चुनावी तालमेलको नाममा विप्लवले पार्टी एमालेसँग मिलाउने कार्यकर्ताकाे डर

फाइल तस्वीर

A+ A A-

नेत्रविक्रम चन्द विप्लव नेतृत्वको नेकपाको केन्द्रीय कमिटी बैठकले औपचारिक रूपमा पार्टी चुनावमा सहभागी हुनेभन्दा पनि सहयोगी भूमिकामा रहने आशयको निर्णय गरेको थियो । केन्द्रीय समितिले अमेरिकी सहायता परियोजना एमसीसीको विपक्षमा रहेको पार्टी र तिनका उम्मेदवारलाई सहयोग गर्ने नीति बनाउने बताएको थियो ।

त्यसविपरीत परिस्थिति निर्माण हुन थालेको भन्दै विप्लव नेतृत्वको पार्टीभित्र पुनः विवाद सुरु भएको छ । चुनाव चिह्नको विषयमा छलफल गर्न खड्गबहादुर विश्वकर्मा प्रकाण्ड २४ चैतमा निर्वाचन आयोगमा पुगेपछि नेकपाभित्रको विवाद उत्कर्षतिर लागेको हो ।

महासचिव विप्लव र नेता विश्वकर्मा चुनावमा सहभागी हुने लाइनमा त हुन् नै त्यही लाइनअनुसार आफ्ना उम्मेदवारलाई एउटै चुनाव चिह्न मिलाउन सकिन्छ कि भन्ने विषयमा छलफल गर्न विश्वकर्मा आयोग पुगेका थिए ।

विप्लवनिकट एक नेताका अनुसार नेकपाले आफ्ना उम्मेदवार स्वतन्त्र रूपमा उठाउने छ र ती उम्मेदवारको एउटै चुनाव चिह्न भए सजिलो हुने भएकोले आयोगसँग छलफल गरिएको हो । ती नेताको दाबीमा परिस्थिति त्यस्तो नबनेको र स्वतन्त्र उम्मेदवार बन्दा चुनाव जित्नलाई समस्या हुने भएमा एमालेसँग सहकार्य गर्ने तयारी छ । हुन त एमालेसँग सहकार्य गर्नका लागि छलफल तीब्र भएको छ ।

सुदूरपश्चिम प्रदेशमात्र होइन, कर्णाली र लुम्बिनी प्रदेशमा पनि विप्लवनिकट नेताहरू एमालेसँग निरन्तर संवादमा जुटेका छन् ।

पार्टीभित्र अल्पमतमा परेर पनि महासचिव विप्लव र नेता विश्वकर्माले चुनावमै लैजाने भएपछि नेताहरू धर्मेन्द्र बाँस्तोला, हेमन्तप्रकाश वली, उदयबहादुर चलाउनेलगायतका नेताहरू चर्को असन्तुष्टि पोख्न थालेका छन् । ६९ सदस्यीय केन्द्रीय कमिटीमा ४२ जनाले चुनावमा सहभागी हुन नहुने अडान लिएका थिए । त्यहीकारण एमसीसी विरोधीलाई समर्थन गर्ने नीति लिइएको थियो ।

विप्लव निकट नेताहरूको भनाइमा नेकपाभित्र चुनावी तालमेलको नाममा पार्टी एमालेमा एकीकरण हुने आंशका हुन थालेको छ । त्यही आंशकाका कारण चुनावको विरोध गरेको ती नेताको दाबी छ । ती नेताले भने, ‘हामीलाई अहिले विप्लवले पनि चुनावी तालमेलका नाममा प्रचण्डले झै भोलि एमालेसँग पार्टीलाई मिलाइदेलान् भन्ने डर छ ।’

त्यसैकारण केन्द्रीय कमिटीको बैठकमा नेताहरूले विप्लवले पार्टीलाई शान्ति प्रक्रियामा ल्याउँदा एमाले केपी ओलीसँग गोप्य रूपमा ७ बुँदे सहमति गरेको आंशका गरेका थिए ।

चुनावी मुद्दाले नै विप्लव नेतृत्वको नेकपा विभाजनतिर जान सक्ने बताइएको छ । वली र बाँस्तोलाले नेतृत्व गर्न सकेको अवस्थामा पार्टी फुट्ने नेताहरूको भनाइ छ । एक नेताका अनुसार केन्द्रीय कमिटीमा चुनावको विरोध गर्ने सबैले वली र बाँस्तोलालाई साथ भने दिने छैनन् ।

तर, कम्तिमा ३० जना केन्द्रीय सदस्य वली र बाँस्तोलाको पक्षमा उभिन सक्ने बताइएको छ । नेता विश्वकर्माकै पहलमा केन्द्रीय सदस्य भएका शरद रसाइली, पूर्ण सिंहलगायतका नेताहरू बैठकमा चुनावको विरोधमा थिए । तर, पार्टी विभाजन भएको अवस्थमा उनीहरूले विश्वकर्माको साथ छोड्न नसक्ने विश्लेषण गरिएको छ ।

विप्लव र विश्वकर्माको विश्वासपात्रको रूपमा रहेका उदयबहादुर चलाउने पनि चुनावको विरोधमा देखिएका थिए । सरकारसँगको वार्ता टोलीमा समेत बसेका चलाउनेले पनि पार्टी विभाजनकै अवस्थामा भने वली र बाँस्तोलालाई साथ दिने अनुमान गरिन्छ ।

३० जना केन्द्रीय सदस्यले वली र बाँस्तोलालाई साथ दिनसक्ने बताइएको छ । नेकपा स्रोतका अनुसार उक्त संख्यामा पनि कमी आए कम्तिमा १८ देखि २० जना केन्द्रीय सदस्य भने वली र बाँस्तोलाको पक्षमा उभिन सक्नेछन् । चुनावको विवाद उत्कर्षतिर पुगेको अवस्थामा बाँस्तोला र वलीले विप्लवसँग विद्रोह गरेर नयाँ पार्टी गठन गर्ने र उक्त पार्टी मोहन वैद्य किरणसँग एकीकरण गर्ने संभावना रहेको छ ।

तर, नेकपाका नेता बाँस्तोला भने पार्टीलाईँ विवादित बनाउन बाहिरबाट आवश्यकताभन्दा बढ्ता विवाद निकालेको बताउँछन् । शिलापत्रसँग कुराकानी गर्दै बाँस्तोलाले पार्टी नेतृत्व केन्द्रीय कमिटीको निर्णयविपरीत जान नसक्ने दाबी गरेका छन् ।

बाँस्तोलाले भने, ‘केन्द्रीय कमिटीको निर्णयभन्दा बाहिर पार्टी जान सक्दैन, अहिले चुनाव र एमालेसँग तालमेलको कुरा अनावश्यक हल्ला हुन् ।’ त्यसैगरी, नेकपा विभाजन हुनेसक्ने खतरामाथि भने उनले टिप्पणी गरेनन । शिलापत्रसँग भने, ‘अहिले त्यो सम्भावना छैन, सम्भावना नभएको विषयमा धेरै कुरा नगरौं ।’

प्रकाशित मिति: शुक्रबार, चैत २५, २०७८ १७:४५