तपाईंको पालिकाकाे चुनावी गणित कस्ताे छ ? शिलापत्रकाे निर्वाचन प्राेफाइल हेरी थाहा पाउनुहाेस् (तथ्यांकसहित)

तपाईंको पालिकाकाे चुनावी गणित कस्ताे छ ? शिलापत्रकाे निर्वाचन प्राेफाइल हेरी थाहा पाउनुहाेस् (तथ्यांकसहित)

A+ A A-

स्थानीय तहको चुनावलाई लिएर नेताहरू देश दौडाहामा लागिसकेका छन् । आगामी चुनावमा कसले टिकट पाउला भन्ने चासो बढेको छ । कुन पार्टीले जित्ला भनेर आकलन गर्न थालिएको छ । चुल्हाे, चियापसलदेखि चाेक–चाैतारासम्मै फलानोले पायो भने जित्न सजिलो छ तर, त्यो मान्छेलाई फलानो पार्टीले उठायो भनेचाहिँ गाह्रो छ है भन्ने किसिमका विश्लेषण चलेको छ ।

हरेक निर्वाचनमा के हाेला भनेर धारणा बनाउन अघिल्लो निर्वाचनको परिणाम हेरेर अनुमान गर्ने गरिन्छ । त्यसपछि अघिल्लाे पटक निर्वाचित जनप्रतिनिधिले गरेको काम र शैलीलाई हेरिने गरेको हुन्छ । त्यसैको आधारको पछिल्लो निर्वाचनले मत प्रभाव पार्ने गरेको तथ्यले देखाउँछ ।

सामान्यतया मतदाताको संख्यामा भएको घटबढ र अघिल्लो निर्वाचनमा पाइएको मतपरिणामलाई आधार मानेर चुनाव प्रक्षेपण गर्ने गरेको देखिन्छ । यस्तै यावत विषयलाई मध्यनजर गरेर हामीले शिलापत्र निर्वाचन प्रोफाइल तयार पारेका छौँ ।

समग्र नेपाल, सातवटा प्रदेश, ७७ जिल्ला, ७५३ स्थानीय तह र ६ हजार ७४३ वडा तहसम्मको तथ्य-तथ्यांक हामीले प्रस्तुत गरेका छौँ । शिलापत्र निर्वाचन प्रोफाइलमार्फत तपाईंको पालिकासम्मको जनसंख्या तथा मतदाता र वडा तहसम्मकै अघिल्लो निर्वाचनको विषयमा जानकारी पाउनुहुनेछ । तथ्यांक केन्द्रित निर्वाचन प्रोफाइलमा पूरै देश, प्रदेश र जिल्लामा कति जनसंख्या, कति मतदाता, कति पालिका र कति वडा छन् भन्ने विषयमा तथ्यांक राखिएको छ ।

तथ्यांक विभागले प्रारम्भिक रूपमा सार्वजनिक गरेको जनगणना २०७८ अनुसार जनसंख्या राखिएको छ । नेपालमा पहिलो पटक निर्वाचनको अघिल्लो दिनसम्म १८ वर्ष उमेर पुग्ने नागरिकलाई समेत मतदान अधिकार दिने गरी गरिएको व्यवस्थाअनुसार निर्वाचन आयोगले निर्धारण गरेको मतदाताको संख्या राखिएको छ ।

अघिल्लो निर्वाचन २०७४ मा देशभर, प्रदेश र जिल्लामा कुन पार्टीले कति प्रमुख वा अध्यक्ष जिते, उपाध्यक्ष वा उपप्रमुख जिते र वडाअध्यक्ष जिते भन्ने मात्रै होइन, कति स्थानमा कुन पार्टीका निकटतम प्रतिद्वन्द्वी वा उपविजेता भए भन्ने तथ्यांक पनि यसमा राखिएको छ ।

सम्बन्धित पालिकामा प्रमुख वा अध्यक्षमा जितेको पार्टी र मतान्तर । प्रमुख वा अध्यक्षमा दोस्रो हुने पार्टी, उपाध्यक्ष वा उपप्रमुख जितेको पार्टी र कुन वडामा कुन पार्टीको उम्मेदवारले जितेको छ भन्ने विषयमा जानकारी गराइएको छ ।

निर्वाचन प्रोफाइलमा तपाईंले पहिलो क्लिकमा देशभरको अवस्था जानकारी पाउनुहुनेछ भने दोस्रो क्लिकमा तपाईंले रोजेको प्रदेश, तेस्रो क्लिकमा जिल्ला र चौथो क्लिकमा तपाईंको स्थानीय तहको तथ्यांक पाउनुहुनेछ ।

स्थानीय तहको निर्वाचनमा पार्टीको प्रभाव नपर्ने त कुरै भएन । त्यत्तिकै ठूलो प्रभाव व्यक्तित्व र उसले समाजमा देखाएको सक्रियताको पनि पर्छ । २०७४ को स्थानीय तहको निर्वाचन हेर्‍यो भने एउटा पालिकामा सबै वडाध्यक्ष एउटा पार्टीले तर पालिका अध्यक्ष फरक पार्टीको उम्मेदवारले जितेको पनि पाइएको थियो ।

आगामी निर्वाचनमा पनि उम्मेदवारको योग्यता वा क्षमता पनि जितको एउटा आधार हुन सक्ने देखिन्छ । शिलापत्र, निर्वाचनअघि तपाईंले खोजेको सूचना वा जानकारी र निर्वाचनका क्रममा पल-पलको अपडेट र निर्वाचनपछिको विश्लेषणसहित तपाईंहरूकै साथमा रहने प्रतिबद्धता व्यक्त गर्दछ ।

प्रकाशित मिति: सोमबार, चैत २१, २०७८ ०९:२७