संसद्‌मा गैरसंसदीय अभ्यास, पार्टीभित्र छलाङ

A+ A A-

इमानको राजनीतिमा विश्वास राख्ने नेताको छवि बनाएका शंकर पोखरेलले वर्षको सुरुवातमै संसदीय कुरुप राजनीतिको अभ्यास गरे । लुम्बिनी प्रदेशको मुख्यमन्त्री पद जोगाउन प्रदेश प्रमुखको दुरुपयोगदेखि सांसद अपहरणसम्मका आरोप उनले खेपे । आफ्नै पार्टीका सांसदहरूको साथ नपाएर अल्पमतमा पर्दापर्दै १९ वैशाख ०७८ मा पुनः मुख्यमन्त्री नियुक्त भई पोखरेलले प्रदेश प्रमुखलाई आफ्नै कार्यालयमा बोलाएर पद तथा गोपनीयताको शपथ लिए ।

अविश्वासको प्रस्ताव दर्ता गरेका दलहरूको समावेदनअनुसार प्रदेशसभाको अधिवेशन छल्न राजीनामा गरेर लगत्तै संसद् अधिवेशन अन्त्य गरे । संसदीय दलका नेताहरूको पुरानो हस्ताक्षर प्रयोग गरेर बहुमत सरकारको हैसियतमा शपथ लिए । एमालेकै सांसदहरूले पोखरेललाई समर्थन नरहेको मात्रै भनेनन्, सांसदहरूले राजीनामा दिने अवस्था आयो ।

यी परिघटना १२ घण्टाको बीचमै भएका थिए । पोखरेलले मुख्यमन्त्री पद जोगाउन गरेका अनेकन हर्कतका कारण जनता समाजवादी पार्टी (जसपा) का तीन जना प्रदेश सांसदको पद गुम्याे । दुई जना एमाले सांसदले राजीनामा दिए । एक जना सांसदले पार्टी परिवर्तन गरे । नेकपाकै सांसद विमला वलीलाई अपरहण गरेको आरोप पनि खेप्नुपर्‍यो । तत्कालीन नेकपालाई विभाजनबाट रोक्न खुबै प्रयास गरेका पोखरेलले यो वर्ष एमाले विभाजन रोक्नभन्दा माधव नेपालप्रति रोष प्रकट गर्न बढी सक्रियता देखाए । स‌ंसदीय मूल्यमान्यताविपरीत काम गरेर चार महिना मुख्यमन्त्री पद लम्ब्याउन सफल भएका पोखरेलको इमानको राजनीति भने क्षय भयो ।

संसदीय राजनीतिमा बदनामी ब्यहोरेका पोखरेलले पार्टी राजनीतिमा भने यसै वर्ष छलाङ मारे । अध्यक्ष केपी ओलीको उत्तराधिकारी बन्ने गरी एमालेको दशौँ महाधिवेशनबाट महासचिवमा चयन भए । राजनीतिका चतुर खेलाडी विष्णु पौडेललाई प्रतिस्पर्धामा उछिनेर एमालेको महासचिव हात पारेका पोखरेल वर्षभरि चर्चाकै शिखरमा रहे ।

प्रकाशित मिति: शनिबार, चैत २६, २०७८ १३:०५