शान्ति मिसनमा जानुअघि अनिलले बालाई भनेका थिए- भाइलाई पुलिस आर्मी नै बनाऊँला, घरको तला थपाैँला

शान्ति मिसनमा जानुअघि अनिलले बालाई भनेका थिए- भाइलाई पुलिस आर्मी नै बनाऊँला, घरको तला थपाैँला

कंगाेमा ज्यान गुमाएका नेपाली शान्ति सैनिक अनिल गुरुङ ।

A+ A A-

जहरे गाउँमा आउँदो दसैँभित्र दुई तले घर ठड्याउने योजना थियो, अनिल गुरुङको । शान्ति मिसनमा कंगो जाने सैनिकहरूको सूचीमा परेलगत्तै उनले बुवा लालबहादुरलाई भनेका थिए-'बा म पैसा पठाउँछु । यो वर्षभित्र घरको तला थपौँला ।'

८ पुसमा कंगो जानुअघि अनिल सुर्खेत गुर्भाकोट-१४, जहरेस्थित घरबाट बिदा भएका थिए । हिँड्नुअघि छोराले घर बनाउने मात्र होइन, जागिर छोडेपछि के गर्ने भन्नेसम्मका योजना सुनाएकाे बुवा लालबहादुर सम्झिन्छन् । आफ्ना भाइलाई अनिलले आर्मी वा पुलिसमा भर्ती गराउँछु पनि भनेका थिए । उनका २१ वर्षे भाइ दाइकाे प्रतीक्षामा थिए । भविष्यका कैयाैँ याेजना बुनेर शान्ति मिसनमा उडेका अनिल भोलि बाकसमा फर्किन लागेको खबरले गुरुङ परिवार शाेक सन्तप्त बनेकाे छ ।

हिजाे साँझ करिब ६ बजेतिर लालबहादुरलाई अनिलसँगै सैन्य सेवामा लागेका चन्द्रबहादुर गुरुङले फोन गरी खबर सुनाए- लौ बा अनिलले वीरगति पाए । पल्टनबाट फोन आउँछ होला, उठाउनु ।

नभन्दै आधा घण्टापछि लालबहादुरलाई नेपाली सेनाका अधिकारीको फोन आयो । ती अधिकारीले पनि ६२ वर्षे लालबहादुरलाई कंगोमा विद्रोहीको गोली लागेर ३२ वर्षे छाेराले ज्यान गुमाएकाे खबर सुनाए । 'सग्लै आउँछु भनेर गएको छोरा बाकसमा आउँछ भन्ने खबर मैले पाएँ', लालबहादुरले शिलापत्रसित भने, 'उसले घर छोडेर जानुअघि हामीसँग भनेका कुरा मेरो कानमा आएर ठोक्किन लागे ।'

अनिलले सेनाकाे जागिरबाट अवकाश लिएपछि विदेश जाने अनि भविष्यमा गाउँमै बसेर समाजसेवा गर्छु भनेका थिए । अनिलकी श्रीमती विद्या काठमाडौं नयाँ बजारमा बस्छिन् । उनीहरूका ९ वर्षे छोरा टाेखास्थित स्कुलमा ४ कक्षामा पढ्छन् । गाउँमा अनिलका बुवा, सानिमा, २१ वर्षे भाइ छन् । २३ वर्षे बहिनीको विवाह भइसकेको छ ।

लालबहादुरलाई माओवादी शसस्त्र युद्धका बेला छोरालाई बचाएर ल्याएको क्षणको सम्झना आइरहेको छ । अनिलले गाउँकै स्कुलबाट १० कक्षासम्म पढेका थिए । त्यसपछि पढाइलाई बिट मारेर उनी २०६० सालपछि तत्कालीन विद्रोही माओवादीले चलाएको शसस्त्र युद्धमा होमिए । 'घरको जेठोबाठाे तैँ होस् बाबू, तँलाइ केही भयो भने हामी बाँच्दैनौँ भनी फकाएर घर ल्याएँ', लालबहादुरले बिर्सेका छैनन्, 'केही महिनापछि जनयुद्धमै गयो, फेरि फर्काएँ ।'

