लागत खर्च बढ्दा नेपाली उत्पादन महँगो भयो : उद्योगी

A+ A A-

सरकारले उत्पादनमा सहजीकरण नगरिदिँदा नेपाली उत्पादन अन्यको तुलनामा महँगो भएको उद्योगीहरूले गुनासो गरेका छन् । उद्योग वाणिज्य महासंघको ५६ औँ वार्षिक साधारणसभा तथा उद्योग वाणिज्य दिवसको अवसरमा उद्योगीले नेपाली उत्पादन महँगो हुने गरेको गुनासो गरेका हुन् ।

काठमाडौँको सोल्टी होटलमा आयोजित कार्यक्रममा सौरभ ग्रुपका अध्यक्ष उद्योगी विष्णु न्यौपानेले सरकारले उद्योगमैत्री नीतिहरू बनाए पनि कार्यन्वयनमा नआउँदा पर्याप्त मात्रामा उत्पादन गर्न नसकेको बताए । 'नेपालमै उत्पादन गर्छौँ, विदेश पनि निर्यात गर्न सक्छौँ भनिरहँदा पनि विजुलीदेखि कर्जासम्ममा सरकारबाट सहुलियत पाउँदैनौँ । आफैले समस्याहरूसँग जुध्दै उत्पादन गर्दा उत्पादन महँगो पर्न जान्छ,' उनले भने, 'अनि कसरी प्रतिस्पर्धा गर्ने विदेशी उत्पादन सँग ? '

कार्यक्रममा गोल्डस्टार कम्पनीकी कार्यकारी निर्देशक विदुशी राणाले सरकारले दक्ष श्रमिकको उत्पादन गर्न सके विदेश पलायन हुने श्रमिकलाई नेपालमै व्यवस्थापन गर्न सकिने धाराण राखिन् । उनले भनिन्, 'उत्पादनको मूल्य बढ्नुमा दक्ष श्रमिक नपाउनु पनि मुख्य समस्या हो । हामीले श्रमिकलाई तालिम दिएर सीमितबाट काम गर्नुपर्ने हुन्छ । यसले उत्पादन पर्याप्त हुन सक्दैन भने तालिम दिएर काम गराउन्जेलको लागत पनि उत्पादनमै जोडिन पुग्छ । यसले पनि उत्पादन महँगाे भइरहेको छ ।'

कार्यक्रममा उद्योगीहरूले जग्गा प्राप्तिको समस्या, श्रमिकको अभाव, ऊर्जाको अभाव तथा ढुवानीमा समस्या हुने गरेको गुनासो राखेका थिए । उनीहरूले यस्तै चर्को ब्याजदरले गर्दा समग्र उद्योग क्षेत्र नै धरासायी बन्दै गएको भन्दै बनेका नीतिहरू तत्काल कार्यन्वयनमा ल्याउँदै थप उद्योगमैत्री नीतिहरू ल्याउन आग्रह गरेका छन् ।

कार्यक्रममा उद्योग वाणिज्य तथा आपूर्ति मन्त्रालयका तर्फबाट सचिव अर्जुन प्रसाद पोखरेलले सरकार उद्योगीहरूसँग सहकार्य गरेरै अगाडि बढ्ने भन्दै ढुक्क हुन आग्रह गरे । उनले उद्योगी व्यवसायीले पनि उद्योग सञ्चालनपूर्व आवश्यक अध्ययन गरेर मात्रै उद्योग सञ्चालन गर्नुपर्ने आग्रह गरे ।

उनले भने, 'जग्गा प्राप्तिदेखि कर्जासम्मका समस्याहरू छन् । यी समस्यालाई हल गर्न सरकार लागिपरिरहेको छ । उद्योगीहरू आफै पनि आफ्नो व्यवसायका लागि अध्ययनशील बन्नुपर्‍याे । देशमा भएको नीतिगत व्यवस्थाअनुसार उद्योग कसरी संचालन गर्ने भन्ने खाका बनाएर संचालन गर्दा भविष्यमा अलपत्र हुनुपर्ने अवस्था नआउने संभावाना रहन्छ,' उनले भने ।

प्रकाशित मिति: सोमबार, चैत २८, २०७८ १६:३३