शशांक एक्लैले ६ करोड खर्चिएको चुनावमा कांग्रेसको खर्च भने चार करोडमात्रै

A+ A A-

शनिबार कांग्रेस केन्द्रीय सदस्य शंशाक कोइरालाले 'अफ दी रेकर्ड' भनेर सार्वजनिक रूपमा भने ‘नवलपरासी १ गैडाकोटबाट तीनचोटी चुनाव लडेँ। पहिलो चुनावमा मेरो खर्च ८० हजार रुपैयाँ थियो, दोस्रो चुनावमा तीन करोड र पछिल्लो चुनावमा ६ करोड खर्च भयो ।’

काठमाडौंमा शनिबार नेपाल विद्यार्थी संघले आयोजना गरेको कार्यक्रमलाई सम्बोधन गर्दै नेता कोइरालाले खर्चिलो चुनावको सन्दर्भ निकालिरहँदा कोइरालामाथि नै गम्भीर प्रश्न उठेको छ । कांग्रेसले गत चुनावमा प्रदेशसभा र प्रतिनिधिसभा सदस्यका उम्मेदवारलाई दामासाहीले पैसा बाँडेको थियो । पार्टीको केन्द्रीय कोषबाट प्रदेशसभा सदस्यलाई ३ लाख र प्रतिनिधिसभा सदस्यका उम्मेदवारलाई ५ लाख रुपैयाँका दरले चुनाव खर्च दिएको थियो । त्यसमाथि पहुँचवाला र जित्न सक्ने उम्मेदवारको हकमा पार्टीले थप रकम दिएको त्यतिबेलाका एक उम्मेदवारले बताए ।

कांग्रेसले उम्मेदवारलाई दिएको रकमको हिसाबमात्रै करिब १७ करोड रुपैयाँ हुन आउँछ । कोइरालाको भनाइलाई नै आधार मान्दा पनि कांग्रेसको चुनावी बहीखाता अपारदर्शी छ भन्ने पुष्टि भएको छ । चुनाव सकिएलगत्तै निर्वाचन आयोगमा कांग्रेसले बुझाएको खर्च विवरणले पनि त्यही पुष्टि गर्छ । चुनावमा प्रदेशसभा र प्रतिनिधिसभाका उम्मेदवारलाई पार्टीको कोषबाट दिएको रकममात्रै १७ करोड हिसाब आए पनि कांग्रेसले आयोगको बुझाएको चुनाव खर्च भने ४ करोड ८६ लाख ६६ हजार रुपैयाँ मात्रै देखिएको छ ।

कांग्रेसको लेखा परीक्षण प्रतिवेदनमा उल्लेख गरिएको उक्त रकम आफैँले उम्मेदवारलाई वितरण गरेको खर्चको हिसाबभन्दा चार गुणा कम हो । लेखा परीक्षणमा उल्लेख गरेको रकमको प्रतिनिधिसभाका निर्वाचन क्षेत्रमा दामासाही भाग लगाउने हो भने प्रतिनिर्वाचन क्षेत्र २ लाख ९५ हजार रुपैयाँ पर्न आउँछ, जुन पार्टीले बाँडेको हिसाबसँग मेल खाँदैन । अनि कांग्रेसले त्यतिबेलाको लेखा परीक्षणमा चुनावका लागि २ करोड ९३ लाख रुपैयाँ चन्दा उठेको देखाएको छ ।

प्रकाशित मिति: आइतबार, चैत २७, २०७८ १६:००