नेपाल-अमेरिका अन्तर्राष्ट्रिय चलचित्र महोत्सव : ११ चलचित्र पुरस्कृत

A+ A A-

नेपाल-अमेरिका फिल्म सोसाइटीले वासिङ्टन डीसी महानगर क्षेत्रअन्तर्गत म्यारिल्यान्ड राज्यमा २८ ,२९ र ३० जुनसम्म आयोजना गरेको तेस्राे नेपाल-अमेरिका अन्तर्राष्ट्रिय चलचित्र महोत्सव सम्पन्न भएकाे छ ।

विनोद पौडेलद्वारा निर्देशित बुलबुल चलचित्रको प्रदर्शनबाट सुरु भएको महोत्सव प्रविन स्याङ्ग्बोद्वारा निर्देशित चलचित्र कथा ७२ बाट समापन भएको थियो ।

चलचित्र महोत्सवमा नेपाललगायत विभिन्न देशका ३४ वटा चलचित्र प्रदर्शन भएका थिए । उद्घाटन र समापन एएफआई सिल्भरमा सम्पन्न भएको थियो भने नियमित प्रदर्शन रेगल सिनेमासँगको सहकार्यमा ह्याट्सभिल म्यारिल्यान्डमा भएको थियो । चलचित्र प्रदर्शनका साथै म्यारिल्यान्ड पार्क्स तथा प्लनिङ कमिसनसँगको सहकार्यमा प्रत्येक दिन सिनेमाबारे छलफल तथा चिया गफ सम्पन्न भएको थियो ।

चलचित्र महोत्सव अवधिमा प्रदर्शन भएका विभिन्न विधाका चलचित्रलाई भर्खरै फ्रान्समा आयोजना भएको फिल्म फेस्टिभलमा अर्को फिल्म बनाउन ६० हजार पुरस्कार जितेका मीनबहादुर भामको अध्यक्षतामा रहेको ‘ल जोला फेसन फिल्म फेस्टिभल की रेबेका बुस्टामानत़े र एमी अवार्ड विजेता तथा लेखक/निर्मात्री मिमि मचाडो लुसेससहितको ३ सदस्यीय निर्णायक मण्डलले ११ वटा विधामा पुरस्कारको घोषणा
गरेका थिए ।

प्रतिस्पर्धामा रहेका चलचित्रमध्येबाट कथानकतर्फ बंगलादेशका तउक्विर अहमदले निर्देशन गरेको फागुन हवे ले बेस्ट फिल्म फिचर अवार्ड, युकी काङले निर्देशन गरेको फिल्म अ लिटल विस्डम बेस्ट डकुमेन्ट्री र इरानका मोहम्मद बक्सीले निर्देशन गरेको आर यु भलिबल ले बेस्ट सर्ट फिल्मको अवार्ड जितेकाे छ । उद्घाटन समारोहमा प्रदर्शन गरिएको चलचित्र बुलबुल र समापन समारोहमा प्रदर्शन गरिएकाे चलचित्र कथा ७२ भने प्रतिस्पर्धामा थिएनन् ।

महोत्सवमा ग्लोबल पिस फिल्म फेस्टिभल फ्लोरिडाको साइडबारका रूपमा दुइटा चलचित्र प्रदर्शनमा थिए ।

अमेरिकाका लागि नेपाली राजदूत डा. अर्जुन कार्कीले डम्फु बजाएर उद्घाटन भएको महोत्सवमा मेरिल्यान्ड फिल्म अफिसका निर्देशक ज्याक गेर्वेस, महावाणिज्यदूत प्रेमराजा महत, मेरिल्यान्ड राज्यको मन्टगमरी काउन्टिका काउन्सिल सदस्य टम हकरलगायत नेपाली सामुदायिक नेतृत्वहरु उपस्थित थिए । चलचित्र महोत्सवको समापन मन्तव्यका लागि भने मेरिल्यान्ड राज्यका डेलिगेट एचबी ह्यारी भण्डारी उपस्थित थिए ।

नेपालका वरिष्ठ चलचित्रकर्मी नवीन सुब्बा महोत्सवको सम्मानार्थ अध्यक्ष थिए । नेपाल समुदायले नेतृत्व गरेको नर्थ अमेरिकाकै ठूलो चलचित्र महोत्सव बन्न सक्ने महोत्सवमा उपस्थित चलचित्रकर्मी तथा व्यक्तित्वहरुले चर्चा गरेका छन् ।