कांग्रेस चितवन सभापति खनाललाई प्रश्न- माओवादीले भरतपुर नछोडे तपाईंहरू कुन हदसम्म अघि बढ्नुहुन्छ ?

कांग्रेस चितवन सभापति खनाललाई प्रश्न- माओवादीले भरतपुर नछोडे तपाईंहरू कुन हदसम्म अघि बढ्नुहुन्छ ?

A+ A A-

नेपाली कांग्रेस चितवनका नेताहरूले केन्द्रमा आएर सभापति शेरबहादुर देउवालगायत अन्य शीर्ष नेताहरूलाई भेटेर फर्किएका छन् । स्थानीय चुनावमा हट-केक बनेको भरतपुरमा यसपटक कांग्रेस नै उठ्नुपर्ने भन्दै उनीहरूले नेतृत्वको ध्यानाकर्षण गराएका छन् । २०७४ सालमा भरतपुरमा महानगरपालिकामा कांग्रेसको सहयोगमा माओवादी केन्द्रले मेयर जितेको थियो । यसपटक माओवादीले आफूहरूलाई सहयोग गर्नुपर्ने नेताहरूको माग छ । भरतपुरबारे सभापति देउवाले उनीहरूसँग के भने ? माओवादी केन्द्रले भरतपुर नछोडे कांग्रेसले के गर्छ ? कांग्रेस चितवनका सभापति राजेश्वर खनालसँग शिलापत्रकर्मी शिशिर ढकालले गरेको कुराकानी :

सभापति शेरबहादुर देउवासहित शीर्ष नेताहरूलाई भरतपुर नछाड्न ध्यानाकर्षण गराएर चितवन फर्किनुभएको छ । नेताहरूबाट के जवाफ पाउनुभयो ?

स्थानीयस्तरमा उठेका भावना र नेता-कार्यकर्ताको धारणालाई लिपिबद्ध गरेर हामीले सभापति र शीर्ष नेताहरूलाई ध्यानाकर्षण गराएका छौँ । गठबन्धनमा जोडिनका लागि बन्नुपर्ने वातावरण र भरतपुर महानगरपालिका कांग्रेसले नपाएको अवस्थामा पार्टीलाई पर्न सक्ने दूरगामी असरबारे हामीले स्पष्ट कुरा राखेका छौँ । गठबन्धनमा रहँदा कांग्रेसको पोजिसन र हैसियतबारे पनि कुरा राखेका छौँ । हामीले उठाएका सवालमा नेताहरू गम्भीर हुनुहुन्छ । सभापतिले कांग्रेसको हित हुनेगरी निर्णय लिने विश्वास दिलाउनुभएको छ । उहाँले दिलाउनुभएको विश्वासका आधारमा चितवनमा कांग्रेसकै पक्षमा निर्णय हुन्छ भन्ने आशाका साथ हामी फर्किएका छौँ ।

तपाईंले इंगित गर्नुभएको दूरगामी असर र सभापतिले तपाईंहरूलाई दिलाएको विश्वास चाहिँ के हो ?

गठबन्धन हुँदा फाइदामात्रै छैनन्, यसका बेफाइदा पनि छन् । चितवनमा कांग्रेसको वर्चस्व छ, यसका बाबजुद पनि रुखमा भोट हाल्न नपाएको पीडा कार्यकर्तामाझ छ । यसपटक त्यो पीडाबाट कार्यकर्ताहरूलाई मुक्त गराउनैपर्छ तबमात्रै संगठनमा नयाँ उत्साह सञ्चार हुन्छ । यो प्रवृत्ति कायमै भएको अवस्थामा संगठन जीवित भए पनि सांगठनिक गतिविधि भने मृत बराबर हुन्छ । तसर्थ यो दुर्घटनाबाट पार्टीलाई जोगाउन कांग्रेसको पक्षमा निर्णय गराउन हामीले भनेका छौँ । सभापतिले पूर्ण प्रयासका साथ म गठबन्धनबाट निर्णय गराउँछु भन्नुभएको छ ।

भरतपुर महानगरको नेतृत्व आफूले लिएर संघीय संसदमा माओवादीलाई समर्थन जनाउने तपाईंहरूको मनस्थिति हो ?

