विद्रोही नेता अर्थात् भीम रावल

A+ A A-

नेकपा एमालेका नेता भीम रावलकाे नाम आउनासाथै तीनवटा छवि प्रदर्शित हुन्छन् । एक, अमेरिकी सहायता परियोजना एमसीसीको चर्का आलोचक । नेपालमा एमसीसी परियोजनाको विषयमा जति मिहिन बहस र उत्ताउला चर्चा भए, त्यसमा रावलको योगदान प्रत्यक्ष/अप्रत्यक्ष जाेडिएकाे छ । वर्षभरि नै एमसीसी बहस रावलकै वरिपरि घुम्यो ।

दोस्रो, एमालेभित्र मसिनो स्वरमा धरी पार्टी अध्यक्ष केपी ओलीमाथि प्रश्न उठाउन नसक्ने परिस्थिति बनेकाे बेला उनै ओलीलाई दशौँ महाधिवेशनमा सर्वसम्मत हुन दिएनन् । भलै अध्यक्षमा ‌ओली र रावलकाे मतान्तर ज्यादै फराकिलाे भयाे । तर, पार्टीभित्र लोकतान्त्रिक अभ्यास जिउँदाे बनाउन रावलले भूमिका खेले ।

तेस्रो, नेता माधव नेपाललाई धोका दिएर एमाले विभाजन रोक्न भन्दै १० बुँदे सहमतिमार्फत ओेलीतिर लागे, रावल । वर्षको सुरुवाततिर रावल माधव नेपाल खेमाको ‘हार्डलाइनर’ थिए । एमालेको राजनीतिमा लामो समयदेखि नेता नेपालकै आडमा सिँढी उक्लेका रावलले अन्तिम प्रहरमा उनै नेपालको साथ छाेडे । नेता नेपाललाई छाेडे पनि एमाले नेतृत्वले रावललाई महत्त्व भने दिएकाे छैन ।

आफ्नै पार्टीका अध्यक्ष ओलीलाई प्रधानमन्त्रीबाट हटाउने रणनीतिकारमध्ये एक थिए, रावल । ओलीद्वारा गरिएको संसद् विघटनको चर्को आलोचक रावलले कांग्रेस सभापति शेरबहादुर देउवालाई विश्वासको मत भने दिएनन् । बरु नेता नेपालसँग असहमति जनाएर सांसद पदबाटै राजीनामा दिए । विश्वासकाे मतदानपछिचाहिँ रावलले राजीनामा फिर्ता लिए ।

माधव नेपाललाई छाेडेर एमाले पुगेका रावलले त्यहाँ पनि फरक मत राख्न छाेडेनन् । असारयता एमालेले गरेकाे संसद् अवरोधविरुद्ध उभिए ।