अध्यादेश ल्याएर भए पनि निजीक्षेत्रलाई विद्युत् व्यापारको इजाजत दिन्छौँ : ऊर्जामन्त्री भुसाल

अध्यादेश ल्याएर भए पनि निजीक्षेत्रलाई विद्युत् व्यापारको इजाजत दिन्छौँ : ऊर्जामन्त्री भुसाल

A+ A A-

ऊर्जा, जलस्रोत तथा सिँचाईमन्त्री पम्फा भुसालले अध्यादेश ल्याएर भए पनि निजीक्षेत्रलाई विद्युत् व्यापारको इजाजतपत्र दिइने बताएकी छन् ।

काठमाडौंमा जारी हिमालयन हाइड्रो एक्स्पोमा सोमबार मन्त्री भुसालले निजीक्षेत्रलाई विद्युत् व्यापारको इजाजतपत्र अध्यादेश ल्याएर भए पनि दिलाउन सरकार प्रतिबद्ध रहेको बताएकी हुन् ।

'म मेरो बचनमा पूरै प्रतिबद्ध छु । पर्‍यो भने अध्यादेशकै विधिद्वारा भए पनि हामी विद्युत् व्यापारको लाइसेन्स निजीक्षेत्रलाई दिने कुरामा सरकार, मेरो मन्त्रालय, म पूरै हामी सकारात्मक र प्रतिबद्ध छु,' भुसालले भनिन्, 'म प्रधानमन्त्रीज्यूसँग पनि सल्लाह गर्छु । हामी त्यो दिनेछौँ ।’

मन्त्रालयले इजाजतपत्र दिनका लागि कार्यविधि र नियमावली तयार गरे पनि कानुन मन्त्रालयमा पठाउँदा कार्यविधि बनाएर दिन नपाइने प्रतिक्रिया पाएकाले दिन नसकेको उनले बताइन् । 'कानुन (मन्त्रालय) मा गएर हामीलाई दाँतमा ढुंगा लागेको छ कि कार्यविधि बनाएर दिन पाइन्न । ऐनमा छैन । कार्यविधि बनाएर पाइन्न भन्ने उहाँहरूको प्रतिक्रिया छ । त्यसो भएपछि कि अध्यादेश ल्याउनुपर्‍यो । कि अर्को केही विधि खोज्नुपर्‍यो भन्ने छ,' भुसालले भनिन् ।

घरायसी प्रयोजनमा विद्युतीय उपकरणको प्रयोग गर्नुपर्नेमा उनको जोड थियो । पेट्रोलियम पदार्थको विकल्पका रूपमा जलविद्युत्‌लाई लिइनुपर्ने उनको भनाइ छ ।

‘पेट्रोलियम पदार्थको बेलगाम मूल्यवृद्धि भइराखेको छ । संसारका कोही देशलाई त्यसको सायदै विकल्प होला, हामी नेपालीसित विकल्प छ । हामिसित जलस्रोत छ । जलविद्युत् छ,' भुसालले भनिन्, 'अब हामी घरायसी प्रयोजन, कृषि, सिँचाइ, उद्योगले मागेजति दिने र अब यातायातका साधनलाई पनि विद्युतीय जब गर्छौ हामीले अरु हजार मेघावाट देशभित्रै खपत गर्न सक्ने स्थिति बनेको छ ।'

आगामी बजेटमा विद्युतीय उपकरणको प्रयोग बढाउने गरी नीतिगत रूपमा सम्बोधन गरिने र त्यसका लागि बजेटको व्यवस्था पनि गर्ने उनले बताइन् ।

प्रकाशित मिति: सोमबार, चैत २१, २०७८ १८:४१