रावलको स्पष्टीकरण- भरतपुरको मुख्य निर्वाचन अधिकृतबाट हटाइदिन मैले नै आग्रह गरेको हुँ

रावलको स्पष्टीकरण- भरतपुरको मुख्य निर्वाचन अधिकृतबाट हटाइदिन मैले नै आग्रह गरेको हुँ

A+ A A-

निर्वाचन आयोगले चितवनको भरतपुर महानगरपालिकाको मुख्य निर्वाचन अधिकृत परिवर्तन गरेको विषयमा विभिन्न टिकाटिप्पणी हुँदा न्यायाधीश हेमन्त रावलले प्रष्टीकरण दिएका छन् ।

निर्वाचनको निष्पक्षतामा शंका नगर्न उनको आग्रह छ । भरतपुर महानगरपालिकाका मुख्य निर्वाचन अधिकृत जिल्ला न्यायाधीश रावललाई हटाएर अर्का न्यायाधीश प्रकाशकुमार अधिकारीलाई प्रमुख निर्वाचन अधिकृत तोकिएको थियो । सोही विषयमा विभिन्न टिकाटिप्पणी भएपछि रावलले प्रष्टीकरण दिएका हुन् ।

गत २६ चैतदेखि रिँगटा लाग्ने र बान्ता हुने समस्याले दुई दिनको अस्पताल बसाईपछि हाल घरमा आराम गरिरहेको उनले जनाएका छन् । अझै बेडरेष्ट गर्नुपर्ने भएकाले जिम्मेवारी नलिन स्वयंले आग्रह गरेको उनको भनाइ छ ।

‘स्वास्थ्य अवस्थामा तत्काल पूर्ण सुधार आइनसकेको अवस्थामा थप केही दिन घरमै आराम गर्नुपर्ने भन्ने चिकित्सकको सल्लाह बमोजिम म अहिले घरमै आराम गरिरहेको छु,’ रावलको प्रष्टीकरणमा भनिएको छ, ‘मेरो यो असहज अवस्थामा मैले निर्वाचन आयोगमा गरेको अनुरोधबमोजिम नै आयोगबाट हिजो चितवनको मुख्य निर्वाचन अधिकृतको जिम्मेवारी हेरफेर गरी न्याय परिषद्बाट पहिले नै सिफारिस गरिएका न्यायाधीशको सूचीमा रहेका चितवन जिल्ला अदालतका अर्का सहकर्मी माननीय न्यायाधीश नै मुख्य निर्वाचन अधिकृतको जिम्मेवारीमा तोकिएको अवस्था हो ।’

उनले निर्वाचनको निष्पक्षतामाथि आशंका नगर्न पनि आग्रह गरेका छन् । ‘मेरो शारीरिक अस्वस्थताको कारण उत्पन्न हुन गएको यो परिस्थितिलाई सोही रूपमा बुझिदिनु हुन र निर्वाचनको निष्पक्षतामा असर पर्ने गरी आयोग र अन्य कुनै राजनीतिक दलप्रति कुनै किसिमको टिकाटिप्पणी नगरिदिनुहुन म सबैमा हार्दिक अनुरोध गर्दछु,’ रावलको अपिल छ ।