लाेकतान्त्रिक छविमा अलाेकतान्त्रिक छाप

A+ A A-

राजनीतिमा सादगी नेताको पहिचान हो, महन्थ ठाकुरको । अवसरलाई छोडेर एजेण्डाको पक्षमा निरन्तर उभिने नेताकाे छवि बनाएका ठाकुरका लागि ०७८ साल भने पीडादायी बन्यो । मधेस राजनीतिको मियोका रूपमा रहेका ठाकुर आफ्नाे राजनीतिक जीवनको बिसाैनीतिर आइपुग्दा झण्डै पार्टीविहीन अवस्थामा पुगे ।

तत्कालीन राजपा र संघीय समाजवादी फोरम मिलेर बनेको जनता समाजवादी पार्टी (जसपा) वर्षदिन नकाट्दै किचलोमा फस्यो । तत्कालीन प्रधानमन्त्री केपी ओलीको असंवैधानिक संसद् विघटनलाई समर्थन गरेर ठाकुरले आफ्नाे लोकतान्त्रिक छविमा दाग लगाए । ओलीको अलोकतान्त्रिक कदमलाई साथ दिन ठाकुर पार्टी विभाजनका लागिसम्म तयार भए ।

पार्टीभित्र अल्पमतमा पर्दापर्दै ओली कदमकाे समर्थक बनेर १९ दिने मन्त्री बनाउन सांसदहरूलाई पठाए । त्यसका लागि सांसदलाई होटलमा राखेर निर्णय गराउने प्रयास पनि ठाकुरले गरे । तर, पार्टीमा गणपूरक सा‌ंसद ४० प्रतिशत पनि पुर्‍याउन नसक्दा अन्तिममा पार्टीविहीन हुनुपर्ने अवस्था आइदियो ।

३० साउन ०७८ मा प्रधानमन्त्री शेरबहादुर देउवाले राजनीतिक दलसम्बन्धी अध्यादेश ल्याएर नयाँ पार्टीका लागि ढोका नखोलिदिएको भए ठाकुरकाे राजनीतिक हैसियत अहिलेजस्ताे हुँदैनथ्याे । भलै उक्त अध्यादेश सत्ता सहयात्री माधवकुमार नेपालकाे सहजीकरणका लागि ल्याइएकाे थियाे । तर, याे ठाकुरका लागि सञ्जीवनी बुटी सावित भयाे । अध्यादेश आएपछि १ भदौमा ठाकुरले लोकतान्त्रिक समाजवादी पार्टी (लोसपा) दर्ता गरे ।

ओलीलाई समर्थन गरेबापत ठाकुरले ०७४ को मधेस आन्दोलनमा लागेका अधिकांश मुद्दा फिर्ता गराउन सफल भए । नागरिकतासम्बन्धी अध्यादेश जारी गराए । तर, उत्राे राजनीतिक लाभ भने मिलेन ।