स्थानीय चुनावमा कस्तो हाेला सत्ता गठबन्धनकाे तालमेल मोडालिटी ?

A+ A A-

सत्ता गठबन्धनका दलहरू स्थानीय तहको चुनावमा तालमेलका लाग मोडालिटी बनाउने प्रयासमा छन् । शीर्ष नेतासहित बालुवाटारमा बैठक पनि बसिरहेका छन् । सत्ता गठबनधनमा रहेका पाँच दलका फरकफरक मोडालिटीले गर्दा सहमति जुटाउन सहज देखिएको छैन ।

जिल्लाबाट आएको प्रतिवेदनका आधारमा मतभार अध्ययन गर्ने र मोडालिटी टुंगो लगाउने रणनीति दलहरूले लिएका छन् । त्यसै पनि, काग्रेसले पहिला आफूले जितेका २ सय ६३ वटा पालिका र गत निर्वाचनमा दोस्रो भएका २९२ वटा पालिकासहितमा दाबी गरेको छ ।

जसको समग्र संख्या भने ५ सय ५५ वटा पालिका हुन्छन् । ७ सय ५३ मा ५ सय ५५ वटा पालिका कांग्रेसलाई छोड्ने पक्षमा सत्ता गठबन्धनमा अन्य दल सहमत हुने अवस्था भने देखिदैँन ।

त्यसो त, माओवादी अध्यक्ष प्रचण्डले २० फागुनको केन्द्रीय कमिटी बैठकमा नै चुनावी मोडालिटीको विषयमा चर्चा गर्ने क्रममा पहिला जितेका पालिका उसैले लिने र एमालेले जितेका पालिकामात्रै भागबण्डा गर्ने बताएका थिए ।

प्रचण्डको प्रस्ताव जुन पालिकामा जो दोस्रो भएको छ, उसलाई प्राथमिकतामा राख्ने भन्ने पनि थियो । त्यसअर्थमा चाहिँ कांग्रेसले दाबी गरेजस्तै ५ सय ५५ वटा पालिका भागमा पर्ने देखिन्छ । यद्यपि, माओवादी गठबन्धनमा कम्तीमा २ सय पालिका आफ्नो भागमा पार्ने रणनीतिमा देखिन्छ ।

गत निर्वाचनमा १ सय ६ वटा पालिका प्रमुख माओवादीले जितेको थियो । त्यसमध्ये मधेसमा मात्रै ६ वटा पालिका प्रमुख एमालेमा प्रवेश गरिसकेका छन् । त्यसैले माओवादी पुरानो साख जोगाउने दाउमा छ । त्यसका लागि कम्तीमा पनि २ सय पालिका दाबी गर्ने अडानमा माओवादी छ ।

त्यसबाहेकका करिब १ सय पालिका दाबी गर्ने मनस्थितिमा एकीकृत समाजवादी देखिन्छ । एकीकृत समाजवादीले एमालेले जितेका पालिकामा आफ्नो दाबी रहने बताए पनि ती धेरै पालिकामा अहिले पनि एमाले बलियो अवस्थामा छ ।

अघिल्लो चुनावमा एमाले एक सयभन्दा कम मतले ३७ वटा पालिकामा विजयी भएको थियो भने ५ सयभन्दा कम मतले विजयी भएका पालिका १०६ वटा थिए । त्यसैगरी, कांग्रेस ५ सयभन्दा कम मतले पराजित भएको पालिका ५६ वटा थिए । त्यसैले, एमाले विभाजनको अवस्थाले गत निर्वाचनमा जितेका २ सय ९६ मध्ये एक सयभन्दा बढी पालिका भने प्रभावित हुन सक्छन् ।

गत चुनावमा कांग्रेसले २ सय ६३ मध्ये २६ स्थानमा अन्य पार्टीको सहयोगमा जितेको थियो । त्यसमा सबैभन्दा धेरै सहयोग माओवादी केन्द्रको थियो । माओवादी केन्द्रले जितेका पालिकामा पनि कांग्रेसको योगदान रहेको छ । अघिल्लो चुनावमा आवश्यकताका आधारमा कांग्रेस र माओवादीले तालमेल गरेका थिए । तर, काठमाडौंलगायतका केही पालिकामा भने गठबन्धनकाे विराेधमा बागी उम्मेदवारी परेको थियो ।

त्यसैले, अघिल्लो चुनावकाे मतभार र विजयी पालिका अनुसार नै तालमेलको सम्भावना हुने देखिन्छ । पालिकाको हकमा केन्द्रले नै निर्णय लिन सक्ने पनि बताइएको छ । कर्णाली प्रदेशमा माओवादी केन्द्रले बढी पालिका पाउने गरी प्रदेशमा सहमति भएको छ । त्यस्तै अवस्थामा मधेस प्रदेशमा कांग्रेसले धेरै पालिका पाउने गरी सहमति जुट्न सक्छ ।

प्रकाशित मिति: सोमबार, चैत २८, २०७८ ११:५९