ह्वील चेयरमा बसेर कोकाकोलालाई अदालत पुर्‍याउने पत्रकार

A+ A A-

आर्थिक पत्रकार गजेन्द्र बुढाथोकी यो वर्ष चर्चामा रहे । टक्सार म्यागजिनका सम्पादक रहेका उनले बहुराष्ट्रिय कम्पनी कोकाकोलाले गरेको करछलीको विषयलाई बाहिर ल्याएका थिए ।

पत्रकार बुढाथोकीले नेपालमा कोकाकोलाले स्थापनाकालदेखि नै स्वामित्व किनबेच हुँदा नेपाल सरकारलाई तिर्नुपर्ने आयकर, आकस्मिक लाभकर, पुँजीगत लाभकर छलीका चक्रबारे विस्तृत तहगत खोज गरी सरकारको अनुसन्धान प्रक्रियामा विशेष योगदान दिए ।

बुढाथोकीका अनुसार ०७७ साल मंसिर २३ गते उनले सूचना पाएका थिए । २४ गते समाचार प्रकाशन गरे । विगत २७ वर्षदेखि निरन्तर पत्रकारिता गर्दै आएका उनले न्युज कारोबार डटकम, टक्सार आर्थिक म्यागजिन, लुम्बिनी सञ्चार डटकम अनलाइनमार्फत १५ महिनाको अवधिमा ३९ वटा फलोअप स्टाेरी छापे । यसरी उनले कोकाकोलाले नेपाल सरकारलाई तिर्नुपर्ने करछली भएको विषय सार्वजनिक सरोकारमा ल्याए ।

समाचार संकलनका क्रममा बुढाथोकीले धम्की पनि सहनुपर्‍याे । ‘ह्वील चेयरमा बसेर तपाईं बहुराष्ट्रिय कम्पनीसँग पङ्गा लिने ?’, ‘तपाईं कहाँ बस्नुहुन्छ, तपाईं बस्ने ठाउँ पत्ता लगाइसकेका छौँ, तपाईंलाई हामीले चिनिसकेका छौँ ।’, ‘कोकाकोलाले कर छलेको कुरा तपाईंले कसरी, कहाँबाट थाहा पाउनु’भो ? किन लेख्नु’भो ?’ जस्ता धम्की उनले झेले ।

हुँदाहुँदा उनले यस्तो कागजात पनि फेला पारे, जहाँ बोटलर्स नेपालले उनको नामै किटेर ‘ठेगान लगाउन’ माइन्युट नै गरेको देखियो ।

अन्ततः बोटलर्स नेपाल तथा यसका विदेशी लगानीकर्ताविरुद्ध कर छलीको मुद्दा दायर भएको छ । राजस्व अनुसन्धान विभागले उच्च अदालत पाटनमा बोटलर्स नेपालको शेयर किनबेच हुँदा ३ अर्ब ७१ करोड ८१ लाख ५० हजार ४११ रुपैयाँ कर छली भएको आरोप लगाउँदै सोही रकमलाई बिगो कायम गरी मुद्दा दायर गरेको हो ।

पत्रकार बुढाथाेकीकाे कामकाे मूल्यांकन गर्दै नेपाली पत्रकारहरूकाे अन्तर्राष्ट्रिय सञ्जाल (इन्जा) ले खोजी पत्रकारिता पुरस्कार २०२२ दिएको छ ।

प्रकाशित मिति: शनिबार, चैत २६, २०७८ १३:१९