प्रेम गरेकै कारण 'वनबास' जान बाध्य पारिएका चन्द्र कामी

A+ A A-

हुम्लाका १७ वर्षे चन्द्र कामीकाे घटनाले सामाजिक कुप्रथाका रूपमा रहेकाे जातीय भेदभावको पर्दा उघार्‍याे । अघिल्लो वर्ष जातीय विभेदमै रुकुममा नवराज विक मारिएका थिए । धेरैले चन्द्रमाथि यस्तै हुने डर व्यक्त गरेका थिए । हुन पनि, कथित् माथ्लो जातकी किशोरीसँग प्रेम गरेकै कारण चन्द्रलाई एक सातासम्म भागेर हिँड्न बाध्य पारियो । मल्ल थरकी १७ वर्षीया प्रेमिकालाई सँगै राखेको बहानामा उनलाई कुटपिटसमेत गरियो ।

हुम्ला सर्केगाड गाउँपालिका- १, जैरका चन्द्र र मुगुकी १७ वर्षीया सुन्तलीकाे विवाह गर्न उमेर पुगेको थिएन । तर, ५ मंसिरमा उनीहरूले सँगै बस्ने निधाे गरे । केटी पक्षले छुटाउने डरले सुरुमा चन्द्र र सुन्तली घर नगएर छिमेकी गाउँमा गएर बसे । अनि, २४ मंसिरमा सुन्तलीलाई लिएर चन्द्र जैरस्थित आफ्नो घर फर्के ।

२९ मंसिर मध्यरातमा १५/२० जनाको समूह एकाएक जैर पस्यो । उनीहरूमध्ये केही चन्द्रको घरभित्र छिरे भने कसैले छिमेकीको घरबाहिरका ढोका लगाइदिए ।

चन्द्रको परिवारका अन्य सदस्य सुतेको कोठाको ढोका पनि बन्द गरिदिए । र, उनीहरूले चन्द्र र सुन्तलीलाई घरबाट लिएर गए । त्यसकाे सात दिनपछि चन्द्र हुम्लाकाे खार्पुनाथ गाउँपालिकामा भेटिए । सुन्तलीचाहिँ माइतमै भेटिएकी थिइन् ।

प्रहरी अधिकारीका अनुसार हुम्ला घटनामा दुईखाले कसुर थिए । पहिलो, बालविवाह अनि दोस्रो जातीय भेदभाव । तर, दुवै घटना प्रहरी, जनप्रतिनिधि र दलित अधिकारकर्मीकाे राेहवरमा मिलाइयाे ।