गण्डकीका सबै सांसदलाई पिएको सुविधा

A+ A A-

गण्डकी प्रदेशका सबै सांसदले आगामी आर्थिक वर्षको सुरुदेखि नै स्वकीय सचिव राख्न पाउने भएका छन् । सरकारले आगामी आर्थिक वर्ष २०७६/०७७ को बजेटमा नै सांसदका स्वकीय सचिवलाई तलब सुविधाको व्यवस्था गरिदिएपछि स्वकीय सचिव राख्ने ढोका खुलेको छ ।

‘सांसदहरुले नायब सुब्बा स्तरका व्यक्तिलाई स्वकीय सचिवमा नियुक्त गर्न पाउनेछन्। बजेटमा त्यसको व्यवस्था भइसकेको छ,’ सरकारका प्रवक्ता तथा भौतिक पूर्वाधार विकासमन्त्री रामशरण बस्नेतले भने, ‘अब मन्त्रिपरिषद् बैठक बसेर निर्णय गर्छ । सुविधासम्बन्धी ऐन संशोधन गर्छ । त्यसपछि सचिव राख्ने बाटो खुल्छ ।’

सरकारले प्रदेशसभाका पदाधिकारी तथा सदस्यहरुको पारिश्रमिक तथा सेवा सुविधाका लागि छुट्टै ऐन बनाएको छ । उनीहरुको सुविधा थप गर्दा ऐन संशोधन गर्नुपर्छ । आगामी मन्त्रिपरिषद् बैठकबाट ऐन संशोधन गरिने बस्नेतले जानकारी दिए ।

बस्नेतका अनुसार पहिले नै सचिवको सुविधा लिएका सांसदलाई भने यो नियम लागू हुनेछैन्। सभामुख, उपसभामुख, विपक्षी दलका नेताले स्वकीय सचिवको सुविधा पाइसकेका छन् ।

प्रमुख सचेतक र संसदीय समितिका सभापतिलाई स्वकीय सचिव राख्ने सुविधा दिइएको थिएन । उनीहरुले सांसदले पाउनेभन्दा एक तहमाथिको स्वकीय सचिव दिनुपर्ने माग राखेका छन् । तर, सरकारले भने त्यसलाई सम्बोधन गर्न कठिन हुने जनाएको छ ।

सभापति र सचेतकलाई पनि सांसदकै सुविधाअनुसार नासु स्तरको स्वकीय सचिवको सुविधा दिन लागिएको हो । गण्डकी प्रदेशका ६० सांसदमध्ये ४९ जनाले यो सुविधा पाउनेछन् । अन्यले यसअघि नै यस प्रकारको सुविधा लिइसकेका छन् ।

प्रकाशित मिति: शनिबार, असार २१, २०७६ ०३:३७