गाउँमा खेतीकिसानी गरी गर्जाे टार्ने लालबहादुरले सेनामा रणबहादुर गुरुङलाई चिनेका थिए, जाे उच्च सैन्य अधिकारीका सुरक्षा गार्ड थिए । उनलाई भनेर लालबहादुरले अनिललाई आर्मीमा भर्ती हुन पठाए । सबै परीक्षा पास गरी ६५ सालतिर अनिल आर्मीमा छनोट भएका थिए । काठमाडौंमै विवाह गरेका उनी बिदा मनाउन गाउँ जाने गर्थे ।

छोराको रेखदेखमा कमी नगर्नू भनेका थिए

काठमाडौंमा रहेकी विद्याले श्रीमानलाई कंगोमा विद्रोहीको गोली लागेको खबर हिजो बेलुकै पाएकी थिइन् । तर बिहानै उपचारका क्रममा उनको निधन भएको अर्को खबर आयो । केही दिनयता आफैँ टाउको दुखाइको समस्या झेलिरहेकी विद्यालाई श्रीमान बितेको खबरले मर्माहत तुल्याएकाे छ । शान्ति मिसनमा जानुअघि उनले विद्यालाई भनेका थिए, 'छोराको हेरचाहमा कुनै कमी नहोस् । यसलाई राम्रोसित पढाउनुपर्छ । तिमी पनि आफ्नो ख्याल गर्नू ।'

'आज बिहान उहाँ बितेको खबर पाएँ । पत्याउन मुस्किल परिरहेको छ', उनले शिलापत्रसित भनिन् ।

हामीले एक देशभक्त सिपाहीँ गुमायाैँ

सुर्खेत गुर्भाकाेट नगरपालिका-१४ का वडा अध्यक्ष शसबहादुर घलेले एक देशभक्त सिपाही गुमाउनुपरेकाे भन्दै दुःख व्यक्त गरे । शिलापत्रसित कुरा गर्दे उनले भने, 'शान्ति स्थापनाका लागि कंगो पुगेका अनिलकाे हिजो विद्रोहीको गोली लागेर निधन भएको खबरले हामी मर्माहत भएका छौँ, गुर्भाकाेटले जन्माएका एक देशभक्त हामीले गुमायौँ ।'

गाेली लागेर ढलेका थिए

नेपाली सेनाकाे तर्फबाट उनी संयुक्त राष्ट्रसंघको आह्वानमा शान्ति स्थापनार्थ कंगोमा तैनाथ थिए । शान्ति सेनाको पहिलो डप्फामा कार्यरत थिए अनिल । कंगाेमा विद्राेहीकाे गाेली लागेर गम्भीर घाइते भएका उनकाे कंगाेकै बुनियास्थित लेबल-२ अस्पताल उपचारका क्रममा निधन भएकाे हाे । प्रमुख सेनानी निखिल कुँवरको कमाण्डमा खटिएकाे खोजतलास कारबाहीका क्रममा विद्रोहीले आक्रमण गरेका थिए । नेपाली सेनाका प्रवक्ता सहायक रथी नारायण सिलवालका अनुसार पहिला विद्रोहीको कब्जामा रहेको जमिनबाट उनीहरूलाई धपाएर नेपाली सेना त्याे ठाउँमा पुगेकाे थियाे । त्यही बेला बिद्राेहीले परैबाट हानेकाे गाेली लागेर गुरुङ ढले । 'अपरेसन बाली' नामकाे सो कार्बाहीका बाँकी सबै सदस्य सैनिक सुरक्षित छन् । कंगाेमा शान्ति स्थापनार्थ खटिएका नेपाली सैनिककाे मृत्यु भएकाे प्रति संयुक्त राष्ट्र सुरक्षा परिषद्‌ले दुःख प्रकट गरेकाे छ ।

The @UN Security Council strongly condemns the attack on @MONUSCO, which resulted in the death of a peacekeeper in the Democratic Republic of the Congo. pic.twitter.com/NCLFbrxhyl
— U.S. Mission to the UN (@USUN) April 6, 2022