स्थानीय चुनावलाई फर्केर हेर्दा: एक सय पालिकामा कांग्रेस-माओवादीको मत जोड्दा पनि एमाले नै बलियो

स्थानीय चुनावलाई फर्केर हेर्दा: एक सय पालिकामा कांग्रेस-माओवादीको मत जोड्दा पनि एमाले नै बलियो

A+ A A-

स्थानीय तहको चुनाव आउन ३१ दिन बाँकी छ । दलहरूले चुनावी अभियान सुरु गरिसकेका छन् । सँगसँगै उम्मेदवारको टुंगो लगाउने अन्तिम कसरतमा पनि छन् दलहरू ।

कांग्रेस, माओवादी केन्द्र, एकीकृत समजावादी, जनता समाजवादी पार्टी र जनमोर्चाबीच चुनावी गठबन्धन हुने निश्चित भइसकेको छ । सत्ता गठबन्धनमा आबद्ध दलहरू त्यसका लागि स्थानीय तह भागबण्डा मिलाउन छलफलमा जुटिरहेका छन् ।

यता प्रतिपक्षी एमाले पनि साना दलहरूसँग चुनावी तालमेलका लागि छलफलमा छ । सके आफ्नै उम्मेदवार उठाएर नत्र साना दललाई सहयोग गरेर पनि गठबन्धनका उम्मेदवार हराउने रणनीतिमा एमाले छ ।

अघिल्लो अंकमा एमालेका उम्मेदवारले जितेका तर कांग्रेस र माओवादीका उम्मेदवार दोस्रो र तेस्रो हुँदा बढी मत देखिएका पालिकाको सूची प्रस्तुत गरेका थियौं । यो अंकमा भने मत परिणाम अनुसार कांग्रेस-माओवादी र अन्य गठबन्धनका दललाई आएको मतगणना गर्दा पनि एमाले बलियो रहेका स्थानीय तहको सूची प्रस्तुत गर्दैछौँ ।

तर, यो अघिल्लो निर्वाचनमा दलहरूले पाएको मतपरिणामको विश्लेषण हो । हामीले हिसाब निकालेका सबै स्थानीय तहको प्रमुख वा अध्यक्षमा एमालेका प्रतिनिधिले जितेका छन् । तर, एमाले विभाजित अवस्थामा रहेकाले यो पटक नतिजामा केही फेरबदल हुने देखिएको छ । एकीकृत समाजवादीले एमालेको मत काट्दा त्यसकाे असर निर्वाचनको मतपरिणाममा भने देखिनेछ ।

अघिल्लो निर्वाचनमा देशभरका २ सय ९५ पालिकामा एमालेका उम्मेदवार विजयी भएका थिए । २९५ स्थानीय तहमा एमाले पहिलो हुँदा कांग्रेस र माओवादीका उम्मेदवार क्रमश: दोस्रो र तेस्रो दल बनेका थिए । कतिपय स्थानीय तहमा दुई दलका उम्मेदवारको मात्रै प्रतिस्पर्धा भएको छ भने कतिपय स्थानीय तहमा कांग्रेस र माओवादीमध्ये एउटा दोस्रो र तेस्रोमा अन्य पार्टी छन् ।

कांग्रेस-माओवादीका उम्मेदवार दोस्रो भएका २१० स्थानीय तहमध्ये ४८ वटा स्थानीय तहमा कांग्रेस र माओवादीको मत जोड्दा पनि एमाले नै बलियो देखिएको छ । यीमध्ये १५ वटा स्थानीय तहमा प्रमुख तीन दलबीच मात्रै प्रतिस्पर्धा थियो । २०७४ कै जनमत बचाउन सक्दा पनि यी पालिकामा एमाले बलियो देखिन्छ ।

हेर्नुस् सूची :

कांग्रेस र माओवादी क्रमश: दोस्रो र तेस्रो नभएका तर एमालेले जितेका अन्य ८५ स्थानीय तहमध्ये थप १५ वटा स्थानीय तहमा कांग्रेस र माओवादीलाई प्राप्त भएको मत मात्रै जोड्दा पनि एमालेको मत कम हुन्छ भने १७ वटा स्थानीय तहमा कांग्रेस र माओवादीमध्ये एउटा पार्टी दोस्रो भएको र जहाँ जसपा वा जनमोर्चाको मत जोडिँदा एमालेको भन्दा बढी हुन्छ । ८५ मध्ये ५३ वटा पालिकामा दुई पार्टीको मत जोड्दा पनि एमालेको मत बढी देखिन्छ । यो हिसाबले अन्य पार्टीहरू एक ठाउँ हुँदा पनि अघिल्लो निर्वाचनमा आएको मत जोगाउन सक्दा मात्रै एमाले बलियो देखिएको छ ।

यो पनि पढ्नुस् :

एमालेले जितेका यी १ सय ६१ पालिका जहाँ कांग्रेस-माओवादीकाे मत धेरै छ

प्रकाशित मिति: मंगलबार, चैत २९, २०७८ १३:५६