मा‌ओवादी छाडेका बगडीयालाई नै एमालेले फेरि रंगेलीकाे मेयरमा उठाउने

A+ A A-

नेकपा (एमाले) ले रंगेली नगरपालिकाको मेयर पदको उम्मेदवार सर्वसम्मत चयन गरेको छ । नगर कमिटीको बैठकले अहिलेकै मेयर दिलीपकुमार अग्रवाल (बगडीया) लाई नै फेरि पनि उम्मेदवार बनाउने निर्णय गरेको हो ।

मेयर बगडीयालाई एक महिनाअघि मात्र एमाले अध्यक्ष केपी शर्मा ओलीले रंगेली पुगेर पार्टी प्रवेश गराएका थिए । बगडीया माआवादी केन्द्रबाट निर्वाचित दुई वडाध्यक्षसहित एमालेमा प्रवेश गरेका थिए ।

बगडीया २०७४ सालको स्थानीय तहको निर्वाचनमा माओवादी केन्द्रको तर्फबाट मेयरमा निर्वाचित भएका थिए । नेकपा (एमाले) मोरङका उपसचिव सन्तोष साहले आगामी मेयरको उम्मेदवारका लागि नगर कमिटीले सर्वसम्मत बगडीयालाई सिफारिस गरेको जानकारी दिए ।

रंगेलीमा एमालेले मेयरको टुंगो लगाए पनि उपमेयरमा तीन जनाले आकांक्षा देखाएका छन् । उपमेयरमा अहिलेकी उपमयर केशवकुमारी खराल, एमाले रंगेलीकी नेतृ उषा झा र जिल्ला कमिटी सदस्य भूमा पराजुलीले दाबेदारी प्रस्तुत गरेका छन् ।

खराल २०७४ सालको निर्वाचनमा माओवादी केन्द्रबाट निर्वाचित भएकी थिइन् । एमालेबाट उम्मेदवार बनेकी झा तेस्रो भएकी थिइन् । उपमेयर खराल पनि बगडीयासँगै एमालेमा प्रवेश गरेकी थिइन् ।

साहका अनुसार उपमेयरमा तीन जनाले दावी प्रस्तुत गरेपछि उनीहरू सबैको नाम सिफारिस गरेर जिल्ला कमिटीमा पठाइएको छ । बैठकले ५ र ८ नम्बर वडाका उम्मेदवारसमेत सर्वसम्मत छनाेट गरेको उपसचिव साहले जानकारी दिए । उनका अनुसार ८ नम्बरमा अहिलेकै वडाध्यक्ष ढकप्रसाद आचार्य र ५ मा पनि अहिलेकै वडाध्यक्ष महानन्द मण्डललाई सर्वसम्मत उम्मेदवार बनाउने निर्णय भएकाे छ । मण्डललाई पनि एमाले अध्यक्ष ओलीले मेयर बगडीयासँगै पार्टीमा प्रवेश गराएका थिए ।

प्रकाशित मिति: सोमबार, चैत २८, २०७८ ०९:५०