एमालेले जितेका यी १ सय ६१ पालिका जहाँ कांग्रेस-माओवादीकाे मत धेरै छ

A+ A A-

स्थानीय तहको चुनावका लागि राजीतिक दलहरू उम्मेदवार टुंग्याउने अन्तिम कसरतमा छन् । सत्ता गठबन्धनले साझा उम्मेदवार तय गर्ने निर्णय लिएकाे छ, तर भागबण्डाकाे टुंगाे लाग्न बाँकी छ । एमाले पनि अन्य साना दलहरूसँग तालेमल गर्न छलफलमा छ ।

अहिलेसम्म भएको छलफल र गरिएको निर्णयले सत्ता गठबन्धन अपवादबाहेकका जिल्लामा साझा उम्मेदवार तय गरेर चुनावी मैदानमा उत्रिने लगभग निश्चित छ । यहाँ हामीले अघिल्लो चुनावमा आएको मत विश्लेषण गर्न खाेजेका छाैँ ।

सुरुवातमा नै स्पष्ट गरौँ हरेक अध्यावधिक निर्वाचनमा मत प्याटन फरक हुन्छ । मत-मतान्तर बदलिन्छ नै । त्यसैले त अध्यावधिक निर्वाचन भनिएको हो । नेपालको इतिहास हेर्ने हो भने सत्तामा बसेको दललाई दोहोर्‍याएर उस्तै परिणाम निकाल्नु फलामको च्युरा चपाउनु जस्तै हुने गरेको छ । यसको अर्थ जनताको आकांक्षा अनुसारको काम नहुनु नै होला ।

हामीले शिलापत्र निर्वाचन विशेषको यो अंकका सत्ता गठबन्धनका अन्य दलको मत हिसाब नगरी मुख्य भनिएको कांग्रेस माओवादीको मत एक ठाउँमा जाँदा कति प्रभाव देखिन सक्छ भनेर लेखाजाेखा गरेका छाैँ । यो मात्रै अघिल्लो निर्वाचनसँग जोडिएको मत हो ।

यसमा दुईवटा कुरा लुकेका छन् । पहिलो कुरा हामीले हिसाब निकालेका सबै स्थानीय तहको प्रमुख वा अध्यक्षमा एमालेका प्रतिनिधिले जितेका छन् । यो समयमा स्मरणीय काम भएको भए जनताले थप मत दिएर सहज जित हाेला । अर्को पक्ष भनेकाे यतिबेला एमाले पार्टी विभाजन भएको छ । थोरै अंक पनि नेकपा एकीकृत समाजवादीले काट्दा त्यसकाे असर निर्वाचन नतिजामा पक्कै देखिनेछ ।

अघिल्लो निर्वाचनमा देशभरका २ सय ९५ पालिकामा एमालेका उम्मेदवार विजयी भएका थिए । यो ३९ प्रतिशत परिणाम हो । स्मरण रहोस् एमालेले यो अंक कतिपय जिल्ला र स्थानीय तहमा तत्कालीन समयमा कांग्रेस र माओवादी एक ठाउँमा हुँदा पनि निकालेको हो ।

अहिले हामीले भने तीनवटै पार्टीले आफ्ना उम्मेदवार उठाएको मात्रै नभइ प्रतिस्पर्धी वा क्रमश: पहिलो दोस्रो र तेस्रो मत लिएका पालिकाको मात्रै गणना गरेका छाैँ । एमालेले जितेका २ सय ९५ स्थानीय तहमध्ये २ सय ९ पालिकामा कांग्रेस र माओवादी दाेस्राे र तेस्राे बनेका थिए । जसमध्ये पनि १ सय ६९ पालिकामा कांग्रेस दाेस्राे भएकाे थियाे भने ४० वटा पालिकामा माओवादी दाेस्राे र कांग्रेस तेस्राे भएकाे पाइएकाे छ ।

यी मध्ये पनि ४८ वटा स्थानीय तहमा कांग्रेस र माओवादीले पाएको जम्मा मत भन्दा एमालेको भार बढी रहेको छ । २०७४ कै मतसँग विश्लेषण गर्दा फेरि पनि एमालेले सहज जित निकाल्न सक्ने देखिन्छ । यस विषयमा अर्को अंकमा चर्चमा गर्नेछौँ । तर १ सय ६१ स्थानीय तहमा भने एमालेको मत कांग्रेस माओवादीले प्राप्त गरेको जम्मा मत भन्दा कम छ ।

मत र मतान्तर त्यस क्षेत्रमा भएको मतदाताको संख्याको हिसाबले गरिए पनि एक सय स्थानीय तहमा एमाले भन्दा १ हजार भन्दा बढी मत कांग्रेस माओवादीका उम्मेदवारले पाएकाे देखिएकाे छ । ३१ स्थानीय तहमा तत्कालीन समयमा एमालेलाई आएको मत भन्दा कांग्रेस र माओवादीको चिह्नमा ५ हजार भन्दा बढी मत आएको छ । यसले कांग्रेस र माओवादी एक ठाउँमा उभिँदा एमालेलाई धक्का लाग्ने देखिन्छ । यद्पि स्थानीय निर्वाचनमा पार्टीकाे प्रतिनिधित्वकाे साथसाथै उम्मेदवारकाे व्यक्तित्वले पनि उत्तिकै प्रभाव पार्छ ।

एमाले पहिलो र कांग्रेस-माओवादी दोस्रो र तेस्रो भइ जाेडिएकाे मत र देखिएको मतान्तरसहितको सूची

प्रकाशित मिति: सोमबार, चैत २८, २०७८ ०९:३०