गोकर्णेश्वरकाे मेयरमा कसलाई उठाउँदै छ कांग्रेस ? यी हुन् आकांक्षी

A+ A A-

अघिल्लाे चुनावी परिणामका हिसाबले काठमाडौं जिल्लाका ११ वटा स्थानीय तहमध्ये गोकर्णेश्वर नगरपालिकामा कांग्रेसको मत बलियो छ ।

देशभरै सत्तारुढ पाँचदलले गठबन्धन गरेर जाने निर्णय गरेको समयमा अघिल्लो चुनावमा नै सर्वाधिक मत पाएको कांग्रेसले गोकर्णेश्वरमा आफ्नो दाबी गरेको छ ।

२०७४ को चुनावमा यो नगरपालिकामा कांग्रेसले ७० प्रतिशत परिणाम निकालेको थियो । नौवटा वडा रहेको यो पालिकामा कांग्रेसले प्रमुख/उपप्रमुखसहित छवटा वडामा जित हात पारेकाे थियाे । बाँकी तीनवटा वडाअध्यक्षमध्ये एउटामा राप्रपा र दुईवटामा एमालेका उम्मेदवार विजयी भएका थिए ।

नगरपालिका प्रमुखमा कांग्रेस ९ हजार ९ मत लिएर विजयी हुँदा दोस्रो भएकाे एमालेले ७ हजार ५ सय ९५ मत पाएको थियो ।

यो मतान्तर र नौवटामध्ये अधिकांश वडामा कांग्रेस उम्मेदवार विजयी भएका कारणले कांग्रेसको प्रमुख दाबी रहेको छ ।

कांग्रेसबाट को उम्मेदवार भन्ने विषयमा अहिले छलफल चलाइएको छ । मेयरका लागि कांग्रेस क्षेत्रीय सचिव तथा युवा नेता दीपक रिसालले दाबी गरेका छन् ।

नगरपालिकाका प्रमुख सल्लाहाकारसमेत रहेका रिसालले यसअघि कांग्रेस अधिवेशनका क्रममा नै अन्य नेताहरूसँग सहमति गरेको दाबी गरेका छन् ।

कांग्रेस नेता प्रकाशमान सिंहनिकट मानिने रिसालले नगरपालिकाभित्र आफूले धेरै मिहिनेत गरेको र पार्टीका नेता कार्यकर्ताले पनि रुचाएका कारण आफ्नो दाबी बलियाे रहेको बताएका छन् ।

'मुख्य दाबी मेरो छ, अघिल्लो निर्वाचनकै क्रममा अहिलेका मेयर र मबीच सहमति पनि भएको हो', उनले भने, '२०७४ मा हाम्रो सहयोगमा उहाँले (सन्तोष चालिसे) जित्नु भयो, अहिले उहाँको सहयोगमा हामीलाई चुनावीनतिजा निकाल्न सहयोग पुग्नेछ ।'

राजनीति शास्त्रमा स्नाकोत्तर गरेका रिसालले नगरपालिकामा नयाँ भिजनका साथ काम गर्नका लागि आफ्नो दाबी रहेको बताएका छन् ।

यता अहिलेका मेयर चालिसले पनि आफ्नो दाबी रहेको बताएका छन् । उनले अहिले अघि बढाएका योजना पूरा गर्नका लागि आफ्नो दाबी रहेको बताए ।

'हामीबीच छलफल हुँदैछ, मेरो दाबी पनि छ', चालिसेले भने ।

यता चुनावलाई केन्द्रित गरेर रिसालले आफ्ना योजना सार्वजनिक गरेका छन् । उनले नगरपालिकाले गोकर्णेश्वर, चामुण्डा, उत्तरबाहिनी, बागद्वार, सुन्दरीमाई, तारेभिरलगायतका धार्मिक तथा पर्यटकीय क्षेत्रलाई पर्यटकीय क्षेत्रका रूपमा विकास गर्न पूर्वधार विकासकाे योजना अघि सारेका छन् । त्यस्तै नगरपालिकाभित्र शिक्षा र स्वास्थ्यलाई निःशुल्क बनाउने र रोजगारी सिर्जना गर्ने कामममा केन्द्रित हुने प्रतिबद्धता जनाएका छन् ।

१ लाख ५१ हजार २ सय जनसंख्या भएको यो नगरपालिकामा ३३ हजार ८ सय ९८ मतदाता छन् ।

प्रकाशित मिति: बिहीबार, चैत २४, २०७८ १८:३२