चितवनमा नाबालिकाहरूमाथि विद्यालयमै यौन दुर्व्यवहार, न्याय खोज्दै पुगे प्रहरी कार्यालय

चितवनमा नाबालिकाहरूमाथि विद्यालयमै यौन दुर्व्यवहार, न्याय खोज्दै पुगे प्रहरी कार्यालय

A+ A A-

उनीहरू ४, ५ र ६ कक्षामा पढ्छन् । भर्खरै उमेर ११/१२ र कोही १३ वर्षका मात्रै भए । तर यति सानै उमेरमा उनीहरूले शिक्षा आर्जन गर्ने ठाउँ विद्यालयमै भोगेको हिंसाको फेहरिस्त भने लामो छ ।

भरतपुर महानगरपालिका– १३ स्थित माध्यमिक विद्यालय गंगानगरमा अध्यापन गर्ने प्रावि तहका स्थायी शिक्षक फणीन्द्र भट्टराई र निमावि तहका अर्का स्थायी शिक्षक विमलप्रकाश देवकोटाले आफूहरूमाथि पटकपटक यौन हिंसा गरेको आरोप ती बालिकाहरूले लगाएका छन् । बिहीबार तिनै शिक्षकहरूलाई कारबाहीको माग गर्दै स्कुल ड्रेसमै जिल्ला प्रहरी कार्यालय चितवन आइपुगेका उनीहरूको बालमस्तिष्कमा आक्रोश र अनुहारमा विद्रोहको भाव झल्केको देखिन्थ्यो ।

उनीहरूको साथमा अभिभावक, जनप्रतिनिधि र विद्यालयका केही शिक्षकसमेत उपस्थित थिए । त्यही भिडमा भेटिएकी ४ कक्षामा पढ्ने एक छात्राले आरोपित शिक्षक भट्टराईले आफूलाई २ कक्षादेखि नै यौन दुर्व्यवहार गर्दै आएको बताइन् । पीडित बालिकाका अनुसार २ कक्षा पढ्दाताका होमवर्क बुझाउने बेलामा ती शिक्षकले उनले लगाएको पाइन्टको फस्नर खोलिदिएका थिए । उनले लगत्तै ‘तपाईंहरूले यस्तो गर्न मिल्छ र सर ?’ भनेर प्रतिवाद गरेको सुनाउँछिन् । तर, ती शिक्षकले सुनेको नसुनेझैँ गरे । ती बालिकाका अनुसार यसरी सुरु भएको यौन दुर्व्यवहारको सिलसिला ३ कक्षाहुँदै ४ कक्षा पुग्दासम्म ती शिक्षकले सर्टभित्र हात घुसारेर छाती मुसार्नेसम्ममा पुग्यो । यसबीचमा उनले शिक्षिकाहरूलाई घटनाका बारेमा नसुनाएकी भने होइनन् । तर, सुनुवाइ भएन ।

‘मिसहरूलाई भने पनि मिटिङ बस्ने, सजाय दिन्छौँ भन्ने तर यसै छोडिदिने गरे । यस्तै मात्रै दोहोरिइरह्यो,’ उनले भनिन्, ‘२ कक्षामा पनि त्यस्तो गर्‍यो । ३ कक्षामा पनि । ४ कक्षामा पनि त्यस्तै गर्न थालेपछि अति नै भयो भनेर बाबालाई भनेँ । बाबाले अध्यक्षसँग कुरा गर्नुभएछ । कुरा गरेपछि सजाय दिन्छौँ भने तर केही सजाय भएन । त्यही भएर अहिले हामी प्रहरी कार्यालय आएको ।’

पीडित बालिकाले बुबालाई घटनाबारे सुनाएपछि ती शिक्षकलाई कान समातेर माफी माग्न लगाएका थिए तर हिंसाको क्रम भने रोकिएन । उल्टै बरु थपिँदै गएको विद्यार्थीहरू बताउँछन् ।

हिंसाको शृंखला थपिँदै जाँदा शिक्षक देख्दा नै डर लाग्न थालेको ती बालिकाले बताइन् । ‘म भागिरहन्थेँ तर त्यो सर अगाडि आइहाल्थे,’ उनले न्यायको आशा गर्दै भनिन्, ‘अब त अति नै भयो । कि त हामी हट्ने कि ती सर हट्ने भनेका छौँ । खै के गर्छन् अब ।’

उनै शिक्षकबाट ४ कक्षामै पढ्ने अर्की विद्यार्थीले भोगेको हिंसा पनि कहालीलाग्दो छ । ती शिक्षकले होमवर्क हेर्दा काखमा बसाल्न खोज्ने, छातीतिर हात घुसाउनेजस्ता यौन दुर्व्यवहार पटकपटक गर्दै आएको उनी सुनाउँछिन् । उनले पनि १ कक्षादेखि नै ती शिक्षकको हिंसा भोग्दै आएको सुनाइन् ।

‘मलाई पनि सरले जहाँ पायो, त्यहीँ छुँदा अप्ठ्यारो लाग्थ्यो, तर साथीले त्यो गलत हो भनेपछि मैले सावित्री मिसलाई भनेँ तर पत्याउनुभएन । आमालाई भनेको उल्टै मलाई नै गाली गर्नुभयो,’ उनले सुनाइन् ।