पहिलो कुरा- हाम्रो मनस्थिति भनेको कांग्रेस र माओवादीबीच हार्दिकता विकास गरौँ भन्ने छ । हार्दिकता विकासका निम्ति २०७४ मा हाम्रो साथ पाएर विजयी भएको माओवादीले यसपटक हामीलाई सहयोग गर्न तयार हुनुपर्छ । मन मिल्यो भने पछिल्लो चुनावका लागि पनि धेरै कुरा मिल्दै जान्छ ।

दोस्रो- कुनै पनि पार्टीलाई चुनावमा प्रतिस्पर्धामा जानबाट रोकतोक गर्न सकिँदैन । जहाँसम्म कांग्रेसको सहयोगमा तालमेल गरेर जाने कुरा छ त्यसका लागि हाम्रा पनि केही सर्त छन्, उहाँहरूका पनि सर्त अवश्य रहन्छन् । हाम्रो सर्त भनेको २०७४ मा माओवादीलाई हामीले सहयोग गरेकाले यो पटक गठबन्धनको मर्मलाई आत्मसात गर्दै हामीलाई सहयोग गर्नुपर्छ भन्ने हो । र, गठबन्धनको मर्मलाई आत्मसात गर्न माओवादीले हामीलाई सहयोग गर्छ भन्ने विश्वास हाम्रो छ । त्यस पार्टीका नेताहरूप्रति आदार र विश्वास पनि छ । यो आदार र विश्वासलाई आत्मसात गर्दै तालमेल मिलाउने जिम्मा पनि उहाँहरूकै हो । स्थानीय चुनावमा मन मिलेमात्रै पछि सहज हुने कुरा हामीले नेताहरूलाई भनेका छौँ ।

भरतपुरको सवालमा केन्द्रीय निर्णय हाबी भयो भने कांग्रेस चितवन कुन हदसम्म अघि बढ्छ ?

यस विषयमा अहिले सहजै भन्न सक्ने अवस्था छैन । तर, कांग्रेस चितवन सभापतिको नाताले म र सम्पूर्ण कार्यकर्ता पंक्ति पार्टीको पक्षमा उभिनैपर्ने हुन्छ । तर, विवश भएर पार्टी निर्णयको पक्षमा उभिँदा र खुसी भएर समर्थन जनाउँदाको नतिजा निश्चय पनि फरक पर्छ । हामीलाई खुसी पार्ने निर्णय गर्ने वा बाध्य भएर पार्टीको निर्णयमा उभ्याउने भन्ने विषयमा मैले माओवादी केन्द्रका अध्यक्ष पुष्पकमल दाहाल प्रचण्डलाई पनि ध्यानाकर्षण गराएको छु । गठबन्धनको निर्णय स्थानीय भावना अनुसार नआए अन्य व्यक्तिले चुनौती दिने कुरालाई अहिले नै भन्न सक्ने स्थिति छैन, त्यसको असर त्यसबैले देखापर्नेछ ।

चितवनका सवालमा कांग्रेससँग के कस्तो एजेण्डा छ ?

कांग्रेसले स्थानीय चुनाव २०७९ को घोषणापत्र छिट्टै प्रकाशित गर्दैछ । कांग्रेसले विगतमा गरेका काम र आगामी दिनका योजना त्यसमा समावेश हुनेछ । भरतपुरसहित अन्य स्थानीय तहमा सन्तुलित विकास गर्न र भरतपुरलाई स्मार्ट सिटी बनाउने कुरा सार्थक तुल्याउन र सबै स्थानीय तहलाई आत्मनिर्भर बनाउँदै शिक्षा र स्वास्थ्यका सवालमा सहज र सरल पहुँच पुर्‍याउनेलगायतका एजेण्डा हामीसँग छन् । त्यस सवालमा बुँदागत रूपमा हामी घोषणापत्रमार्फत सार्वजनिक गर्नेछौँ ।

प्रकाशित मिति: आइतबार, चैत २७, २०७८ १७:२२