सेनाको सुरक्षा कमाण्डमा मतपत्र छाप्न सुरु, पहिला दुर्गम क्षेत्रको मतपत्र छापिने

सेनाको सुरक्षा कमाण्डमा मतपत्र छाप्न सुरु, पहिला दुर्गम क्षेत्रको मतपत्र छापिने

A+ A A-

आगामी ३० वैशाखमा हुने स्थानीय तह चुनावको मतपत्र छपाइ सुरु भएको छ । निर्वाचन आयोगले आजदेखि मतपत्र छपाइ सुरु भएको जानकारी दिएको हो ।

आइतबार नमुना मतपत्र छापेको आयोगले आजबाट मतपत्र छपाइ सुरु गरेको हो । आयोगका अनुसार १ लाख ८० हजार थान नमुना मतपत्र छापिएको थियो । सोहीबमोजिम निर्णय गरेर आजैबाट मतपत्र छपाइको काम आयोगले सुरु गरेको हो ।

स्थानीय तह चुनावका लागि आयोगले २३ लहर समूहमा मतपत्र छाप्न सुरु गरेको हो । त्यसमध्ये सबैभन्दा कम डोल्पाको मतपत्र १६ लहरको हुनेछ । त्यस्तै सबैभन्दा बढी ५६ लहरको मतपत्र काठमाडौंको हुने आयोगले जनाएको छ ।

२३ लहर समूहमा कुल १ करोड ९४ लाख थान मतपत्र छपाइ हुने आयोगले जानकारी दिएको छ । जनक शिक्षा सामग्री केन्द्रमा मतपत्र छपाइ भइरहेको छ ।

मतपत्र छाप्नको लागि आयोगले प्राथमिकता निर्धारण गरेको छ । सबैभन्दा पहिला दुर्गम क्षेत्रको मतपत्र छापिने आयोगका प्रवक्ता शालिग्राम शर्मा पौडेलले बताए । 'प्राथमिकता त तोकेका छैनौँ । तर, पहिला छाप्ने काम दुर्गमको हुन्छ । किनभने ढुवानीको हिसाबले दुर्गम जान धेरै दिन लाग्न सक्छ । पहिला दुर्गम स्थानको छाप्ने र पहिला पठाउने, अनि सुगम क्षेत्रको छाप्छौँ,' उनले भने ।

मतपत्र छाप्न सेक्युरिटी प्रेसमा काम गर्ने छुट्टै कर्मचारीलाई खटाइएको छ । नम्बरिङ, प्याकिङ र ब्याण्डिङको सम्पूर्ण काम ती कर्मचारीले गर्नेछन् ।

मतपत्र छपाइको सुरक्षा नेपाली सेनाले गर्दै आएको छ । नेपाली सेनाको कमाण्डमा नेपाल प्रहरी र सशस्त्र प्रहरीसमेत सुरक्षार्थ खटिएका छन् । मतपत्र छपाइको कामसमेत व्यवस्थित गर्नका लागि मतपत्र छाप्ने स्थल वरवर सीसीक्यामेराको समेत व्यवस्था गरिएको छ । मतपत्र छपाइको काम २० दिनभित्रमा सकिने जानकारी जनक शिक्षाले आयोगलाई दिएको छ ।

स्वीकृत अन्तिम मतदाता नामावलीबमोजिम १ करोड ७७ लाख ३३ हजार ७२३ मतदाता छन् । कूल मतदाताको ८ देखि १५ प्रतिशतसम्म थप मतपत्र छापिने प्रवक्ता पौडेलको भनाइ छ ।

'साह्रै कम मतपत्र हुने र दुर्गम जिल्लामा बढी प्रतिशत । किन भने त्यहाँ बिग्रिहाल्यो र थप मतपत्र चाहिने अवस्था भयो भने ढुवानीले छापिएको मतपत्रभन्दा बढी खर्च लिन्छ । त्यसकारण मनाङ, हुम्ला, जुम्लाजस्ता विकट जिल्लाहरूमा बढी प्रतिशत जगेडा राखिन्छ,' पौडेलले भने ।

प्रकाशित मिति: सोमबार, चैत २१, २०७८ १६:५९