पहिला जितेका पालिका आफैँ राख्ने, एमालेले जितेका पालिका भागवण्डा गर्न सहमति खोजिँदै

पहिला जितेका पालिका आफैँ राख्ने, एमालेले जितेका पालिका भागवण्डा गर्न सहमति खोजिँदै

A+ A A-

०७४ को स्थानीय तहको चुनावमा जुन दलले जुन पालिका जितेको थियो, त्यही पालिका पाउने गरी गठबन्धनका दलहरूबीच सहमति जुटाउने प्रयास भएको छ । आज साँझ बस्ने सत्ता गठबन्धनको बैठकले उक्त सहमति जुटाउने सम्भावना रहेको माओवादी केन्द्रका एक नेताले बताए ।

कांग्रेसले २ सय ६५ वटा पालिका जितेको थियो भने माओवादीले १०६ वटा पालिका जितेको थियो । जसपासँग अहिले ३३ वटा पालिका प्रमुख रहेका छन् । चुनावका बेलामा २६ पालिका जितेको तत्कालीन संघीय समाजवादी फोरममा अहिले अन्य दलका प्रमुख समेत समाहित हुँदा ३३ पालिका पुगेको हो ।

एमालेले जितेका २ सय ९५ वटा पालिका प्रमुखको हकमा भने एकीकृत समाजवादीलाई समेत भाग लगाएर कांग्रेस, माओवादी केन्द्र र जसपाले भागवण्डा गर्न लागेका हुन् । गठबन्धनमा रहेका दल जनमोर्चाका लागि बागलुङ, प्युठानलगायतका जिल्लामा पालिकामा सहयोग गर्ने अनौपचारिक सहमति भएको छ ।

दलहरूबीच केही महानगरपालिका र उपमहानगरपालिकामा दाबी गरिरहेका कारण सहमति भने भएको छैन । खासगरी, एकीकृत समाजवादीका लागि कुन-कुन पालिकाहरू दिने भन्नेमा सहमति जुटाउन सकस परेको देखिन्छ । एकीकृत समाजवादीले काठमाडौं र पोखरामध्ये एउटा महानगर दाबी गरिरहेको भए पनि पोखरा पाउने सम्भावना छ ।

उपमहानगरमा पनि इटहरी र हेटौँडामा एकीकृत समाजवादीको बलियो दाबी रहेको छ । इटहरीमा कांग्रेसको पनि दाबी रहेका कारण सहमति जुट्न सकेको छैन । विराटनगर महानगर र धरान उपमहानगरपालिका कांग्रेसले लिने हो भने इटहरी आफूले पाउनुपर्ने एकीकृत समाजवादीको दाबी छ ।

तुलनात्मक रूपमा इटहरीमा एकीकृत समाजवादीको बलियो उपस्थिति रहेको छ । एकीकृत समाजवादीका नेता तथा खेलकुद परिषद्का पूर्वसदस्यसचिव केशव विष्टले इटहरीको मेयरमा दाबी गरेका छन् । ११ वटा उपमहानगरमा कम्तीमा दुईवटा पाउनुपर्ने एकीकृत समाजवादीको दाबी छ ।

माओवादीले पनि कम्तीमा तीनवटा उपमहागर पाउनुपर्ने दाबी गरिरहेको छ भने मधेस प्रदेशको जनकपुर उपमहानगर जसपाले दाबी गरिरहेको छ । माओवादीले बाराको सिमरा-जितपुर उपमहागरमा दाबी गर्दा जसपाले कलैया उपमहानगरमा दाबी गरिरहेको छ ।

प्रकाशित मिति: मंगलबार, चैत २९, २०७८ १२:४९