मकवानपुरका १९ मतदानस्थल अतिसंवेदनशील, हतियार बुझाउन प्रशासनकाे आग्रह

A+ A A-

जिल्ला सुरक्षा समिति, मकवानपुरले १९ वटा मतदानस्थललाई अतिसंवेदनशीलको सूचीमा राखेको छ ।आगामी ३० वैशाखमा हुने निवार्चन नजिकिएसँगै जिल्ला सुरक्षा समितिले मतदानस्थलको निरीक्षण गरिरहेको छ ।

निरीक्षणको क्रममा जिल्लाका १० स्थानीय तहमा रहेको १ सय ६५ वटा मतदानस्थलमध्ये १९ वटा अतिसंवेदनशील रहेको मकवानपुरका सहायक प्रमुख जिल्ला अधिकारी बद्रीनाथ गैह्रेले जानकारी दिए । जिल्लामा कुल १ सय ६५ वटा मतदानस्थल र ३ सय ५६ वटा मतदान केन्द्र कायम भएको छ ।

सुरक्षाका दृष्टिकोणले १९ वटा अतिसंवेदनशील, ६० वटा संवेदनशील र बाँकी ८६ वटा सामान्य रहेको सहायक गैह्रेले बताए । उनकाअनुसार विगतका निर्वाचनमा भएका घटना र तराईंसँग सीमानामा जोडिएका मतदानस्थललाई अतिसंवेदनशील मानिएको छ । संवेदनशील मतदानस्थलमा सुरक्षा व्यवस्था कडा बनाइने प्रशासनले जनाएको छ ।

३० वैशाखमा हुने स्थानीय तह निर्वाचनको एकीकृत सुरक्षा रणनीति तयार भएको छ । सोही अनुसार प्रमुख जिल्ला अधिकारी भतरमणि पाण्डेको नेतृत्वमा मतदानस्थलको निरीक्षण भइरहेको हो । जिल्लाभित्र स्थानीय तहको निर्वाचन भयरहित शान्तिपूर्ण र सौहार्दपूर्ण वातावरणमा सम्पन्न गर्न स्थानीय तह निर्वाचन विशेष सुरक्षा योजना कार्यान्वयनमा ल्याइएको प्रजिअ पाण्डेले बताए ।

विशेष सुरक्षा योजनाका आधारमा जिल्लाभित्रका करिब ४० प्रतिशत भन्दा बढी मतदानस्थल तथा मतदान केन्द्रहरूको निरीक्षण भइसकेको छ । प्रशासनले स्थानीय तहको निर्वाचनलाई सुरक्षित बनाउन इजाजतप्राप्त हातहतियार बुझाउन सूचना जारी गरिसकेकाे छ । हातहतियार चैत्र मसान्तभित्र नजिकको प्रहरी इकाइमा बुझाउन प्रशासनले निर्देशन दिएपछि हातहतियार बुझ्ने कार्य भइरहेको प्रजिअ पाण्डेले जानकारी दिए ।

साथै, जिल्लामा १ हजार ४ सय ७३ जना म्यादी प्रहरी छनाेट भइसकेको छ । सोमबारबाट जिल्ला प्रहरी कार्यालय, मकवानपुरले म्यादी प्रहरीलाई तालिम दिन सुरु गरेको छ । स्थानीय तहको निर्वाचनका समयमा जिल्लाभित्रका विभिन्न मतदानस्थल र मतदान केन्द्रमा खटिने कर्मचारीहरूको विवरण तयारीको कार्य समेत भइरहेको पाण्डेले बताए ।

प्रकाशित मिति: मंगलबार, चैत २९, २०७८ ०८:२३