चोटैचोट खेपेका ओलीको लोभलाग्दो सक्रियता

A+ A A-

०७८ मा सबैभन्दा बढ्ता चर्चामा रहेका र चोट खेपेका नेता हुन्- एमाले अध्यक्ष केपी ओली । दुर्लभ दुईतिहाइनजिकको बहुमत कम्युनिस्ट सरकारका प्रधानमन्त्री ओली आफ्नै अहम्‌का कारण सत्ताच्यूत भए । एमालेले संघीय मात्र होइन, चारवटा प्रदेशमा समेत सत्ता गुमायो ।

वर्षको आरम्भमै दोस्रोपटक संसद् विघटन गरेका ओलीले पार्टी एकता पनि जोगाउन सकेनन् । प्रधानमन्त्री हुँदा तत्कालीन नेकपाको विवादलाई सल्टाउन नसकेका ओलीले सत्ताबाट बाहिरिपछि त एमालेको विभाजन पनि रोक्न सकेनन् । आफ्नै पार्टीका २३ सांसदको हस्ताक्षरले बालुवाटारबाट बालकोट पुगेका ओलीले यो वर्ष पार्टी विभाजनको चोट ब्यहोरे । जनमत कायम राख्न नसकेको, पार्टी विभाजन रोक्न नसकेको, पार्टीभित्र निरंकुश शैली अपनाएकोजस्ता थुप्रै आरोप ओलीको भागमा पर्‍यो ।

ओलीले वर्षको सुरुवातमै विवादास्पद अध्यादेशमार्फत संवैधानिक निकायमा २१ पदाधिकारीलाई नियुक्ति दिलाए । प्रधानन्यायधीश चोलेन्द्रशमशेर जबरालाई संवैधानिक निकायमा भाग छुट्याइदिए । लगत्तै ८ जेठमा फेरि संसद् विघटन गरे । संविधानविपरीत प्रधानमन्त्रीले विश्वासको मत लिनका लागि एकदिने संसद् अधिवेशन बोलाए । राष्ट्रपति विद्यादेवी भण्डारीलाई दलीय निर्णयको सहयोगीझैँ बनाउने प्रयास गरे । त्यसैकारण ८ जेठको मध्यराति २ बजे राष्ट्रपति भण्डारीले संसद् विघटन गरेर निर्वाचन मिति घोषणा गरिन् ।

ओलीले मंसिरको महाधिवेशनमा पार्टीभित्र आफ्ना विरोधीलाई ढिम्किनै नदिने रणनीति अख्तियार गरे । भीम रावल, घनश्याम भुसाल, टंक कार्की, धर्म निरौला, नरेश खरेललगायतका नेताहरू यही रणनीतिको सिकार बने । रावलको अडानका कारण मात्रै महाधिवेशनमा अध्यक्षको निर्वाचन गरियो । तर, रावललाई महाधिवेशनस्थलमा मत माग्नसमेत रोकियो ।

अमेरिकी सहयोग परियोजना एमसीसीबारे ओलीले दोहोरो भूमिका देखाए, सत्तामा हुञ्जेल पक्षमा र प्रतिपक्ष बनेपछि मौन रहेर । ओली नेतृत्वको एमालेले ३ साउनदेखि निरन्तर संसद् अवरोध गरेर अहिलेसम्मकै लामो संसद् अवरुद्धको रेकर्ड बनायो ।

तत्कालीन जसपाका राजेन्द्र महतो, शरतसिंह भण्डारी खेमाका नेताहरूलाई वर्षको सुरुवाततिर सरकारमा सहभागी गराएर संविधानको स्वीकार्यता बढाउने भूमिकामा ओली देखिए । नागरिकतासम्बन्धी समस्या सम्बोधन गर्न नागरितासम्बन्धी अध्यादेश ल्याएका थिए । मधेस आन्दोलनका मुद्दाहरू फिर्ता लिए । यसले मधेसमा एमालेको स्वीकार्यता बढाउन सहयोगी बन्यो ।

माधव नेपाल, प्रचण्डलगायतका विपक्षी नेताले ओलीलाई कम्युनिस्ट जनमतविरोधी भनेर आरोपित गरे पनि विभाजित पार्टी र शिथिल कार्यकर्ताकाे मनोबल उकास्न ओलीको निरन्तर दौडधुप भने लोभलाग्दो रह्यो, जुन जारी छ ।

प्रकाशित मिति: शनिबार, चैत २६, २०७८ १४:०४