गत मंगलबार पनि त्यस्तै हर्कत शिक्षकले दोहोर्‍याएपछि उनले बुबालाई दुर्व्यवहारबारे सुनाइन् । उनका बुबाले स्कुलमा सोधपुछ गरेपछि घटना विकसित हुँदै प्रहरीसम्म आइपुगेको हो । उनी मात्रै होइन, त्यहाँ आएका अधिकांश छात्राले शिक्षक भट्टराई र देवकोटाबाट पटकपटक यौन दुर्व्यवहार भोग्दै आएको सुनाएका थिए । तीनैमध्ये ६ कक्षामा पढ्ने छात्राले शिक्षक देवकोटाले संवेदनशील अंगमा हात घुसार्ने, छुने क्रियाकलाप पटकपटक गर्दै आएको बताइन् । ४ कक्षा र ५ कक्षामा शिक्षक फणीन्द्रले गर्ने यौन दुर्व्यवहार ६ कक्षामा पुग्दा विमलप्रकाशबाट भएको उनी बताउँछिन् ।

उनले पनि दुर्व्यवहारबारे घरमा खबर गरेसँगै बिहीबार जम्मा भएका अभिभावकले आरोपित शिक्षकद्वयलाई कुटपिटसमेत गरेका थिए । उनीहरूले भरतपुर– १३ को वडा कार्यालयमा पुगेर हिंसाविरुद्ध नाराबाजी पनि गरे । दुई दिनअगाडि मात्रै घटनाको जानकारी पाएको र कानुनी कारबाहीका लागि प्रहरी कार्यालय आएको एक अभिभावकले बताए ।

३ कक्षादेखि नै छोरीले सहँदै आएको हिंसा ती अभिभावकले एक वर्षपछि ४ कक्षाको अन्त्यतिर मंगलबार मात्रै थाहा पाए । ‘मलाई रातभरि निद्रा नि लागेन, छटपटी भइरह्यो । छोरीले यस्तोसम्म भोगेको मैले पछि मात्रै थाहा पाएँ,’ उनले भने । रातभरको छटपटीपछि उनी बुधबार विद्यालय गएर प्रधानाध्यापक गणेशप्रसाद सुवेदीलाई सोधपुछसमेत गरे । कारबाही हुने भनिए पनि उनी आश्वस्त हुन सकेनन् ।

‘पटकपटक यस्तो गर्दै आएका रहेछन् सरहरूले । खट्टा ढोगेर माफी मागेपछि एकचोटिलाई मौका दिइएको रहेछ पहिले पनि । अब हामीले कारबाही नगराई नछाड्ने भनेर प्रहरी कार्यालयसम्म आएका छौँ । मास्टरले नै त्यस्तो गरेपछि हामीले कसको भरोसा गर्ने ?,’ उनले घटनाको बेलीबिस्तार लगाउँदै भने । विद्यालय व्यवस्थापन समितिका अध्यक्षले घटनाका बारेमा बेवास्ता गरेको उनको आरोप छ ।

कानुनी कारबाहीका लागि प्रहरी कार्यालय आउन आलटाल गरेको र आफूहरूले दबाब दिएपछि मात्रै आएको उनले सुनाए । यता प्रहरी कार्यालयमै भेटिएका विद्यालय व्यवस्थापन समितिका अध्यक्ष सुदीप सुवेदीले यसअघि यौन दुर्व्यवहारको घटना विद्यालयमा थाहा नपाएको बताउँदै बुधबार राति मात्रै थाहा पाएर बिहीबार बिहान वडाअध्यक्षसँग भेटेर कानुनी पक्रियाका लागि आएको बताए ।

यसअघि पटकपटक विद्यार्थीले दुर्व्यवहार भोग्दै आएको विषयमा भने आफू जानकार नरहेको उनको दाबी छ । ‘यौन दुर्व्यवहार आसयको घटना पहिले थाहा नपाए पनि विद्यार्थीलाई हातपात गरेको, कुटपिट गरेको, लट्ठीले पिट्दा स्कर्ट माथि गएको भन्ने कुरा विद्यालयले मिलाएको भनेर पहिलेदेखि अहिलेसम्मका प्रिन्सिपलहरूले भन्नुभएको थियो,’ उनले भने । भरतपुर– १३ का वडाअध्यक्ष प्रकाश दवाडीले विद्यालय व्यवस्थापन समितिका अध्यक्षले घटनाबारे जानकारी गराएपछि मात्र थाहा पाएको बताए ।

आक्रोशित अभिभावक र विद्यार्थी वडा कार्यालयमै पुगेपछि यौनजन्य घटनामा कानुनी पक्रियामा जानुपर्ने भन्दै पीडित विद्यार्थीहरूलाई लिएर प्रहरी कार्यालयमा आएको बताए । उनले भने, ‘त्यस्ता गतिविधिलाई निरुत्साहित गर्नुपर्छ भन्ने नै हो । त्यसैले हामीहरू प्रहरी कार्यालय आयौँ,' उनले भने ।

बिहीबार नै अभिभावक, जनप्रतिनिधि, प्रहरी र विद्यार्थीसहितको सर्वपक्षीय छलफल गरेर आगामी दिनमा विद्यालय शान्तिपूर्वक चलाउने निधो गरिएको छ । जिल्ला प्रहरी कार्यालय चितवनका सूचना अधिकारी डीएसपी नरहरि अधिकारीले आरोपित दुवै शिक्षकलाई नियन्त्रणमा लिइसकिएको बताउँदै घटना अनुसन्धान पक्रियामा गइसकेको र दोषी ठहरिए उचित कानुनी कारबाही हुने बताए ।

यी पनि पढ्नुस् :

प्रकाशित मिति: शुक्रबार, चैत २५, २०७८ ११:५९