क्यान इन्फोटेकको तयारी अन्तिम चरणमा

A+ A A-

वैशाख ७ देखि १२ सम्म काठमाडौंको भृकुटीमण्डपमा हुने २७औँ क्यान इन्फोटेक तयारी अन्तिम चरणमा पुगेको छ । सूचना तथा सञ्चार प्रविधि र मनोरञ्जनसम्बन्धी देशको यो प्रदर्शनी कोभिड– १९ का कारण दुई पटक स्थगित थियो । यो प्रदर्शनीले कोभिड–१९ का कारण प्रभावित भएका तथा नभएका सम्पूर्ण सूचना तथा सञ्चार प्रविधि व्यवसायी तथा सम्बन्धित पक्षहरूलाई राहत तथा सहयोग पुग्ने अपेक्षा क्यान महासंघले लिएको छ ।

क्यान इन्फोटेकको यो संस्करणमा विश्वव्यापी रूपमा सहभागिता हुन सक्ने गरी क्यान इन्फोटेक २०२२ डटकममार्फत भर्चुअल प्रदर्शनीसमेतको व्यवस्था हुनेछ । उक्त भर्चुअल प्रदर्शनीका निम्ति मण्डला सिस्टमले भर्चुअल एक्जिबिसन पार्टनरको रूपमा क्यान महासंघसँग सहकार्य गरेको छ ।

प्रदर्शनीमा रोबोटिक्स, इमर्जिङ टेक्नोलोजी, वाइफाइ तथा इन्टरनेटलगायतका कुराहरू रहनुका साथै व्यवसायीहरूले सफ्टवेयरहरू, नेटवर्किङ र क्लाउड सोलुसन, इलेक्ट्रिकल तथा इलेक्ट्रोनिक्स, सेक्युरिटी सोलुसन, सोलार पावर सिस्टम, इन्भर्टर, यूपीएस, ल्यापटप तथा डेस्कटप कम्प्युटर, प्रिन्टर, पावर सिस्टम सोलुसन, कम्प्युटर एक्सेसरिज, एन्टिभाइरस सफ्टवेयर, बैंकिङ सोलुसन, सीसीटीभी र हार्डडिस्कजस्ता उत्पादनहरू प्रदर्शनी तथा बिक्रीमा राखिनेछन् ।

त्यसैगरी, प्रदर्शनीमा आर्टिफिसियल इन्टेलिजेन्ससम्बन्धी जानकारी, आईटी कलेज, बैंक, बीमा तथा लेखासम्बन्धी सफ्टवेयर, सरकारीक्षेत्रमा प्रयोगमा आएका तथा आउने सफ्टवेयर र सोलुसन्स, सेल्फ लर्निङ सफ्टवेयर तथा ट्युटोरियल आदि पनि रहनेछन् ।

प्रदर्शनीमा टिकटक प्याभिलियन, अम्ब्रेला स्ट्रिट रहनुका साथै यो प्रदर्शनी सूचना प्रविधिसम्बन्धी चासो राख्नेहरूका लागि यस क्षेत्रमा भएका विकास तथा प्रयोगका बारेमा जानकारी लिने थलो पनि हुने महासघंको विश्वास छ ।

यस पटकको इन्फोटेक पेपरलेस एवं क्यासलेस प्रवेश टिकटको व्यवस्था गरिनेछ, जसमा प्रवेश शुल्क १ रुपैयाँ तोकिएको छ भने उक्त प्रवेश टिकटका आईएमईपेले व्यवस्थापन गर्नेछ ।

२७औँ क्यान इन्फोटेकको शीर्ष प्रायोजन आईएमईपेले गरेको छ भने सहप्रायोजक एससीटी स्मार्ट क्यूआर, युनियनपे रहेका छन् ।

इन्फोटकको प्लाटिनम प्रायोजक वर्ल्ड लिङ्क कम्युनिकेसन, डायमण्ड प्रायोजक डिस होम फाइबरनेट, गोल्ड प्रायोजकमा जेनेरेसन नेक्स्ट र नेपाल क्लियरिङ हाउस लिमिटेड, सिल्भर प्रायोजकमा नमस्ते पे, डिजिकम, एस–पावर, ब्रोडवे इन्फोसिस, हुवावे टेक्नोलोजिज र टेकमिन्ट रहेका छन् ।

त्यसैगरी, इनोभेसन पार्टनर सफ्टवेरिका कलेज, एकेडेमिक पार्टनर सनवे कलेज, लजिस्टिक पार्टनरमा एक्सल्याब, ई–कमर्स पार्टनर सोचेको डट कम र डिजिटल डिस्प्ले पार्टनर अल्ट्रा रहेका छन् ।

त्यसका साथै प्रदर्शनीमा गुणस्तरीय खाना तथा नास्ताको प्रबन्ध गर्न रेबानसँग सहकार्य गरिएको महासघंले जनाएको छ । प्रदर्शनीको अफिसियल बैंकको रूपमा ग्लोबल आईएमई बैंक, अफिसियल इन्स्योरेन्सको रूपमा आईएमई जनरल इन्स्योरेन्स छन् ।

इन्फोटेकलाई नेपाल सरकार सञ्चार तथा सूचना प्रविधि मन्त्रालय, सूचना प्रविधि विभाग, नेपाल उद्योग वाणिज्य महासंघ, नेपाल दूरसञ्चार प्राधिकरण, नेपाल बैंक लिमिटेड, नेपाल विज्ञान तथा प्रविधि प्रज्ञा–प्रतिष्ठान, नेपाल चेम्बर अफ कमर्स, नेपाल उद्योग परिसंघ, सुबिसु केवलनेट, भायोनेट, रोबोटिक्स एसोसिएसन अफ नेपाललगायत अन्तर्राष्ट्रिय संस्था विट्सालगायतको समर्थन छ ।

क्यान इन्फोटेक २०२२ मा ब्रान्डिङ, फिन्टेक, स्टार्टअप र इनोभेसन, आईसीटी एसेसरिज तथा प्रोडक्ट लञ्चिङ र ई–गभर्नेन्सका विभिन्न खण्डहरू रहने महासंघले जनाएको छ ।

प्रकाशित मिति: सोमबार, चैत २८, २०७८ १९:३०