सहमति भएको छ,' सिटौलाले भने ।
सत्ता गठबन्धनले महानगर र उपमहानगरपालिकामा केन्द्रबाटै उम्मेदवार सिफारिस गर्ने निर्णय गरेको छ । यस्तै नगरपालिका र गाउँपालिकाका प्रमुख र उपप्रमुखहरूको विषयमा जिल्ला संयन्त्रले प्रदेशलाई ३ गतेभित्र प्रतिवेदन बुझाउन बैठकले निर्देशन दिएको सरकारका प्रवक्ता एवं सूचना तथा सञ्चार प्रविधिमन्त्री ज्ञानेन्द्रबहादुर कार्कीले बताए ।
यस्तै महानगर, नगर तथा गाउँपालिकाका वडाध्यक्षको हकमा पनि ३ गतेभित्र उम्मेद्वार टुंगो लगाउन संयन्त्रलाई निर्देशन दिइएको छ । स्थानीय संयन्त्रमा प्रत्येका दलबाट दुई/दुई जना प्रतिनिधि बनाइने कार्कीले बताए । 'प्रत्येक दलबाट दुई-दुई जना प्रतिनिधि रहनेछन् । संयन्त्रको संयोजक कांग्रेस हुनेछ,' कार्कीले भने ।
यस्तो छ तामेलको मापदण्ड
सत्ता गठबन्धनले एमालेबाट विभाजन भएर गठन भएको एकीकृत समाजवादीलाई हाल त्यस दलले नेतृत्व गरेको स्थानीय तह छोड्ने निर्णय गरेको छ । अन्य दलको हकमा पनि २०७४ को स्थानीय तहमा विजयी स्थान सम्बन्धित दलले नै लिने सहमति भएको माओवादी केन्द्रका नेता देव गुरुङले बताए ।
'साबिकको विजयी स्थान सम्बन्धित दलले नै लिने र अन्य स्थानमा विभिन्न आधारमा तालमेल गर्ने सहमति भएको छ,' उनले भने ।
तालमेल गर्दा एमालेले जितेका स्थानमा सत्ता गठबन्धनका दलको मतभार, सम्बन्धित तहमा दलका प्रमुख र उपप्रमुखले पाएको मतलाई समेत ध्यान दिने निर्णय पाँच दलले गरेका छन् । यस्तै पहिलोपटक स्थानीय चुनावमा भाग लिन लागेका दललाई समेत गठबन्धनमा सहभागी गराउने निर्णय उनीहरूले गरेका छन् । यस्तै बैठकले पाँचदलबीच मात्रै तालमेल गर्न पाउने निर्णय गरेको छ ।
सत्ता गठबन्धनले यसअघि ३० चैतभित्र उम्मेदवारको नामावली पठाउन संयन्त्रलाई निर्देशन दिएको थियो । मंगलबार बसेको बैठकले शक्तिको आँकलनसहित उम्मेदवारको नामावली पठाउने समयावधि थप गरेको हो ।
प्रकाशित मिति: मंगलबार, चैत २९, २०७८ २१:०४
-1743579183-1743604118.jpg)
